1 E makoe roroh e Sande, ut talan ti mu, Meri te hal Makdela ba misao ni vangihat te tehinen na Iesu. E melele xa ba duxoli, mikameti xa hat xa eilep xa tetakoe xol puiteh teni, ladivin rati ngamu be relingi.✡Mat 28:1-8; Mak 16:1-10; Luk 24:1-12 2 Ma, miloh be visal Saemon Pita del ngan xa eheien na Iesu da en, e biteni mi xalu bit, “!Latepo rat Suv ra vangihat te tehinen! !E xamem matakil ti rute xave xa latelingi teti en!”✡Sion 13:23; 19:26; 21:7,20; 20:13

3 Melele xa lulonge mak, Pita del moletin sav na Iesu lube vangihat. 4 Xalu vus luloh, e ngan tesav miloh ba mili Pita e duxoh vangihat diamu ni. 5 Xi tava ti vangite, e mitei hiraen be vangite e pus kaliko te mieh xa latepis xol Iesu ni da. 6 E melele xa Saemon Pita xa di tetutou ni bemei, vatei takes, xi mika sal be vangit vangihat. Xi mun pus kaliko te mieh xa latepis xol Iesu ni da. 7 E xi pusi mun xa kaliko te mieh sav xa latepis xol vat Iesu ni tara ti vatel kaliko sav xil. Latepis xol kuhi da nga tasen e rin sav.✡Sion 11:44 8 Di, ngan tesav xa tetuxoh vangihat tetiamu, xi mun be vangite. E melele xa pus holesok xil ak, xi mike reitin e Iesu. 9 Vengan, duxoh melele nen ak, lutnakil kuh ti mu xa Vanuvei Eo tehit lelen ni xa xi imea rilomun ra maten.✡Sam 16:9-10; Aes 53:11-12; Hos 6:2; Siona 1:17; Luk 24:26-27; Pol 2:27,31; 1Kor 15:4 10 Di, rumali ludilomun lube tim.

11 Melele xa moletin na Iesu xalu luba, Meri dit misoh e hale te vangihat e di muis. E melele xa di muis mak, mitei hiraen tengan vaketeh vahe vangit vangihat. 12 E mitemanin melele xa pus masxaxa lu xa lusing ni eising te mieh. Ludotan ludi rute xa, tetiamu, tiei na Iesu teta en. Tei de von vatin e tei de von kaelen xalu. 13 Xalu lusisi lubit, “?Atou, veneh ma di omuis?”✡Sion 20:2

Meri bit rilomun ni bit, “Latepo rat Suv navan ra rute ak e natakil ti xa latelingi da xave.”

14 Melele xa bit ngan ak bus, biles e pus Iesu misoh sangas visali. E Meri takil ti xa ngan ak be Iesu vari.✡Luk 24:16; Sion 21:4 15 E Iesu misisi bit, “?Atou, veneh ma di omuis? ?Di olang ves visi?”

Meri minemi bit xi be ngan xa di milaxat urvatiei ak. Ma, biteni mini bit, “O suv, xosxa xouk iaxa otepo rati be rute sav, uhit rati li rute xave xa otelingi teta en tengan niha nipoe.”

16 E Iesu mikesi bit, “Meri.”

Melele xa milong raen, Meri biles pus kila e biteni mini bit, “!Raboni!” Koute te sepinien ak be ‘Titsa’ e sepinien Hibru.

17 Iesu biteni mini bit, “Onasak ni ti tengan otal xat nou vamak vengan xa natava ti mu visal Tata navan. E xouk uha upus tua navan xil e uhit mesen ni mi xil xa, nave nousav ti, ha nite visal Tata navan xa be Tata nae, ngan xa be Hi navan e be Hi nae mun.”✡Rom 8:29; Hib 2:11-12

18 Ma, Meri te hal Makdela dilomun e ba biteni mi moletin na Iesu xil bit, “!Inou napus Suv!” E bit mesen naha xa xi tehiteni mini.

19 E Sande vongien, moletin xil na Iesu ladi vituei e nim tei e lalok xol puiteh xil teni vengan ulixil mikan xa vat xil na Siu xil linamei linatal xat xil. Di, latemanin xa Iesu vari mei mistal mi xil e misoh de hilaep te xil. E biteni mi xil bit, “Tomat iti mi xamim.”✡Sion 20:1; Pol 20:7; Sion 20:26; 7:13; 9:22; 19:38 20 Melele xa biteni mak, pisen hen xalu e valxoun mi xil. Misak ni, moletin nan xil lapus kila xa Suv nae meul reitin, e labesi xil pupu ven.✡Sion 19:34; 20:25,27; 16:20,22 21 Di, Iesu biteni mun mi xil bit, “Tomat iti mi xamim. Nggoni ngan xa Tata navan tesil inou, inou di nasil xamim.”✡Sion 17:18 22 E melele xa biteni mak, buhi xil e biteni bit, “Ninin Eo mei ise xat xamim. 23 Xosxa muketeh ihos iha mi moletin sav xil xa latepol tesa, ma Hi mun iketeh ihos iha mi xil. E xosxa munaketeh ti navos mi xil, ma Tata namim mun naketeh ti navos mi xil.”✡Mat 16:19; 18:18

24 Melele xa Iesu mei mistal mi moletin nan xil, tei e xil tenara ti, hisen Tomas xa lakesi mun ni Meah.✡Sion 11:16; 21:2 25 Ma, melele xa bemei visal moletin sav xil na Iesu, labiteni mini labit, “!Xamem matepus Suv!”✡Sion 19:34; 20:20

E Tomas biteni mi xil bit, “Ninake reitin ti mu en ituxoh melele xa nipus von xoxo vari e kaehen xalu, nisingin vakuheok ihe von xoxo xalu ak, e niling heok ihe rute xa latesal valxoun en.”

26 Wik tei mei mitavi, e moletin xil na Iesu ladi vituei vatei mun e nim ak. E melele nen ak Tomas tehe xil lateti. Tave ti neta xa lalok xol puiteh xil, latemanin xa Iesu mei mistal mi xil, e misoh de hilaep te xil e biteni bit, “Tomat iti mi xamim.”✡Sion 20:19 27 Di, biteni mi Tomas bit, “Amei visal nou. Usingin vakuhem vahe inggak, e upus ti heok xalu. Utei momal ni hem e ulingi ite valxouk. Nenemien nam nave lu ti mun usil nou, e mei uke reitin e nou.”✡Sion 19:34; 20:20,25

28 E Tomas bit rilomun ni bit, “!Xouk obe Suv navan! !Xouk iaxa obe Hi navan!”

29 Iesu biteni mini bit, “Xouk oneket e nou vengan xa opus nou. E tuxolxatien iti e meulien na ngan xil xa di lake reitin e nou, tave ti neta xa latapus ti nou.”✡1Pit 1:8

30 E meulien nan, Iesu tepol ni merekel sav xil holu mun pe met moletin nan xil xa natnatis xati ti vati e vanuvei ak.✡Sion 21:25 31 E natetis holesok xil ak tengan vasak ni moletin xil mei lake reitin xa Iesu be Mesaea, Nat Hi. E xamim mukil kuhi xa ngan xil xa lake reitin en, xil lihur meulien sal ixo hisen.✡Sion 3:15; 1Sion 5:13