91
Luhanga mu̱li̱ndi̱ waatu
1 Muntu weena oghu akuukala mu ki̱i̱kalo kya wa Eghulu Munu,
akuhuumulila mu ki̱i̱ku̱dhu̱ kya wa Bu̱toki̱ Bwona.
2 Ndaghambilagha Mukama nti,
“Nuuwe buulukilo bwanje kandi kigho kyanje.
Luhanga wanje oghu neesi̱ghi̱ye.”
3 Mukama akukulinda mu ki̱ki̱ya bakutegheeye mu ki̱bi̱so
kandi mu ndwala esitaakutambiluwagha.
4 Aku̱ku̱swi̱ki̱la na byoha biye
kandi hansi ya mapapa ghe,
niiyo bukuba buulukilo bwawe.
Bwesighibuwa buwe bukukulinda kandi bube ngabo yaawe.
5 Mukilo tookwobaha bintu ebikukwobahi̱i̱li̱li̱ya,
kedha abaku̱ku̱lu̱mba ntangaali̱ bakwete bimala.
6 Tookwobaha ndwala esikwisilagha mu mweli̱ma,
kedha kabhi akakwisa ntangaali̱.
7 Nankabha bantu lu̱ku̱mi̱ bakwi̱la haai naawe
kandi mutwalo ghumui haa luhande lwa mukono ghwawe ghwabuliyo,
bhaatu uwe kabhi takaku̱ku̱hi̱kʼo bbaa.
8 Okuukala ololi̱ye na maaso ghaawe
kandi oboone ngoku bantu babhi bakwete kufubiluwa.
9 Okaakufoola Mukama kuba buulukilo bwawe
kandi wa Eghulu Munu kuba ki̱i̱kalo kyawe kya kuukalamu,
10 taaliyo kabhi koona akaku̱ku̱hi̱kʼo,
kedha katabanguko koona akakwisa haai na ka yaawe.
11 Luhanga akulaghila baamalai̱ka be bakuloleelele.
Bakukulinda hoona hambali okughenda.
12 Bakukukwatilila mu ngalo syabo,
niikuwo oteehuulila ebaale ohendeka kighele.*91:12 Matayo 4:6; Luka 4:11
13 Okukpeetaaga ntale kandi teekpe,
okpeetaagule na bighele byawe ntale sisaakaaye kandi njoka.
14 Luhanga akughilagha ati, “Nkujuna aba nku̱ndi̱ye
kandi nkulinda abamani̱ye si̱ye nga Mukama.
15 Mbambilikiiye, nkubakuukamu,
mbaabaaye bali mu bijibu, nkubakoonela.
Nkubacungula kandi mbahu̱ti̱ye.
16 Nkubaha mpeela ya kuukala bali boomi̱i̱li̱
kandi mbooleke kujuna kwanje.”