Sepinien xa diamu te
2 Pita
?Visi iaxa tetis uvei ak?
Eloheoh Pita tetis uvei ak✡2Pit 1:1 sangas ni huram hanutap tol e lu e he sav mun AD (huram 67 tetutou ni poten na Iesu). Melele xa Pita tetis uvei nan xa tetiamu, huram tol (3) mei tetavi, di, tetis uvei ak sung.✡2Pit 3:1
?Visi iaxa tevuli uvei ak tetiamu?
Pita tetis uvei ak teha mi Kristin xil vus. E 1 Pita, xi tepet rat nenemien nae e tesel xat xil tengan lisoh ixeih ve longpangasien xil xa ti imei. E, e 2 Pita, xi tesel xat xil tengan lipus kil sexien tesa xil na titsa te luvosen xil.
?Pita tetis uvei ak veneh?
Pita ien tehei tengan Kristin xil lihur xat sepinien te reitinen usil Iesu Kristo - Pita tesel xat moletin xil na Hi tengan mei limatu kuhi e neketen nae✡2Pit 1:5-11 e melele xa di langgusil xat pispisien xil xa be reitin xa di nggusil naha xa di e Vanuvei Eo na Hi.✡2Pit 1:12-21
Pita ien tehei tengan vasel xat Kristin xil linahusil titsa te luvosen xil ti - Pita tehiteni xa hisit titsa te luvosen xil lateti nousav ngamu,✡2Pit 2:1-10 e holesok xil xa di lapispisi ni mi moletin xil tave reitin ti. Pita tesel xat xil tehit sexien tesa xil xa di lapispisi ni mi moletin xil di bar xat xil.✡2Pit 2:19 E melele xa Iesu itilomun en, mei ilepis rin na titsa xil ak e isa pangasien mi xil.✡2Pit 2:12
Pita ien tehei tengan vapet rat nenemien na Kristin xil xa mei rilomunen na Iesu Kristo be reitin - Vengan xa titsa te luvosen xil latehiteni xa Iesu natilomun ti mun,✡2Pit 3:4 Pita tesel xat Kristin xil tengan linamaen nenemien nae ti namot vengan xa Iesu Kristo imei rilomun reitin e melele xa Hi teling xati tengan istal en. Misak ni, xil linatemanin ni mei rilomunen nan ti naxoni moletin sav xil.✡2Pit 3:6-10
Pita ien tehei tengan vasel xat Kristin xil xa meulien nae imese tevi - Vengan xa titsa te luvosen xil di lapispisi mi Kristin xil labit momal tengan ti lihusil eheien te tenbexil,✡2Pit 2:13 Pita tesel xat moletin xil na Hi tengan lihusil sexien xil xa lakila labit momal tevi pe met Hi.✡2Pit 3:14-15
Nenemien tei xa eilep te uvei ak de 2 Pita 3:17
E xamim xa mube navan xil li, vengan xa mukil holesok xil xa di nabiteni xiak, mungguxou kuhi tengan moletin tesa xil linatel xamim ti ni pispisien xil xa tamal ti e linasak ni xamim ti munamot e neketen namim ra rute xa bos xa mudi en taxeak.
?Naha iaxa di e uvei ak?
1. Selxatien tengan Kristin xil mei limatu kuhi e neketen nae. (1:1-21)
2. Selxatien tengan Kristin xil ti linahusil pispisien xil ti na titsa te luvosen xil. (2:1-22)
3. Selxatien tengan Kristin xil ti lipol ni sexien xil xa momal e melele xa di ladatil mei rilomunen na Suv Iesu. (3:1-18)
1
Sepkilaen na Pita usil uvei ak
1 Inou nabe Saemon Pita, moletin te polien na Iesu Kristo e eloheoh tei nan.
Di nadis uvei ak bat mi xamim xa mutehur neketen hos xa bos pupu nggoni ngan xa xamem mangguri. Iesu Kristo tesa neketen ak mi xamim texo holesok xil xa xi tepol ni xa temal tevi. Xi iaxa be Hi nar e di miteh meulien e xir.
2 Nasis tengan eheien hos e tomat na Hi mei ipolu kuhi e meulien namim ixo naha xa mukila usil Hi e Iesu, Suv nar. ✡Siud 1:2
Hi di mikes moletin xil mei labe nan
3 Nggo xeihen na Hi, xi tesa holesok xil vus xa ti rihuri tengan riti e meulien xa xi ien bei e rihusil suse xa momal. Di misa ni mi xir melele xa rakil kuh xi, ngan xa tekes xir ve hosien e minehinen te xeihen nan. ✡1Pit 2:9 4 E nggo hosien e minehinen te xeihen nan, Hi di misa hitxatien tellep xil xa bos pupu mi xir.*Hitxatien hos xil na Hi labe holu pupu e rute xil labit itep iaxa Hi isa Ninin Eo nan mei ise xat moletin nan xil (Pol 2:14-41), itep iaxa mei rihe eo ixoni Hi (1Sion 3:2), itep iaxa Iesu imei rilomun en (2Pit 3:4), e itep iaxa rihur meulien sal e ut nesao (1Pit 1:4; 2Pit 3:13). Di misa ni mi xir tengan rikila rilesae ra sexien tesa xil te ut etan xa di purun moletin xil, e ripol ni sexien xil xa momal kuhi ixoni ngan xa Hi mun momal tevi.
