147
Kusinda Luhanga wa Bu̱toki̱ Bwona
1 Musinde Mukama!
Nkilungi kulimba ntusinda Luhanga waatu.
Ali na ngughuma kandi ki̱hi̱ki̱ye kulimba ntumusinda.
2 Mukama niibuwo aakwela buhyaka Yelusaalemu.
Alimatodha ku̱ku̱u̱ki̱ya Banai̱saaleeli̱,
aba banamahanga baatwete mu mahanga ghanji.
3 Niiye aku̱ki̱li̱yagha abatuntuuye haa mitima
kandi aboha bbandai̱jo haa bibbodhe byabo.
4 Amani̱ye muhendo ghwa nsooli̱ya
kandi syona niiye akasiluka mali̱i̱na.
5 Mukama waatu ni mukulu munu kandi ali na bu̱toki̱ bwamaani̱.
Taaliyo oghu akugubha ku̱pi̱i̱ma kwetegheeleli̱ya kuwe.
6 Mukama aku̱u̱mu̱ki̱yagha abadhooti̱ye,
bhaatu akpeetaagila hansi bantu babhi.
7 Mulimbile Mukama bilimbo bya ku̱si̱i̱ma.
Muteele li̱kembe nimulimbila Luhanga waatu.
8 Niiye akwalagha bicu mu mwanya,
atooni̱ya mbu̱la hansi
kandi atwesi̱ya bi̱si̱ngo haa bwena.
9 Akuhaagha bisolo byokuliya
kandi byana bya binamungoogha bikaakutakanganagha,
abiha byokuliya.
10 Mukama taakudheedhuwagha haabwa maani̱ ghaa nkai̱na,
taakusemeleluwagha haabwa maghulu ghaa baasilikale baamaani̱.
11 Mukama akudheedhuwagha haabwa bantu abamu̱hu̱ti̱i̱ye.
Abataaye kunihila kwabo mu kukunda kuwe kwamaani̱.
12 Uwe Yelusaalemu, ohu̱ti̱ye Mukama.
Uwe Sayu̱u̱ni̱, osinde Luhanga waawe!
13 Niiye aku̱gu̱mi̱yagha geeti̱ syawe
kandi aha mu̱gi̱sa baana baawe.
14 Niiye akutaagha mpempa haa mitaano yaawe
kandi abaaku̱ti̱ya na ngano esemeleeye kimui.
15 Akulaghilagha nsi kya kukola
kandi ekola bwangu eki aabu̱ghi̱ye.
16 Niiye akwalagha bilika nga bbulangi̱ti̱ njelu
kandi aahanjaaga mbu̱la ya lubaale nga ki̱tu̱u̱tu̱.
17 Aku̱tooni̱yagha hansi mbu̱la ya lubaale nga buhande-hande bwa bubaale.
Ni ani̱ akugubha ku̱gu̱mi̱si̱li̱ja kuhola oku?
18 Niiye akulaghilagha bilika bihwelela,
mwegha ghutandika kuhunga kandi maasi ghasenda.
19 Luhanga akooleka kighambo kiye baasukulu baa Yakobbo.
Aaleka bantu baa I̱saaleeli̱ aba baamanya bilaghilo biye.
20 Eki taakikoleeye mahanga ghanji
kandi ebo tabamani̱ye bilaghilo biye.
Musinde Mukama!