21
Iesu mei mistal mi rut moletin nan xil
1 E melengien sav tei, dutou ni holesok xil ak, Iesu mei mistal mi rut moletin nan xil e seri Oei Kaleli, xa lakesi mun ni Oei Taeberias. Ngan ak be tumulen usili xa tetep iaxa Iesu tepisen xi mi xil.
2 E melele nen ak, Saemon Pita, Tomas (ngan xa lakesi ni Meah), Nataniel (te metimal te hal Kena e provins te hal Kaleli), nat Sebede xalu, e moletin sav lu mun na Iesu ladi vituei e rute ak.✡Sion 11:16; 20:24 3 Saemon Pita biteni mi ngan tesav xil ak bit, “Nama naso net xiak.”
E xil labiteni mini labit, “Xamem mun muhusil xouk.” Ma, labe bot, e ba laso net e vongien ba vuma … ut milan, e latasar ti meseo tova.
4 Melele xa eai da mistal, Iesu bemei misoh e seri oei. E moletin nan xil latakil ti xa be Iesu iaxai.✡Luk 24:16; Sion 20:14 5 E xi mikei ba ni xil bit, “?Tiram maxoe xil, midep vari? ?Mutasar ti neta?”✡Luk 24:41
Lakei rilomun ni labit, “Tovuol vari.”
6 Ma, biteni mi xil bit, “Muso net namim ihe ri metu te bot. Imak, ma muhas ti xil.” Ma, laso net nae. E melele xa lalihi, lapusi xa lasakras lalihi rat net ak vengan xa labas pupu ni meseo xil.✡Luk 5:4-7
7 Moletin xa eheien na Iesu di en pus kila e biteni mi Pita bit, “!Be Suv iaxai!” Melele xa Pita milonge xa be Suv, mising rilomun ni eising nan xil (vengan tehur rat rut eising nan xil tengan vapol) e but be oei.✡Sion 13:23; 19:26; 20:2; 21:20 8 E moletin sav xil labalis labe ut. Xil lalihi net nae xa polu ni meseo xil. Xil di lalihi mak vengan xa latari ti vahe sotin ra ut, be mita hanutap lim tang (100 m).
9 Melele xa laduxoh ut, lapusi xa Iesu misupang ni sakol e di midin rut meseo xil del rut beret en. 10 Iesu biteni mi xil bit, “Muleh ti meseo xil xa mubasi iaxai vamei.” 11 Ma, Saemon Pita ba be bot, e milihi rat net xa polu ni meseo xil holu xa latellep. Melele xa labul xil vus, lakameti xa labas meseo handred tei, hanutap lu e tol e le tei mun (153). E tave ti neta xa labe holu mak, latatal papas net nae ti.✡Luk 5:6
12 Iesu biteni mi xil bit, “Mumei muanien.” Moletin nan xil ulixil mikan tengan lasisi xa xi be visi, vengan lakila ngamu be Suv. 13 Ma, Iesu be visal xil, nggur beret, e miseti mi xil. Di, pol ni mak mun del meseo.✡Mat 14:19; 15:36; Mak 6:41; 8:6; Luk 9:16; Sion 6:11
14 Ngan ak tehe vatol nen xa Iesu testal mi moletin nan xil tetutou ni melele xa temea rilomun ra maten.✡Sion 20:19,26
Iesu misel xat Pita e miling rilomun ni e polien nan
15 Melele xa langganien bus, Iesu misis Saemon Pita bit, “?Saemon, nat Sion, be reitin xa eheien nam di e nou mili moletin sav xil ak?”✡Mat 26:33; Mak 14:29
Pita bit rilomun ni bit, “Suv, okila xa be reitin xa ieok bei xouk nggoni ngan xa obe tua navan.”
Iesu biteni mini bit, “Uhangan sulut sipsip savan xil.”
16 Be valu nen, Iesu misisi bit, “?Saemon, nat Sion, be reitin xa eheien nam di e nou?”✡Pol 20:28; 1Pit 5:2
“Suv, okila xa ieok bei xouk nggoni ngan xa obe tua navan.”
Iesu biteni mini bit, “Ulaxat kuh sipsip savan xil.”
