142
Nsaala ya kusaba bu̱kooneli̱
Jabbu̱li̱ ya Dhau̱dhi̱ obu aabaagha ali mu ki̱i̱na kyʼebaale. Nsaala.
1 Nkubilikilagha Mukama nʼelaka lyamaani̱
kandi ni̱mwesengeleli̱ya kunkoonela.
2 Nkumuleetelagha ebintalibani̱i̱je byona
kandi nimughambila bijibu byanje.
3 Nkaakuhuwaaghamu maani̱,
okumanyagha ebi mbhonganuuwe kukola.
Mu kihanda hambali nkukwama,
babi̱si̱yemu ki̱ki̱ya bantegheeye.
4 Nkaakulolagha haakpengbu̱ yanje,
tankubonagha oghu akunkoonela,
kedha oghu anfu̱u̱yʼo.
5 Ai̱ Mukama nuuwe nkusabagha,
ningila nti, “Nuuwe buulukilo bwanje
kandi nuuwe wenkaha nkwete kubbala mu bwomi̱i̱li̱ buni.”
6 Otegheeleli̱ye kutakangana kwanje,
nanga ndi mu bwetaagho bwamaani̱.
Onjune ngi̱ghu̱ syanje,
nanga bansaai̱ye maani̱ kwonini.
7 Onjiye mu nkomo,
niikuwo nsinde li̱i̱na lyawe.
Bantu bahi̱ki̱li̱i̱ye baku̱neeli̱ghi̱i̱li̱li̱ya,
haabwa bilungi okunkolelagha.