143
Nsaala ya kusaba bu̱kooneli̱
Jabbu̱li̱ ya Dhau̱dhi̱.
1 Ai̱ Mukama, ooghu̱we kusaba kwanje.
Otegheeleli̱ye kwesengeleli̱ya kwanje haabwa bu̱kooneli̱.
Onkuukemu nanga oli mwesighibuwa
kandi ohi̱ki̱li̱i̱ye.
2 Otatwi̱la mu̱heeleli̱ya waawe musango,
nanga taaliyo muntu nʼomui mwomi̱i̱li̱ oghu ahi̱ki̱li̱i̱ye mu maaso ghaawe.
3 Ngi̱ghu̱ yanje ampu̱mi̱ye
kandi angenga hansi,
antaaye mu ki̱i̱kalo kiisuuyemu mweli̱ma.
Naafooka nga bantu abaaku̱u̱ye hambale.
4 Nahabweki maani̱ ghampooye kwonini
kandi noobahiiye kimui.
5 Nkuusukagha bilo bya hambele
kandi neeli̱li̱kanʼo bikoluwa byawe byamaani̱,
ebi okukolagha.
6 Nku̱u̱mu̱ki̱yagha mikono yanje ewaawe mu nsaala.
Mwoyo ghwanje ghuli na eliyo haabwawe
nga etaka lyomi̱ye.
7 Ai̱ Mukama, onkuukemu bwangu,
nanga kunihila kwona kwampooyemu.
Otaneebi̱si̱i̱li̱la,
niikuwo ntaba mu abakwete kughenda eku̱li̱mu̱.
8 Bu̱li̱ nkyambisi oleke niisukaghe kukunda kwawe kwamaani̱,
nanga nuuwe neesi̱ghi̱ye.
Onjegheesi̱ye kihanda kya kukwama,
nanga nuuwe nkuhaagha bwomi̱i̱li̱ bwanje.
9 Mukama, onjune ngi̱ghu̱ syanje,
nanga nkukwebingagha kuba buulukilo bwanje.
10 Onjegheesi̱ye kukola ebi obbali̱ye,
nanga nuuwe Luhanga wanje.
Oleke Mwoyo waawe mulungi ampikile,
ampi̱ki̱ye mu kihanda eki̱si̱mi̱ye.
11 Ai̱ Mukama, olinde bwomi̱i̱li̱ bwanje ngoku waalaghi̱i̱sani̱i̱ye.
Onjiye mu bijibu haabwa bu̱hi̱ki̱li̱i̱le bwawe!
12 Mu kukunda kwawe kwamaani̱ oote ngi̱ghu̱ syanje.
Ohwelekeeleli̱ye abakwete kumpighani̱ja,
nanga ndi mu̱heeleli̱ya waawe.