17 Di, be vatol nen, Iesu misisi mun bit, “?Saemon, nat Sion, be reitin xa iem bei nou nggoni ngan xa nabe tumali?”✡Sion 16:30
Pita milonge misa e tinen muis xa Iesu tesisi tehe vatol nen bit, “?Be reitin xa iem bei nou nggoni ngan xa nabe tumali?” Misak ni, Pita bit rilomun ni mini bit, “Suv, xouk okil holesok xil vus. Okila xa be reitin xa ieok bei xouk nggoni ngan xa obe tua navan.”
Iesu biteni mini bit, “Imak, ma uhangan sipsip savan xil. 18 E reitin li nabiteni minuk xa melele xa otehe tiram maxoe tamu, otevue xatuk e otekila otekakao oteha e rute xil vus xa iem tehei. E melele xa mei uhe momatu, utei momal ni hem e moletin sav ising xolok e itelak uhe rute tei xa iem ti navei tengan ova en.”✡2Pit 1:14 19 Iesu biteni mak tengan vahit lelen suse xa Pita ipet rat his Hi ixo maten nan.*Tumulen xil tetiamu latehiteni xa, huram 30 tetutou ni melele nen ak, mol‑Rom xil latetal xat Pita e latetela tengan ha liti xati ite eivave. E vengan xa Pita telonge texoni ngan xa tapin ti tengan imat ixo hisit sexien xa Suv nan temat en, tesis xil tengan lihilesi e melele xa liti xati e eivave, vatin ihe etan e len xalu ihe nesao. Ma, lateti xati temak. Ngan testal e huram 64 AD. ✡Sion 12:33; 18:32
Di, Iesu biteni mini bit, “Utit ni ngan taxa ti uhusil inou.”✡Mat 4:15; Luk 14:27; Sion 13:36
20 Pita biles, e pus moletin xa eheien na Iesu di en, ngan xa tetotan sangas visal Iesu melele xa di lateanien vituei e tesisi tehit, “?Suv, visi iaxa isa ratuk uhe he elu nam xil?”✡Sion 13:25 ✡Sion 13:23,25; 19:26; 20:2; 21:7 21 Melele xa Pita pusi, misis Iesu bit, “?Suv, itep mi moletin ak?”
22 Iesu bit rilomun ni bit, “Xosxa ieok bei tengan moletin ak imeul itat imak ituxoh melele xa nitilomun en, ngan ak tave ti tengan xouk okila. !E xouk, utit ni ngan taxa ti uhusil inou!”✡Mat 16:28 23 Ve sepinien ak, longeongen mikapis xa moletin ak namat ti. E Iesu tenaviteni ti xa xi namat. Tehiteni tang tehit, “Xosxa ieok ihei tengan imeul itat imak ituxoh melele xa nitilomun en, ngan ak tave ti tengan xouk okila.”
Sepinien kor
24 Inou vari iaxa nabe moletin xa Iesu di tesep usili xiak, hisok Sion. Inou natesep usil holesok xil ak e natetis xati, e nakila xa holesok xil vus xa di natesep usili be reitin.✡Sion 19:35
25 Iesu tepol ni holesok xil holu mak mu mili naha xa natetis xati. Xosxa latis xat holesok xil vus xa xi tepol ni vati e vanuvei xil, ma nanemi nabit ut tapin ti e ut xil vus te ut etan tengan laling xil en.✡Sion 20:30
✡21:7: Sion 13:23; 19:26; 20:2; 21:20
✡21:13: Mat 14:19; 15:36; Mak 6:41; 8:6; Luk 9:16; Sion 6:11
*21:19: Tumulen xil tetiamu latehiteni xa, huram 30 tetutou ni melele nen ak, mol‑Rom xil latetal xat Pita e latetela tengan ha liti xati ite eivave. E vengan xa Pita telonge texoni ngan xa tapin ti tengan imat ixo hisit sexien xa Suv nan temat en, tesis xil tengan lihilesi e melele xa liti xati e eivave, vatin ihe etan e len xalu ihe nesao. Ma, lateti xati temak. Ngan testal e huram 64 AD.
✡21:19: Mat 4:15; Luk 14:27; Sion 13:36
✡21:20: Sion 13:23,25; 19:26; 20:2; 21:7