20
Yesu imundig pa mateeŋ
(Mt 28:1-8; Mk 16:1-8; Lu 24:1-12)
1 Umbom patabuaŋ isob, ve ndag to ivot muuŋ pa wik tonenen, mboŋmaagh, ndoromromaaŋa, ve Maria to Magdala ila ighaze iŋgig naal to Yesu. Ila ivot yaam saambu to tighur Yesu paatu pani, ve ighita yaam tiina to ipoon naal avo, nene tipatambulini ighau wa. 2 Tovenen ilaan imuul ila to Simon Petrus ve taghoniiŋa to Yesu lolo pani kat, ve ipaes padi ighaze: “Paanu eta tipas Tiina toit paatu ivot pa naal, ve tighami tila wa! Ve yei nikankaan pani. Tighuri sine?”
3 Tovenen Petrus yesuru taghoniiŋa ite tonowen timundig tila pa naal. 4 Yesuru tilaan tila, ve taghoniiŋa ite tonenen ilaan rikia imuuŋ pa Petrus, le ila ivot naal avo muuŋ. 5 Ghoro itugi izi, ve iŋgig ilooŋ ila pa naal lolo, le ighita uli pida pida to tikau Yesu paatu pani, inepneep ila ina. Eemoghon ye ilooŋ ila naal lolo maau. 6 Mala maau, Simon Petrus ana inim peria, ve malmali ilooŋ ila naal lolo. Ye paam ighita uli pida pida to tikau Yesu paatu pani, tinepneep. 7 Ve ighita uli to tikau Yesu daba pani, nene ineep toman uli pida pida tonowen maau. Nene tipoola izi ineep saguan. 8 Ghoro taghoniiŋa ite to ila ivot naal avo muuŋ, ana itaghon Petrus ve ilooŋ ila. Ye ighita mbeb naol tonenen, ve ighur ila.
9 Onoon, Maaron aliŋa to timbooda, isaav tovene: Mesia pale imaat, ve imundig pa mateeŋ itaghon Maaron ŋgar toni. Eemoghon ŋgar todi ighazooŋ pa saveeŋ tonenen pughu sone. Mbo 16:10
10 Yesuru tighita mbeb tonenen le isob, ghoro tipul naal, ve timuul tila pa inadi to nepooŋ.
Yesu ivot pa Maria to Magdala
(Mt 28:9-10; Mk 16:9-11)
11 Maria to Magdala imuul ila ivot naal avo, ve iyondyood ve itaŋtaŋ. Ghoro itugi izi, ve iŋgig ilooŋ ila pa naal lolo, 12 le ighita aŋela ru tinepneep. Yesuru tindud di pa nonogiiŋa pisosooŋa, ve mboledi izi ndug to tighur Yesu paatu igheen pani. Eez ineep pa daba, ve ite ineep pa aghe.
13 Aŋela ru tonowen tighasoni tighaze: “Liva, yom utaŋtaŋ pasa?”
Ye ipamuul aliŋadi ighaze: “Wai, tigham Tiina tiou paatu ila wa. Ve you nakankaan pani. Tighuri sine?” 14 Ghoro indaleel, ve ighita Yesu tau iyondyood. Eemoghon ighilaala maau.
15 Yesu ighasoni ighaze: “Liva, utaŋ pasa? Ukaal sei?”
Maria ighaze pa ye uraata eta to iŋgin ndug tonowen. Tovenen isaav pani ighaze: “Olman, ighaze yom ugham Tiina tiou paatu ila ndug eta, ghoro upaes payou: Ughuri sine? Leso nala naghami.”
16 Tovenen Yesu isaav pani ighaze: “Maria.”
Ye isaav tovene, ghoro Maria ighilaala ighaze nene Yesu tau tonene. Tovenen indaleel, ve isaav pani ila saveeŋ Hibru ighaze: “Raboni!” Saveeŋ tonene, pughu tovene: ‘Patoŋaaŋ tiou.’ 17 Yesu isaav pani muul ighaze: “Usavag ghou malep. Pasa sawa to nazala to Tamaŋ, nene sone. Umuul ula to nditazig, ve upaes padi tovene: You pale namuul nazala to Tamaŋ. Ye, yam Tamamim paam. Ve ye Maaron tiou, ve Maaron tiam paam.” Hib 2:11+
18 Tovenen Maria to ndug Magdala ila ivot to yes taghoniiŋa, ve ipaes padi ighaze: “You naghita Tiina toit pa taug matag wa!” Ghoro ipaesia Yesu aliŋa padi ve tilooŋ.
Yesu ivot to taghoniiŋa toni
(Mt 28:16-20; Mk 16:14-18; Lu 24:36-49)
19 Sawa ee moghon tonenen, rabrab toni, yes taghoniiŋa to Yesu tilup di ilooŋ ila ruum eez lolo ve tipoon ataam le tuŋia kat. Pasa, timatughez pa yes Yuda. Mala maau ve, Yesu ivot iyoon ila lolodi, ve isaav padi ighaze: “Luuma to Maaron* Luuma to Maaron ilup mbeb naol. Yesu imbaad sosor toit atia wa, tovenen Maaron ate yabyab pait muul maau, ve itiŋa Maaron irau talup ghiit tanim ee moghon. Ve Maaron iŋgin ghiit ve mata pait, tovenen tamatughez muul maau, ve lolood ipataŋan muul maau. Lolood poia. Ve aazne, izaad pa ghamuuŋ nepooŋ poia ila to Maaron to iseeŋga itaghoni taghoni gha ila.
ineep toman gham.” 20 Ghoro ipatooŋ nima ve waria padi. Yes tighita Tiina todi, ve lolodi poia le poia kat.
