20
Paulus ila ighita yes Masedonia ve yes Grika
1 Oroor tiina tonowen isob, ghoro Paulus ipoi yes to titaghon Yesu tinim tilup di, ve ipalot di pa savsaveeŋ pida. Le isob, ghoro ikis nimadi, ve imundig ila pa taan suruvu to Masedonia. 2 Ilaagh irau taan suruvu tonowen, ve ipapalot yes to titaghon Yesu, le ila ivot taan suruvu to yes Grika.* Taan suruvu to yes Grika, iza ite Akaia.
3 Ye ineep izi tonowe irau kaiyo tol le isob, ghoro igham ŋgar ighaze igham waaŋ, ve iraav ivool ila pa taan suruvu to Siria. Eemoghon titig taliŋa tighaze yes Yuda timbua saveeŋ pa rabuuŋi imaat. Tovenen itoor ŋgar toni, ve imuul ila pa Masedonia. 2Kor 11:26; 1Tes 2:15+
4 Tamtoghon pida to yesŋa Paulus tila, nene Pirus natu Sopater, ye to ndug Berea, Aristarkus ve Sekundus, yesuru to ndug Tesalonika, Gaius, ye to ndug Derbe, Timoti, ve Tikikus ve Tropimus, yesuru to taan suruvu to Asia. 5 Yes timuuŋ tila, ve tisaŋan ghei izi ndug Troas. 6 Yei pida nineep izi ndug Pilipai le sawa to lupuuŋ tiina to ghaniiŋ mberet to le yis maau ne isob. Ghoro nizila naari, ve niza waaŋ nila. Nineep te pogho irau mboŋ liim, ghoro nilooŋ izi ndug Troas, ve nindeeŋ nditamai liim ve ru tonowe. Yeiŋa nineep izi Troas irau mboŋ liim ve ru.
Paulus ipamundigin Yutikus pa mateeŋ
7-8 Wik tonenen, ndag to ivot muuŋ, yeiŋa nditamai to ndug Troas nilup ghei pa ghanghaniiŋ ve suŋuuŋ ilooŋ ila ruum eez lolo to ineep sala. Yes titun lam katindi, ve yesŋa Paulus tiwasavon di pa Maaron aliŋa ila le mboŋ anoŋa. Pasa, Paulus ighaze ndugizau, ghoro ipul di, ve ila.
9 Ŋgeu paghu eez inepneep toman di, iza Yutikus. Mbole izala marai saambu to ghamuuŋ yaghur, ve ighurghur taliŋa pa saveeŋ. Paulus ikis saveeŋ mala kat. Sawa to isavsaav, Yutikus igheen le lolo imaagh, ve itap pa muri. Itap ila ruum sosoor tol to sala we, le izila pumia ila taan. Tovenen rikia moghon tilaan tizila tighaze tighami. Tisuri iza, eemoghon maau. Imaat wa. 10 Tovenen Paulus izila taan, itugi izi, ve isavag Yutikus, ghoro isaav padi ighaze: “Lolomim ipataŋan malep. Ye mata imuul ve imundig wa.” 2King 4:32+; Mbaŋ 9:40
11 Paulus imuul izala pa ruum lolo to tinepneep pani ne, ve iteev mberet, ve yesŋa tighan. Isavsaav toman di le ndugizau, ghoro ipul di ve ila. Lu 22:19
12 Ve ŋgeu paghu to imaat ve imundig muul, nene tighami tila pa ruum toni toman lolodi poia kat.
Paulus ipul ndug Troas ve ila pa Miletus
13 Paulus ighaze ilaagh taan. Tovenen isaav payei ighaze niza waaŋ, ve nimuuŋ nila nisaŋani izi ndug Asos le inim ivot, ghoro yeiŋa niraav muul. Tauto yei niza waaŋ ve niraav, ve ye ilaagh taan. 14 Ila peria izi Asos, ghoro iza tiei, ve yeiŋa niraav nila nilooŋ izi ndug Mitilene. 15 Nivot muul nila, ve nighaughau mboŋ mboŋ le ndugizau, ghoro matamai ilooŋ pa mutu Kios ve malmalimai. Nighaughau mboŋ mboŋ le ndugizau muul, ghoro nivool nila mutu Samos. Nipot tonowe le ndugizau, ghoro malmalimai nila nilooŋ taan tiina, ve nipot izi ndug Miletus. 16 Paulus ipasul ighaze rikia ila ivot Yerusalem. Leso ighita lupuuŋ tiina to Pentekos izi tonowe. Tovenen lolo pa waaŋ ilooŋ ila ndug Epesus malep. Pasa, imatughez: Pale tikisi ineep mala muul izi taan suruvu to Asia.
