145
Mukama abhonganuuwe kumusinda
Kilimbo kya kusinda. Jabbu̱li̱ ya Dhau̱dhi̱.
1 Ndakusindagha, uwe Luhanga wanje kandi mukama wanje,
ndaku̱si̱i̱magha bilo nʼebilo.
2 Ndaku̱si̱i̱magha bu̱li̱ kilo
kandi nkukusinda bilo nʼebilo.
3 Mukama ni mukulu kandi abhonganuuwe kumusinda kwonini.
Bukulu buwe busaalukaane ku̱bwetegheeleli̱ya.
4 Bu̱li̱ mujo ghulaghambilagha mujo ghunji ebi waakoli̱ye.
Balalangililagha bikoluwa byawe byamaani̱.
5 Ndeeli̱li̱kanaghʼo ki̱ti̱i̱ni̱sa kyawe kyamaani̱, na bukulu bwawe
kandi bikoluwa byawe byakuswekani̱ya.
6 Bantu balakabaagha mbabu̱ghʼo bikoluwa byawe byamaani̱,
nanje ndalangililagha bukulu bwawe.
7 Balabu̱ghaghʼo bulungi bwawe bwamaani̱
kandi balimbe badheedheeu̱we haa bu̱hi̱ki̱li̱i̱le bwawe.
8 Mukama ali na ngughuma kandi kisa,
taakusaaliluwagha bwangu-bwangu
kandi ali na kukunda kwamaani̱.
9 Mukama ni mulungi haa bantu boona.
Akughililagha kisa bihanguwa biye byona.
10 Ai̱ Mukama, bihanguwa byawe byona bi̱ku̱ku̱si̱i̱ma.
Bantu baawe boona bakukusinda.
11 Baku̱bu̱ghʼo ki̱ti̱i̱ni̱sa kya bukama bwawe
kandi baghambile banji haa maani̱ ghaawe.
12 Bantu boona bakumanya bikoluwa byamaani̱ okukolagha
kandi ki̱ti̱i̱ni̱sa kya bukama bwawe.
13 Bukama bwawe ni bukama obutaakuhuwʼo
kandi bu̱lemi̱ bwawe bu̱ku̱hi̱kʼo mijo yoona.
Mukama ni mwesighibuwa haa ebi aalaghi̱i̱sani̱i̱ye
kandi ali na kisa mu byona ebi akukolagha.
14 Mukama akukwatililagha abakubbala kwegenga
kandi aamu̱ki̱ya abeegengi̱ye hansi.
15 Bihanguwa byona nuuwe bikuukalagha bi̱loli̱ye
kandi okubihaagha byokuliya mu bwile busemeeye.
16 Okusambuulagha ngalo syawe
kandi oha bihanguwa byona byokuliya ngoku bikubbala.
17 Mukama ali na bwengani̱ja mu bihanda biye byona,
ali na kisa mu ebi akukolagha byona.
18 Mukama ali haai na abaku̱mu̱koobi̱yagha.
Abakumubikilagha mu majima.
19 Abamu̱hu̱ti̱i̱ye akubahaagha ebi bakubbala.
Aku̱u̱ghu̱wagha kutakangana kwabo kandi abajuna.
20 Mukama akulindagha boona abamu̱ku̱ndi̱ye,
bhaatu aku̱hwelekeeleli̱ya bantu babhi boona.
21 Kanu̱wa kanje kalaakalagha nkasinda Mukama
kandi bantu boona basi̱i̱me li̱i̱na liye li̱hi̱ki̱li̱i̱ye bilo nʼebilo.