21 Yesu isaav padi muul ighaze: “Luuma to Maaron ineep toman gham. Aazne, you nambaaŋ gham ala, inimale Tamaŋ imbaaŋ ghou nanim.” Mt 28:19
22 Ghoro ivib avuvu ila padi, ve isaav padi ighaze: “Agham Avuvu Patabuaŋ irau gham. 23 Ighaze yam apul sosor to tamtoghon eta, nene Maaron paam ireu sosor toni. Ve tamtoghon to ighaze apul sosor toni maau, nene Maaron paam, irau ireu sosor toni maau.”† Saveeŋ tonene, pughu tovene: Ighaze tamtoghon eta ighur ila to Krisi, nene pale Maaron ireu sosor toni. Tamtoghon tovene, iit irau tasaav pani taghaze: “Maaron ireu sosor tiom wa.” Ve ighaze tamtoghon eta ighur ila maau, nene ipatooŋa ighaze ye ineep ilooŋ ila pooz to Maaron sone. Tamtoghon tovene, iit irau tasaav ghazooŋa pani: Maaron ireu sosor toni sone. Mt 16:19+, 18:18
Yesu ivot to Tomas
(Mk 14:14)
24 Sawa to Yesu ivot to taghoniiŋa toni, tamtoghon todi eez, iza Tomas, ineep toman di maau. Tomas tonowen, iza ite Didimus. 25 Tovenen muri, ghoro tipaes pani tighaze: “Yei nighita Tiina toit wa!”
Eemoghon Tomas ipamuul aliŋadi ighaze: “Ah, ighaze taug matag naghita kiruuŋ inadi to tineep ila nima, ve nazeev nimag u itaghon kiruuŋ inadi tonowen, ve nazeev nimag ilooŋ ila iiz ina to waria, nene pale naghur ila. Ve ighaze maau, nene irau naghur ila saveeŋ tiam tonanan maau!”
26 Mboŋ liim ve ru inim ila, ghoro taghoniiŋa toni tilup di muul ilooŋ ila ruum to tinepneep pani ne. Sawa tonenen, Tomas ineep toman di paam. Yes tipoon ataam tisob tivool le tuŋia. Mala maau ve Yesu ivot iyoon ila lolodi, ve isaav padi ighaze: “Luuma to Maaron ineep toman gham.” 27 Ghoro isaav pa Tomas ighaze: “Unum ugharau, ve ughita nimag, uzeev nimam u itaghon kiruuŋ ina tonene, ve uzeev nimam ilooŋ ila iiz ina to ineep ila wariag ne. Yom lolom ru iraua! Ughur ila!”
28 Tomas isaav pani ighaze: “Yom Tiina tiou, ve Maaron tiou!”
29 Yesu isaav pani muul ighaze: “Yom ughita ghou pa taum matam, tauto ughur inim tiou. Ve yes to tighita ghou pa matadi maau, ve tighur inim tiou, nene pale poia to Maaron iza todi ve tinidi iza.” 2Kor 5:7; 1Pe 1:8
Rau tonene pughu
30 Yesu igham mbeb gharatooŋadi katindi ila taghoniiŋa toni matadi, leso ipatooŋ tau padi, ve tighilaal tighaze Maaron ineep tomani pa uraat toni. Eemoghon saveeŋa pida ineep ila rau tonene maau. Yo 21:25
31 Ve saveeŋ isob to ineep ila rau tonene, nene pa igham gham aghur ila to Yesu aghaze ye Mesia ve Maaron tau Natu. Leso ye ndamo payam, ve agham nepooŋ poia ila to Maaron. Ro 1:17; 1Yo 5:13
*20:19: Luuma to Maaron ilup mbeb naol. Yesu imbaad sosor toit atia wa, tovenen Maaron ate yabyab pait muul maau, ve itiŋa Maaron irau talup ghiit tanim ee moghon. Ve Maaron iŋgin ghiit ve mata pait, tovenen tamatughez muul maau, ve lolood ipataŋan muul maau. Lolood poia. Ve aazne, izaad pa ghamuuŋ nepooŋ poia ila to Maaron to iseeŋga itaghoni taghoni gha ila.
†20:23: Saveeŋ tonene, pughu tovene: Ighaze tamtoghon eta ighur ila to Krisi, nene pale Maaron ireu sosor toni. Tamtoghon tovene, iit irau tasaav pani taghaze: “Maaron ireu sosor tiom wa.” Ve ighaze tamtoghon eta ighur ila maau, nene ipatooŋa ighaze ye ineep ilooŋ ila pooz to Maaron sone. Tamtoghon tovene, iit irau tasaav ghazooŋa pani: Maaron ireu sosor toni sone.