141
Nsaala ya lwagholo
Jabbu̱li̱ ya Dhau̱dhi̱.
1 Ai̱ Mukama, nuuwe nkwete kubilikila,
gutu onkoonele endindi.
Ontegheeleli̱ye ninaakubilikiiye.
2 Osi̱i̱me nsaala yanje nga kisu kisemeeye kya bubbani̱ baku̱tu̱mi̱ki̱i̱ye.
Oleke mikono yanje ni̱i̱mu̱ki̱i̱ye ewaawe ebe nga kihonguwa kya lwagholo.
3 Ai̱ Mukama, ololeelele kanu̱wa kanje
kandi olinde mi̱nu̱wa yanje.
4 Olinde mutima ghwanje kutabbala kintu kyona ki̱bhi̱i̱hi̱ye,
kedha kulungana na abakukolagha bintu bi̱bhi̱i̱hi̱ye.
Ontasi̱i̱mi̱lani̱ya kuliya haa byokuliya bya maghenu̱ ghaabo.
5 Bantu balungi bakugubha kunfubila kandi bantanuke bali na kisa.
Bhaatu tanku̱si̱i̱ma bantu babhi ku̱mpu̱ti̱ya,
nanga bwile bwona nkuukalagha ninsabila kubhi,
bantu abakukolagha bintu bi̱bhi̱i̱hi̱ye.
6 Obu bakama baabo balibagenga hansi ku̱lu̱gha hambali akangami̱ye,
niibuwo bantu balimanya ngoku ebi nku̱bu̱ghagha ghali majima.
7 Ngoku bakwati̱yagha nkui basiiyamu bihande-hande,
niikuwo balihanjaaga batiyo maku̱wa ghaabo haa mu̱nu̱wa ghwa kituulo.
8 Ai̱ Mukama Luhanga wanje, nuuwe nkuukalagha ndoli̱ye.
Nuuwe nkubbalagha kuba buulukilo bwanje,
gutu otasi̱i̱mi̱lani̱ya bantu babhi kunjita.
9 Onjune kati̱mba aka bantegheeye
kandi bi̱ki̱ya bya abakukolagha bintu bi̱bhi̱i̱hi̱ye.
10 Oleke bantu babhi aba bakwatuwe mu bi̱ti̱mba byabo,
bhaatu si̱ye nsaale kusemeeye.