5 Misak ni, vengan xa Hi tepol ni holesok xil ak, xamim musak ixeih tengan musuv xat neketen namim itel sexien hos xil. E musuv xat sexien hos namim itel kilakilen te reitinen na Hi. 6 E musuv xat kilakilen ak itel nenemien xa muxuxou kuhi ve sexien namim xil. E musuv xat nenemien ak itel nenemien xa tit mupol ixeih ha vuma … ituxoh hoxalit meulien namim. E musuv xat nenemien ak itel sexien xil xa imal ixoni sexien xil na Hi. ✡Kal 5:22-23 7 E musuv xat sexien xa momal ak itel vitueien hos. E musuv xat vitueien hos ak itel sexien te eheien. 8 E xosxa sexien xil ak ladi e meulien namim e di lamatu kuhi e xamim, ma kilakilen namim e Iesu Kristo, Suv nar, mei ihe mahulong mak mu. E ipisen ni xa kakaoen namim di nggusil neketen namim e meulien namim ihur huite ihe holu. 9 E xosxa moletin tei tapol ni ti sexien hos xil ak, ngan ak di pisen ni xa nenemien nan be tamure tang, misakras vanem vaha mu, e di ien bovorong ni xa Hi tekas moten ni tuei ra tesaen xa tepol ni.
10 Misak ni, tuxoli xil e neketen, musak pisi ixeih tengan mupol ni sexien xil ak tengan ipisen ni ihe reitin xa Hi tehosei xamim e tekes xamim mei mube nan. Xosxa kakaoen namim ihusil reitinen ak, ma musakras musavut e neketen namim. 11 Vengan, nggo rin ak, Hi di pol ni suse mei memese tevi tengan ihur pilei xamim mumei e ut xa Iesu Kristo, Suv nar xa teteh meulien e xir, be suv toto en vehakut xa vehakut tang.
12 Misak ni, neta sav xa xamim mukil holesok xil ak ngamu e di musoh nggeih e reitinen xa mungguri, nanemi nabit bos xa nitit ni ngan taxa ti nihithiteni mi xamim tengan iemim nabong ni ti. ✡Siud 1:5 13 Reitin, e melele xil vus xa nimeul nita, nanemi nabit momal tengan tit nihithiten holesok xil ak mi xamim vehakut. ✡2Kor 5:1; Sion 21:18-19 14 Vengan xa nakila xa nave nousav ti, nimat ixoni ngan xa Iesu Kristo, Suv nar, tehit lelen ni minou ngamu. 15 Misak ni, di nadis uvei ak bat mi xamim tengan nipol ni holesok xil xa nakila nipol ni tengan vatutou ni neketen namim. Imak, ma melele xa nimat, xamim mukila munem rilomun ni rin xil ak vehakut.
Eloheoh xil e provet xil tetiamu latehit rat reitinen usil Iesu Kristo
16 Di nadeli rilomun ni nenemien namim tengan mukila xa sepinien navan be reitin. Vengan melele xa xamem eloheoh xil na Iesu Kristo di masepin mi xamim usil xeihen e mei rilomunen na Iesu Kristo, Suv nar, matatumul ti usil tumulen xil xa moletin tei tang tepol ni tengan valihi nenemien na moletin sav xil vaxo en. E‑e, xamim matepus minehinen te xeihen nan ni metemem xati. 17-18 ✡Mat 17:1-5; Mak 9:2-7; Luk 9:28-35Reitin, xametel mateti tetel Iesu e vathu na Hi e melele xa Hi Tata tesa merereen e minehinen te xeihen mini. Xametel matelonge melele xa Hi te Xeihen tesep usili tehit, “Ngan ak be Natuxoli reitin xa eheien navan di en. Inou nabesi nou pupu ven.” Reitin mak, xametel vari mattelong rae nen ak xa texo ut nesao.
19 Mak iaxa, holesok xil vus xa xametel mattepusi e mattelonge di misak ni xir rakil kuhi xa sepinien xa provet xil tetiamu latehit lelen ni usil Mesaea be reitin tevi. Bos mak mu xa muhur kuh sepinien nae xil e ti mulong xati, vengan xa sepinien nae di mileluv xol holesok xil nggoni laet xa di mileluv kuhi e ut te maluxoluk. Mak, ma bos mak mu xa mupol itel laet te sepinien ak ituxol melengien hos xa Iesu imei rilomun en xa isak ni nenemien namim mei ileluv kuhi. Reitin, xi imei ixoni Melan, hitu te makoe xa di pisen ni xa ut da milan. 20 E ngan xa eilep mak mu tengan mukila xiak: sepinien xil vus xa Vanuvei Eo di bit lelen ni tenastal ti tenaxo nenemien na provet xil kestang. 21 Vengan xa hisit sepinien xa mak taxo moletin xil ti kestang. E be Hi iaxa di misepin nggo vulonge moletin xil e melele xa Ninin Eo di mise xat xil.✡2Tim 3:16; 1Pit 1:11
*1:4: Hitxatien hos xil na Hi labe holu pupu e rute xil labit itep iaxa Hi isa Ninin Eo nan mei ise xat moletin nan xil (Pol 2:14-41), itep iaxa mei rihe eo ixoni Hi (1Sion 3:2), itep iaxa Iesu imei rilomun en (2Pit 3:4), e itep iaxa rihur meulien sal e ut nesao (1Pit 1:4; 2Pit 3:13).
✡1:13: 2Kor 5:1; Sion 21:18-19
✡1:17-18: Mat 17:1-5; Mak 9:2-7; Luk 9:28-35