92
Kilimbo kya kusinda
Jabbu̱li̱. Kilimbo kya kulimba haa Sabhato.
1 Nkilungi ku̱si̱i̱ma Mukama
kandi kulimba ntu̱ku̱mi̱ya li̱i̱na lyawe, uwe wa Eghulu Munu.
2 Ki̱hi̱ki̱ye kulangilila kukunda kwawe kwamaani̱ nkyambisi.
Mukilo kughambila bantu haa bwesighibuwa bwawe,
3 ntulimba ntu̱koleesi̱ya du̱ngu̱
na maali̱kembe.
4 Ai̱ Mukama, bikoluwa byawe byamaani̱ bikulekagha ndheedhuwa.
Ebi waakoli̱ye bikulekagha ndimba nsemeleeuwe.
5 Ai̱ Mukama, bikoluwa byawe mbyamaani̱!
Byeli̱li̱kano byawe bitobheeye kwonini!
6 Kini ni kintu eki mudhoma ataakugubha kumanya.
Eki oghu ataakwetegheeleli̱yagha ataakugubha kukenga.
7 Nankabha babhi mbakukulagha nga bi̱si̱ngo
kandi nkoli̱ sya bibhi mbakula-kulana,
balihwelekeelela bilo nʼebilo.
8 Bhaatu uwe, Ai̱ Mukama, oli eghulu munu bilo nʼebilo.
9 Ai̱ Mukama, tumani̱ye ngoku
ngi̱ghu̱ syawe si̱li̱ku̱wa
kandi ngoku olilalangi̱ya bantu babhi boona.
10 Okampa maani̱ nga ghaa ntu̱u̱li̱ ya mbogho.
Wanseesʼo magita ghasemeleeye kimui.
11 Naaboone ngoku ngi̱ghu̱ syanje bakwete ku̱si̱ngu̱lu̱wa.
Naaghu̱wa kutakangana kwa bantu babhi.
12 Bhaatu bantu bahi̱ki̱li̱i̱ye balikana nga mba.
Bakule nga biti byʼomu Lebbanooni̱.
13 Baliba nga biti baheli̱ye mu numba ya Mukama,
ebikukana mu bbalaaji sya numba ya Luhanga waatu.
14 Nankabha bakaakuuye,
baliikala banali na maani̱ kandi mbanabyala.
15 Nahabweki balalangililagha bati, “Mukama ahi̱ki̱li̱i̱ye,
niiye kikuka kyanje kandi taali na bubhi bwona.”