144
Ku̱si̱i̱ma Luhanga haabwa bu̱si̱ngu̱li̱
Jabbu̱li̱ ya Dhau̱dhi̱.
1 Mukama asi̱i̱mu̱we, oghu ali kikuka kyanje.
Niiye aku̱njegheesi̱yagha kulwana
kandi antendeka haa bulemo.
2 Niiye angiliiye kukunda kwamaani̱ kandi niiye kigho kyanje,
ngbaali yanje kandi mu̱cu̱ngu̱li̱ wanje.
Niiye ngabo yanje, oghu ali buulukilo bwanje
kandi aku̱si̱ngu̱lagha mahanga niikuwo ngaleme.
3 Ai̱ Mukama, muntu nkiki uwe kumufuwʼo
kandi mwana wa muntu uwe kumuloleelela?
4 Muntu ali nga lwoha kwonkaha,
bilo biye bili nga ki̱i̱lu̱ghu̱u̱li̱li̱ya kikusaala.
5 Ai̱ Mukama, ooghule eghulu kandi osu̱ndu̱ke hansi.
Oku̱me haa myena, niikuwo etuwemu mwi̱ka.
6 Otume nkubha ebbyoke kandi ehanjaage ngi̱ghu̱ syawe.
Obhasule bimala byawe kandi obahume.
7 Onanule mukono ghwawe ku̱lu̱gha eghulu.
Onkwate, onjiye mu maasi ghatobheeye
kandi mu mikono ya banamahanga.
8 Baku̱bu̱ghagha bisubha byonkaha.
Bakulahilagha bati niibuwo baabu̱gha majima,
kuni bakwete kuha bisubha.
9 Ai̱ Luhanga, nkukulimbila kilimbo kihyaka,
ninteela du̱ngu̱ ya mighuwo eku̱mi̱.
10 Nuuwe okulekagha bakama basi̱ngu̱la
kandi ojuna Dhau̱dhi̱ mu̱heeleli̱ya waawe.
11 Onjune ngi̱ghu̱ syanje abasaakaaye
kandi oncungule ku̱lu̱gha mu mikono ya banamahanga.
Baku̱bu̱ghagha bisubha byonkaha.
Bakulahilagha bati niibuwo baabu̱gha majima,
kuni bakwete kuha bisubha.
12 Oleke batabani̱ baatu mu buujongo bwabo,
bakule kulungi nga bilimuwa.
Oleke bahala baatu babe nga mpaghi sisemeeye,
esi bajombi̱ye ku̱kweli̱ya kikaali.
13 Oleke nguli syatu siisulemu
byokuliya bya bu̱li̱ mulingo.
Oleke bitunguwa byatu bi̱byale nku̱mi̱ na nku̱mi̱,
bi̱i̱su̱li̱ye mali̱i̱si̱li̱yo ghaatu.
14 Oleke nte syatu sibyalile kimui byana.
Atabʼo ngi̱ghu̱ syatu abakuhenda bigho byatu,
ku̱hu̱nga bantu kubatwala.
Atabʼo bantu abakuteela nduulu mbalila mu nguudhe syatu.
15 Bali na mu̱gi̱sa abakutungagha mi̱gi̱sa ngʼeghi.
Bali na mu̱gi̱sa aba Luhanga wabo ali Mukama.