140
Nsaala ya kusaba kulinduwa
Ewaa mukulu wa bilimbo. Jabbu̱li̱ ya Dhau̱dhi̱.
1 Ai̱ Mukama, onjune ku̱lu̱gha mu bantu babhi
kandi ondinde mu bantu abasaakaaye.
2 Bantu aba bakuteghekagha bintu bi̱bhi̱i̱hi̱ye mu mitima yabo.
Bakumalagha kilo kyona mbeekumaani̱ya kuleeta bulemo.
3 Bilimi byabo byoghiiye nga bya njoka.
Bighambo baku̱bu̱ghagha bili nga buseguwe bwa teekpe.
4 Ai̱ Mukama, onjune ku̱lu̱gha mu bantu babhi
kandi ondinde mu bantu abasaakaaye,
nanga bakwete kutegheka ku̱nsi̱ngu̱la.
5 Bantu baa myepanko bantegheeye bi̱ki̱ya.
Baateghi̱ye bi̱ki̱ya byabo hambali nkukwama niikuwo bankwate.
6 Nkughilagha Mukama nti, “Nuuwe Luhanga wanje!”
Ai̱ Mukama, ooghu̱we elaka lya kwesengeleli̱ya kwanje!
7 Ai̱ Mukama, Mukama wanje kandi maani̱ ghaa kujunuwa kwanje.
Nuuwe okundindagha haa bulemo.
8 Ai̱ Mukama, otaha bantu babhi ebi bakwete kubbala.
Otaleka ebi bakwete kutegheka mbibʼo.
9 Otaleka ngi̱ghu̱ syanje mbasi̱ngu̱la.
Ebi bakwete kukola kunjobahi̱i̱li̱li̱ya bibakuukile.
10 Oleke makala ghaaki̱yʼo mulilo ghabaseesekele.
Oleke babakube mu bi̱i̱na bitobheeye kandi batalu̱ghayo.
11 Otaleka abakwete kuhangilila baanakyabo mbasi̱ngu̱la.
Oleke bubhi bu̱si̱ngu̱le bantu basakaaye kandi bubahwelekeeleli̱ye.
12 Nimani̱ye ngoku Mukama akukingililagha banaku
kandi aha bughabe abali mu bwetaagho.
13 Majima abahi̱ki̱li̱i̱ye bakusinda li̱i̱na lyawe
kandi bantu balungi bakuukala mu maaso ghaawe.