139
Kumanya kwa Luhanga kwonini
Ewaa mukulu wa bilimbo. Jabbu̱li̱ ya Dhau̱dhi̱.
1 Ai̱ Mukama, okandola kwonini
kandi ommani̱ye.
2 Okumanyagha nkaakubaagha nsitami̱ye kedha neemiliiye.
Okukengagha ebi nkwete kweli̱li̱kana byona ninali hambali haseli̱ye.
3 Okuukalagha omboone, obu nkubaagha nindubhatanga kandi ndangaaye.
Eki nkaakukolagha kyona okimani̱ye.
4 Ntakabu̱ghi̱ye kighambo kyona,
okuukalagha omani̱ye ebi nku̱bu̱gha.
5 Oneeli̱ghi̱li̱i̱ye haa bu̱li̱ luhande
kandi okundindagha na mukono ghwawe ghwamaani̱.
6 Kummanya kwawe nkwamaani̱,
kusaaliiye kimui kwetegheeleli̱ya kwanje.
7 Nkugubha kughenda haa ku̱kwebi̱si̱i̱li̱la?
Kedha nkugubha ku̱li̱gi̱ti̱la haa kukuuluka?
8 Nankabha ni̱ni̱i̱na eghulu, oliyeyo
kandi ndangaala eku̱li̱mu̱, oliyeyo dhee.
9 Nankabha mpalala ngendela kimui bu̱lu̱gha ejooba,
kedha niikala hambali haseleeye kimui luhande lweli̱ lwa nanja,
10 nʼeghi oliyeyo dhee kuneebembela.
Mukono ghwawe ghwabuliyo ghukunkwatilila.
11 Nkugubha kusaba mweli̱ma ku̱nswi̱kila
kandi kyeleeli̱ ekyeli̱ghi̱li̱i̱ye si̱ye kufooka mukilo.
12 Bhaatu nankabha mweli̱ma, taghuli mweli̱ma ewaawe.
Mukilo ebbeni̱ye nga ntangaali̱.
Mweli̱ma kandi kyeleeli̱ bisusaane ewaawe.
13 Nuuwe okakola bu̱li̱ ki̱twi̱ke kya mubili ghwanje.
Wankwatani̱ya hamui munda ya maaha.
14 Nkukusinda haabwa mulingo ghwa mbaghani̱ja wankoleeyemu.
Bu̱li̱ kintu kyona eki okukolagha nkyakuswekani̱ya.
Eki nkimani̱ye kwonini.
15 Okabona maku̱wa ghanje ngakoluwa mu ki̱bi̱so munda ya maaha,
hambali bankwatani̱yagha hamui muntu ataboone.
Obu naakulilaghayo mu ki̱bi̱so,
okaba omani̱ye ngoku ndiyeyo.
16 Okambona ntakabyahuwe.
Bilo byanje nkumala munsi byona,
bikahandiikuwa mu kitabo kyawe,
na kimui haa bilo ebi kitakabaayʼo.
17 Ai̱ Luhanga, kikuntimbiikilanagha kwetegheeleli̱ya byeli̱li̱kano byawe,
nanga bikani̱ye kwonini!
18 Nankabha mbibala, bisaaye musene kukana.
Nkaaku̱su̱su̱mu̱kagha, nkusangagha ndi hamui naawe.
19 Ai̱ Luhanga, nkubbala bantu babhi obaate
kandi abakubbala kukola kubhi bantu bandu̱ghʼo.
20 Baku̱ku̱bu̱ghaghʼo kubhi
kandi bambula li̱i̱na lyawe.
21 Ai̱ Mukama, noohi̱ye abakwohi̱ye
kandi nkughayagha abakukuhakani̱yagha.
22 Mboheeye kimui,
nanga bakufookagha ngi̱ghu̱ syanje.
23 Ai̱ Luhanga, ondole kandi omanye mutima ghwanje.
Ondengese kandi omanye byeli̱li̱kano byanje.
24 Ondole nkaakuba ndi mu kihanda ki̱bhi̱i̱hi̱ye
kandi ompikile mu kihanda eki̱i̱si̱ye ewaawe bilo nʼebilo.