138
Nsaala ya ku̱si̱i̱ma
Jabbu̱li̱ ya Dhau̱dhi̱.
1 Ai̱ Mukama, nku̱ku̱si̱i̱ma na mutima ghwanje ghwona.
Nkulimba ninkusinda mu maaso ghaa baaluhanga.
2 Nkulola numba yaawe ehi̱ki̱li̱i̱ye.
Nteeli̱ye kandi nsinde li̱i̱na lyawe,
haabwa kukunda kwawe kwamaani̱ kandi bwesighibuwa.
Wooleki̱ye ngoku li̱i̱na lyawe kandi bilaghilo byawe bisaai̱ye bintu byona.
3 Haa kilo eki naakubilikiliiyemu, okankuukamu,
wangu̱mi̱ya kandi wampa maani̱.
4 Ai̱ Mukama, bakama baa munsi boona baku̱ku̱si̱i̱ma,
bakaku̱u̱ghu̱wa bighambo ebi̱ku̱lu̱gha mu kanu̱wa kaawe.
5 Balalimbagha mbaku̱mi̱ya ebi okukolagha,
nanga ki̱ti̱i̱ni̱sa kya Mukama nkyamaani̱.
6 Nankabha Mukama ali eghulu munu,
akuukalagha haai na badhooti̱,
bhaatu aselanʼo kwonini na abali na myepanko.
7 Nankabha bijibu bi̱neeli̱ghi̱i̱li̱li̱ya,
okunjunagha ki̱i̱ni̱gha kya ngi̱ghu̱ syanje.
Oku̱u̱mu̱ki̱yagha mukono ghwawe
kandi mukono ghwawe ghwabuliyo ghukunjunagha.
8 Ai̱ Mukama, ohi̱ki̱li̱i̱li̱ye ebi waalaghi̱i̱sani̱i̱ye,
nanga kukunda kwawe kwamaani̱ ni kwa bilo nʼebilo.
Omaliilile mulimo oghu waatandi̱ki̱ye.