148
Bihanguwa byona bisinde Mukama
1 Musinde Mukama!
Musinde Mukama ku̱lu̱gha mu eghulu.
Mumusinde ku̱lu̱gha mu mwanya hambali hakangami̱ye.
2 Enu̱we boona baamalai̱ka be mumusinde.
Mumusinde enu̱we boona mahe ghe aghali mu eghulu.
3 Enu̱we musana kandi kweli̱ mumusinde.
Enu̱we boona nsooli̱ya esikwete kwaka mumusinde.
4 Uwe eghulu elikangamiiye kimui omusinde.
Naanu maasi aghali eghulu ya mwanya mumusinde.
5 Oleke ebi byona bisinde li̱i̱na lya Mukama.
Akalaghila kandi byahanguwa.
6 Aabilaghila kuukala mu ki̱i̱kalo hambali bili bilo nʼebilo.
Kilaghilo kiye eki takikuhindukagha.
7 Musinde Mukama, enu̱we abali munsi,
bisolo ebili mu nanja
kandi kutobheela kwa maasi kwona.
8 Enu̱we mulilo, mbu̱la ya lubaale, bicu
kandi kyegha kyamaani̱ ebi̱ku̱hu̱ti̱yagha kilaghilo kiye, mumusinde.
9 Musinde Mukama, enu̱we myena kandi bwena bwona,
biti ebikwanaghʼo bi̱ghu̱ma kandi biti byona,
10 binyama bya mu kisaka kandi bisolo byona,
bisolo ebikwekululagha kandi noni̱.
11 Musinde Mukama, enu̱we bakama kandi bantu boona,
batabani̱ baa bakama kandi na balemi̱ banji boona.
12 Baana baabukali̱, batabhana
kandi bantu bakulu hamui na baana.
13 Oleke ebi byona bisinde li̱i̱na lya Mukama,
nanga li̱i̱na liye lisaaye bintu byona.
Ki̱ti̱i̱ni̱sa kiye kisaaye nsi kandi eghulu.
14 Niiye akafoola ehanga liye kuba lyamaani̱,
niikuwo bantu baa I̱saaleeli̱ abakumuukalagha haai, bamusinde.
Musinde Mukama!