Муқеддес Калам (кирил йезиқ) Аюп 20

Зофарму яманларниң ақивити үстидә сөз қилиду

1 Андин Нааматлиқ Зофар җававән мундақ деди: —

2 «Мени беарам қилған хияллар җавап беришкә үндәватиду,

Чүнки қәлбим беарамлиқта өртәнмәктә. ◼

3 Мән маңа һақарәт кәлтүрүп, мени әйипләйдиған сөзләрни аңлидим,

Шуңа мениң роһ-зеһним мени җавап беришкә қистиди.

4 Сән шуни билмәмсәнки,

Йәр йүзидә Адәм атимиз апиридә болғандин бери,

5 Рәзилләрниң ғалипә тәнтәниси қисқидур,

Ипласларниң хошаллиғи бирдәмликтур. ◘

6 Ундақ кишиниң шан-шәриви асманға йәткән болсиму,

Беши булутларға тақашсиму,

7 Йәнила өзиниң поқидәк йоқап кетиду;

Уни көргәнләр: «У нәдидур?» дәйду.

8 У чүштәк учуп кетиду,

Қайта тапқили болмайду;

Кечидики ғайипанә аламәттәк у һайдиветилиду.

9 Уни көргән көз иккинчи уни көрмәйду,

Униң турған җайи уни қайта учратмайду.

10 Униң оғуллири мискинләргә шәпқәт қилишқа мәҗбурлиниду;

Шуниңдәк у һәтта өз қоли билән байлиқлирини қайтуруп бериду.

11 Униң устиханлири яшлиқ мағдуриға толған болсиму,

Бирақ униң мағдури униң билән биллә топа-чаңда йетип қалиду.

12 Гәрчә рәзиллик униң ағзида татлиқ тетиған болсиму,

У уни тил астиға йошурған болсиму,

13 У уни жутқуси кәлмәй меһрини үзәлмисиму,

У уни ағзида қалдурсиму, ◼

14 Бирақ униң қарнидики тамиғи өзгирип,

Кобра иланниң зәһиригә айлиниду.

15 У байлиқларни жутуветиду, бирақ уларни яндуриду;

Худа уларни ашқазинидин чиқириветиду.

16 У кобра иланниң зәһирини шорайду,

Чар иланниң нәштири уни өлтүриду.

17 У қайтидин ериқ-өстәңләргә һәвәс билән қаралмайду,

Бал вә сериқ май билән ақидиған дәриялардин һозурлиналмайду.

18 У еришкәнни жуталмай қайтуриду,

Тиҗарәт қилған пайдисидин у һеч һозурлиналмайду.

19 Чүнки у мискинләрни езип, уларни ташливәткән;

У өзи салмиған өйни егиливалған.

20 У ачкөзлүктин әсла зерикмәйду,

У арзулиған нәрсилиридин һеч қайсисини сақлап қалалмайду. ◼

21 Униңға жутувалғидәк һеч нәрсә қалмайду,

Шуңа униң баяшатлиғи мәңгүлүк болмайду.

22 Униң тоққузи тәл болғанда, туюқсиз қисилчилиққа учрайду;

Һәр бир езилгүчиниң қоли униңға қарши чиқиду.

23 У қосиғини тойғузуватқинида,

Худа дәһшәтлик ғәзивини униңға чүшүриду;

У ғизалиниватқанда ғәзивини униң үстигә яғдуриду.

24 У төмүр қуралдин қечип қутулсиму,

Бирақ мис оқя уни санҗийду.

25 Тәккән оқ кәйнидин тартип чиқиривелгинидә,

Ялтирақ оқ учи өттин чиқиривелгинидә,

Вәһимиләр уни басиду. ◼

26 Зулмәт қараңғулуқ униң байлиқлирини жутуветишкә тәйяр туриду,

Инсан пүвлимигән от уни жутувалиду,

Униң чедирида қелип қалғанлириниму жутуветиду. ◼

27 Асманлар униң қәбиһлигини ашкарилайду;

Йәр-зиминму униңға қарши қозғилиду.

28 Униң мал-дунияси елип кетилиду,

Худаниң ғәзәплик күнидә кәлкүн улғийип өй-бисатини ғулитиду. ◼

29 Худаниң рәзил адәмгә бәлгүлигән несивиси мана шундақтур,

Бу Худа униңға бекиткән мирастур». ◼

◼20:2 «Мени беарам қилған хияллар җавап беришкә үндәватиду, чүнки қәлбим беарамлиқта өртәнмәктә» — Зофарниң бир ишларға бәкму җиддийлишип кетидиған характери бу сөзлиридин чиқип туриду.

◘20:5 Зәб. 36:35,36

◼20:13 «У уни жутқуси кәлмәй меһрини үзәлмисиму,...» — ибраний тилида «уни аяп меһрини үзәлмисиму». Демәк, ағзида қалдурувәрмәкчи болиду. «У уни , йәни рәзилликни ағзида қалдурсиму...» — Зофарниң бу баяни интайин зәһәрхәндиликкә толған болуп, бу сөзләр шүбһисизки, Аюпни беваситә әйипләш үчүн қаритилиду; у: «рәзиллик ағзида татлиқ тетиған» вә «уни тил астиға йошурған», һәм 20-айәттики «Мискинләрни езип, уларни ташливәткән», «өзи салмиған бир өйни өзи егиливалған» дәп тәсвирлигән киши дәл Аюптин башқа киши әмәс еди.

◼20:20 «У ачкөзлүктин әсла зерикмәйду» — ибраний тилида: «Униң ашқазини һеч хатирҗәмликни билмәйду». Оқурмәнләр 22-24-айәтләрниң башқа хил тәрҗимилирини учритиши мүмкин.

◼20:25 «Ялтирақ оқ учи өттин чиқиривелгинидә, вәһимиләр уни басиду» — Зофар яман адәмләрниң кәлгүсидики азаплиридин бәк һозурлинидиғандәк қилатти.

◼20:26 «Инсан пүвлимигән от» — Худаниң Өзиниң отини көрсәтсә керәк.

◼20:28 «Униң мал-дунияси елип кетилиду» — яки «Кәлкүн өйини еқитип кетиду».

◼20:29 «Худаниң рәзил адәмгә бәлгүлигән несивиси мана шундақтур, бу Худа униңға бекиткән мирастур» — Зофарниң баянлири җәмләштүрүлгинидә, у дегән «рәзил адәм» әмәлийәттә төрт-бәш пүтүнләй башқа-башқа йол билән өлгән!