2
Taghur muriid pa Ulaaŋa toit Krisi malep
1 Tovenen Maaron aliŋa to talooŋa, iit irau mataad kisini ve tataghoni kat. Pa vene, tapul Maaron tanimale waaŋ to waŋaar igherebi ve imoghan ilale. 2 Aghita. Maaron aliŋa to muuŋ yes Israela tilooŋa ila yes aŋela avodi, nene onoon ve ineep tuŋia. Tamtoghon tisob to titaghoni maau ve timalaaŋ pani, Maaron ighurghur di maau. Yes tisob tigham atia deŋia itaghon sosor todi. 3 Ve uraat to Yesu ighami pa igham mulin ghiit, nene tiina le tiina kat. Tovenen ighaze lolood imaagh ve tapul ŋgar pani, pale tapaghau tauud pa Maaron mbalmbali toni vena? Maau. Hib 10:28+, 12:25
Uraat tonenen, Tiina toit Yesu ivotia muuŋ. Ghoro yes to tilooŋ saveeŋ ila toni, anadi tipalot saveeŋa pait. Mk 1:14+; Mbaŋ 1:8; 1Yo 1:1+
4 Ve Maaron ipariaaŋ saveeŋ tonenen paam. Pasa, irei uraat ve tapiri naol to Avuvu Patabuaŋ pa tamtoghon toni itaghon tau lolo. Ve ipalot di ve tigham uraat tintina ve mbeb gharatooŋadi naol naol to tipatooŋ di tighaze ye ineep toman di pa uraat todi. Mk 16:20+; Mbaŋ 14:3; 1Kor 12:4-11
Maaron itatan Yesu iza, ve muri ghoro igham iza ivot inim tiina muul
5 Sambam paghu ve taan paghu to nisavia ne, Maaron ighur yes aŋela pa tiŋgin di maau. 6 Pasa, Maaron aliŋa waaro eez to ŋgeu eez ivotia, isaav ighaze:* Saveeŋ to ineep ila rau to mbouŋ, isavia iit tamtoghon to taan. Eemoghon ŋgeu to imbood saveeŋ to Buk Hibru, ye igham ŋgar ighaze saveeŋ tonene deŋia kat pa Yesu. Pasa, ye iza tiina kat. Ilib pa yes aŋela. Eemoghon sawa to izi inim taan, ye itatan tau iza. Ve sawa to imuul iza ila pa sambam, ye igham iza tiina kat, ve Maaron ighur mbeb tisob tila nima, leso iŋgin di.
“Maaron, yei tamtoghon to taan ninim sa mbeb poia, to yom matam iŋgalŋgal ghei?
7 Yom ughur ghei ve ugham ghei nizi ris moghon pa yes aŋela.
Ve upait ghei, ve ugham izamai ivot inim tiina.
8 Ve ughur mbeb tisob tineep ila sambamai, leso niŋgin di.”
Sawa to Maaron ighur mbeb tineep ila iit tamtoghon sambaad, ye iŋguruut mbeb eta maau. Ighur mbeb tisob tineep ila sambaad. Onoon aazne, taghita anoŋa sone. Pasa, mbeb tisob tineep ila iit tamtoghon sambaad sone. Mt 28:18; 1Kor 15:25+; Ep 1:22
9 Eemoghon Yesu, ghoro iit taghita. Ye iparab ariaŋa le ilib. Tauto aazne, Maaron ipakuri, ve igham iza ivot inim tiina kat. Sawa tuku to Yesu ineep izi taan, Maaron itatan iza ve ighuri izi ris pa yes aŋela. Pasa, ye ighaze igham poian ghiit ve igham mulin ghiit pa mateeŋ. Tauto Yesu igham iit tasob inaad, ve igham yabyabuuŋ tiina, ve imaat. Pil 2:7+; 1Yo 2:2; Syg 5:9
Yesu irau iuul ghiit pasa, ye tamtoghon inimale iit
10 Maaron inim pughu pa mbeb to naol ne, ve ighur mbeb tisob tivot pa tau. Ye ighaze igham tamtoghon katindi tinim ndinatu, ve igham di tila tineep tomani ila ŋguruba lolo izi sambam. Tauto igham Natu Yesu iyamaan yabyabuuŋ tiina. Ŋgar toni tonene deŋia. Pasa, yabyabuuŋ to Yesu ighami, tauto ighami inim volaaŋa poia eez. Ye irau imuuŋ pa Maaron ndinatu, ve iparab padi, leso igham mulin di. Ro 11:36; Hib 5:8+
11 Yesu toman yes to ye igham di tinim tamtoghon patabuaŋa to Maaron, lupuuŋ todi ee moghon. Tauto maya pa iwaat di toŋvetaz toni maau. Mk 3:35; Hib 10:10
12 Aghita. Ye isaav pa Maaron ighaze:
“You pale navotia izam ve ŋgar tiom pa toŋvetaz tiou.
Ve ighaze tamtoghon tiom tilup di pa suŋuuŋ, you pale nala toman di, ve nambou pa napait izam.” Mbo 22:22
13 Ve ye isaav muul ighaze:
“You pale nanumeer Maaron.” Mbo 18:2
Ve isavia saveeŋ ite ighaze:
“Ughita. You taug tonene. Yeiŋa ndipain to Maaron igham di payou, tauto ninepneep.” Is 8:18; Yo 17:6,9+
14 Ndipain to ye isavia di, nene iit tamtoghon to taan to taghur ila toni. Tauto Yesu paam inim tamtoghon to taan raraate inimale iit, ve iyamaan pataŋani naol to taan ve imaat, leso ipasob Ŋgeu Samia tapiri. Pasa, ye to inim pughu pa mateeŋ ve iwaghamun tamtoghon. Mbnp 3:1+; Yo 1:14, 12:31; 2Tim 1:10
15 Sawa isob to taneep izi taan, iit tanim mbesooŋa pa mateeŋ. Pasa tamatughez pani, ve matughezaaŋ tonene ikis ghiit ariaŋa. Eemoghon mateeŋ to Yesu, nene ipas ghiit pa pataŋani tonene wa. 16 Iit tawatag: Yesu inim pa iuul yes aŋela maau. Ye inim pa iuul iit papaghu to Abaram. Ga 3:7,29
17 Pughu tonene to ye ighita ighaze ye izi inim taan ve inim tamtoghon raraate inimale iit toŋvetaz toni pa mbeb to naol ne, ghoro poia. Leso inim daba to watooŋrau to lolo isamin ghiit, ve igham poian uraat to Maaron ighuri ila nima, ve ireu sosor toit, ve itatan mbalmbali to Maaron. Pil 2:7; Hib 2:11, 3:1
18 Ye iyamaan tovaaŋ ve pataŋani naol to taan wa. Tauto ye iraua kat pa iuul yes to tovaaŋ igham di. Mt 4:1+; Hib 4:15
*2:6: Saveeŋ to ineep ila rau to mbouŋ, isavia iit tamtoghon to taan. Eemoghon ŋgeu to imbood saveeŋ to Buk Hibru, ye igham ŋgar ighaze saveeŋ tonene deŋia kat pa Yesu. Pasa, ye iza tiina kat. Ilib pa yes aŋela. Eemoghon sawa to izi inim taan, ye itatan tau iza. Ve sawa to imuul iza ila pa sambam, ye igham iza tiina kat, ve Maaron ighur mbeb tisob tila nima, leso iŋgin di.