Paulus ipalot yes ŋginiiŋa to Epesus
17 Tovenen Paulus ineep izi ndug Miletus, ve imbaaŋ ila pa lupuuŋ to Krisi to tineep izi Epesus ighaze ŋginiiŋa todi tinim toni. 18 Yes tila tivot toni, ve ye isaav padi ighaze: “Alooŋ. Ndag inim mata kat to you nanim navot taan suruvu to Asia, ve inim aazne, ŋgar to you naghamghami ila lolomim, yam aghita ve awatagi wa. 19 Sawa naol, lolog ipataŋan ve nataŋ. Pasa, sawa naol, yes Yuda tikalkaal ataam pa titatan ghou, ve tighurghur pataŋani naol tizaza tiou. Eemoghon you nayoon ariaŋa pa badooŋ pataŋani, ve nagham ŋgar pa izag maau, ve nambesmbees pa Tiina toit Yesu. 20 Ve yam awatag: Saveeŋ isob to irau iuul gham, tauto nasavia payam le isob. You namatughez maau, ve naŋgooz saveeŋ eta payam maau. Nasavsaav ghazooŋa payam ila ival tiina matadi, ve ila ruum tiam tiam paam. Mbo 40:10
21 Ve nasavsaav ariaŋa pa yes Yuda ve yes Grika paam naghaze tipul ŋgar todi samsamiadi, ve titoor ŋgar todi ila pa Maaron, ve tighur ila to Tiina toit Yesu. Lu 24:47
22 “Eemoghon aazne, Avuvu Patabuaŋ ipamundigin ghou ighaze you nala pa Yerusalem. Ve nakankaan: Pale sa mbeb ivot payou izi tonowe? 23 Eemoghon ndug tisob to nala padi, Avuvu Patabuaŋ isavsaav payou ighaze ruum to yabyabuuŋ toman pataŋani naol tisasaŋan ghou tonowe. Mbaŋ 9:16
24 Ve you naghita naghaze nepooŋ tiou to taan, nene mbeb tiina maau. Ighaze tirab ghou namaat, nene mbeb sorok. Eemoghon you irau nataghon katin ataam to Tiina toit Yesu Krisi ighuri payou le napasobi. Ve uraat to ye tau ighuri inim nimag ne paam, naghaze napasobi le isob kat. Uraat tovene: You irau nayoon ariaŋa ve napariaaŋ saveeŋ to varu poia. Leso tamtoghon tiwatag ataam to poia to Maaron izaza to iit tamtoghon samsamiaad. 2Kor 4:1; Ga 1:1; Pil 1:20; 2Tim 4:7; Syg 12:11
25 “Aghita. Muuŋ, you naneep ila lolomim, ve navovotia pooz to Maaron payam. Ve aazne, nawatag naghaze tiam eta irau ighita naghog muul maau. 26 Tovenen aazne, nasaav ghazooŋa payam tovene: Mboŋ Muri, ighaze tiam eta ilale, nene you sosor tiou maau. Ezek 3:17+; Mbaŋ 18:6
27 Pasa, you naroron payam maau, ve naŋgooz saveeŋ eta payam maau. Ŋgar to Maaron ighaze yam ataghoni, tauto nasavia payam le isob.
28 “Matamim imosmoos pa taumim, ve aŋgin poian Maaron sipsip toni tisob to Avuvu Patabuaŋ ighur gham anim ŋginiiŋ padi. Yam irau aŋgin poian lupuuŋ to Maaron. Pasa, siŋ to tau Natu imaliŋ padi, ve ye igham di tinim le wa. 1Tim 4:16; 1Pe 1:18+, 5:2+; Syg 5:9
29 You nawatag. Sawa to napul gham ve nala, nene pale ndiran kaaromŋa pida tinim toman gham sorok, ve tiwaghamun Maaron sipsip toni tinimale ŋgavuun sagsag. Mt 7:15; Yo 10:12; 2Pe 2:1
30 Ve yam taumim paam, tamtoghon tiam pida pale timundig, ve tighamun saveeŋ to Maaron. Leso tighereb yam to aazne ataghon Yesu ne, ve apul saveeŋ onoon ineeple, ve ataghon di pa ŋgar todi. 1Tim 1:3+,19+; 1Yo 2:19
31 Tovenen apatum gham padi. Matamim iŋgal ndaman tol to itiŋa tanepneep. Sawa tonenen, you napul gham pa savsaveeŋ maau. Mboŋ ve ndag, you napatoot gham asob. Lolog payam kat, tauto nasavsaav payam toman taŋiiz. Mk 13:37; 1Tes 2:11
32 “Aazne, naghur gham ala Maaron tau nima, ve nasaav payam naghaze: Matamim iŋgal Maaron aliŋa to isavia poia toni to izaza to iit tamtoghon samsamiaad. Pasa, saveeŋ tonowen irau ipalot gham, ve iseeŋ ŋgar tiam. Leso yamŋa ndiran toni patabuaŋa asob agham mbeb popoia tisob to Maaron ighaze igham di pait. Mbaŋ 14:23; Kol 1:12; 1Pe 1:4+
33 Sawa to itiŋa tanepneep, lolog igham pa silva, gol, ma nonogiiŋa to tamtoghon eta maau. 1Kor 9:15; 2Kor 2:17, 7:2; 1Tes 2:5
34 Ve taumim awatag: Taug nimag iyaryaaŋ pa uraat. Tauto nauul taug, ve nditag to tineep toman ghou ne paam. Mbaŋ 18:3; 1Kor 4:12; 2Kor 12:14+; 1Tes 2:9
35 Nagham tovene pa napatooŋ gham pa ataam to tagham uraat ariaŋa. Leso leed mbeb to tauul yes to tirau uraat maau. Iit irau mataad iŋgal Tiina toit Yesu aliŋa to isaav tovene: ‘Yes to matadi reiŋ mbeb, nene pale poia tiina to Maaron iza todi, ve lolodi poia ilib pa yes to tamtoghon tigham ledi mbeb.’ ” Ep 4:28; 1Tes 4:11+; 1Tim 6:18
36 Paulus isavsaav le isob, ghoro iput aghe izi taan, ve yesŋa tisuŋ. 37 Tisuŋ le isob, ghoro timundig tila tisavagi, ve yesŋa titaŋ tiina. 38 Pasa, aliŋa ris to ighaze yes irau tighita nagho muul maau, tauto igham di lolodi isami. Titaŋ le isob, ghoro tighami tila, leso tighuri iza waaŋ.