Muqeddes Kalam (latin yéziq) Amos 1

Amos

Amos peyghemberning béxaretliri

1 Uzziya Yehudagha, Yoashning oghli Yeroboam Israilgha padishah bolghan waqitlarda, yer tewreshtin ikki yil ilgiri, Tekoadiki charwichilar arisidiki Amosning Israil toghruluq éytqan sözliri: — ◼ ◘

2 U: «Perwerdigar Zion téghidin hörkireydu,

Yérusalémdin awazini qoyuwétidu;

Padichilarning otlaqliri matem tutidu,

Karmel choqqisi ghazanglishidu» — dédi. ◼ ◘

Xudaning Israilgha qoshna qowmlar üstidin hökümi •••• Suriye heqqide

3 Perwerdigar mundaq deydu: —

«Demeshqning üch gunahi, berheq töt gunahi üchün, uninggha chüshidighan jazani yandurmaymen,

Chünki ular Giléadtikilerni tömür tirniliq söremler bilen soqqanidi; ◼

4 Shundaqla Hazaelning öyige bir ot ewetimen,

U Ben-Hadadning ordilirini yutuwalidu. ◼

5 Demeshq derwazisidiki tömür baldaqni sunduruwétimen,

Awen jilghisida turghuchini, Beyt-Édende shahane hasisini tutquchini üzüp tashlaymen;

Suriyening xelqi esirge chüshüp kirgha élip kétilidu, — deydu Perwerdigar. ◼ ◘

Filistiye heqqide

6 Perwerdigar mundaq deydu: —

«Gaza shehirining üch gunahi, berheq töt gunahi üchün, uninggha chüshidighan jazani yandurmaymen,

Chünki ular Édomgha tapshurup bérishke, barliq tutqunlarni esir qilip élip ketti. ◼ ◘

7 Hem Men Gazaning sépiligha ot ewetimen,

U uning ordilirini yutuwalidu;

8 Men Ashdodta turghuchini, Ashkélonda shahane hasini tutquchini üzüp tashlaymen,

Ekron shehirige qarshi qol kötürimen;

Filistiylerning qalduqi yoqilidu, — deydu Reb Perwerdigar.

Tur shehiri heqqide

9 Perwerdigar mundaq deydu: —

«Turning üch gunahi, berheq töt gunahi üchün, uninggha chüshidighan jazani yandurmaymen,

Chünki ular barliq tutqunlarni Édomgha tapshuruwetti,

Shundaqla qérindashliq ehdisini ésige almidi. ◼

10 Hem Men Turning sépiligha ot ewetimen,

Ot uning ordilirini yutuwalidu.

Édom heqqide

11 Perwerdigar mundaq deydu: —

«Édomning üch gunahi, berheq töt gunahi üchün, uninggha chüshidighan jazani yandurmaymen,

Chünki u barliq rehim-shepqetni tashliwétip,

Qilich bilen öz qérindishini qoghlighan;

U yirilghudek ghezepte bolup,

Derghezepte bolghan halitini hemishe saqlaydu; ◼

12 Hem Men Téman shehirige ot ewetimen,

Ot Bozrahning ordilirini yutuwalidu».

Ammoniylar heqqide

13 Perwerdigar mundaq deydu: —

«Ammonning üch gunahi, berheq töt gunahi üchün, uninggha chüshidighan jazani yandurmaymen,

Chünki ular chégrimizni kéngeytimiz dep, Giléadtiki hamilidar ayallarning qorsaqlirini yériwetti. ◼

14 Hem Men Rabbahning sépiligha ot yaqimen,

Jeng künide qiya-chiyalar ichide,

Qara quyunning künide qattiq boran ichide,

Ot uning ordilirini yutuwalidu; ◘

15 Hem ularning padishahi esirge chüshidu,

— U emirliri bilen bille esirge chüshidu, — deydu Perwerdigar.

Amos
<
1
>

◼1:1 «Amosning Israil toghruluq éytqan sözliri» — adette bu kitabta «Israil» Israilning «shimaliy padishahliqi»ni körsitidu. Amos Yehudaning Tekoa yézisidin bolghini bilen yetküzidighan bésharetlirining köpinchisi «shimaliy padishahliq» toghruluqtur.

◘1:1 Zek. 14:5

◼1:2 «Perwerdigar Zion téghidin hörkireydu, Yérusalémdin awazini qoyuwétidu» — bu bésharet yer tewreshni körsetse kérek. «Karmel» bolsa Israilda höl-yéghin eng köp bolidighan jay; u «ghazanglashqan» bolsa, bashqa jaylar téximu shundaq bolatti.

◘1:2 Yer. 25:30; Yo. 3:16

◼1:3 «ular (Suriyelikler) Giléadtikilerni tömür tirniliq söremler bilen soqqanidi» — «2Pad.» 10:32-33, 13:3-5-ayette Giléadtikilerning Suriye teripidin tartqan azab-oqubetliri xatirilen’gen; mushu ayette tilgha élin’ghini shu bozek qilinishni körsetse kérek.

◼1:4 «Hazael» — Demeshq padishahi bolup, «Ben-Hadad» uning oghli idi.

◼1:5 «Awen jilghisida turghuchi» — bashqa birhil terjimisi «Rezillik jilghisida turghuchi» — démek, yeni Demeshqning padishahini ipadileydu. «Suriyening xelqi esirge chüshüp kirgha élip kétilidu» — «Kir» Mésopotamiye (hazirqi iraq)diki bir yurt. Suriyelikler eslide shu jaydin chiqqanidi (9:7-ayetni körüng).

◘1:5 2Pad. 16:9; Yesh. 17:1-11; Yer. 49:23-27

◼1:6 «Chünki ular Édomgha tapshurup bérishke, barliq tutqunlarni esir qilip élip ketti» — «tutqunlar» Israildin yaki Yehudadin tutqun qilin’ghan bir türküm kishiler bolsa kérek. Qarighanda Gazaning (yeni Filistiylerning) meqsiti Israillardin öch élish idi.

◘1:6 2Tar. 21:16, 17; 28:18

◼1:9 «Chünki ular barliq tutqunlarni Édomgha tapshuruwetti, shundaqla qérindashliq ehdisini ésige almidi» — bu «tutqunlar» belkim yene Israildin kelgen bolushi mumkin. «Ehde» — Sulayman padishah esli Turning padishahi bilen ehde tüzgenidi. Biraq tutqunlarning nedin kélishi, Turning kim bilen ehde tüzgenliki anche muhim emes; muhimi, Xuda ularni wediside turmasliqtek wijdansizliqi üchün jazalaydu.

◼1:11 «U yirilghudek ghezepte bolup,...» — bashqa birxil terjimisi: «U ghezep bilen hemishe ademlerni yirtiwétip,...».

◼1:13 «Chünki u chégrimizni kéngeytimiz dep, Giléadtiki hamilidar ayallarning qorsaqlirini yériwetti» — ular Giléadta turuwatqan bashqilarnimu öltürgen, elwette. Biraq ularning bu ajayib rehimsizlikning meqsiti, ulargha qayturma zerbe bergüdek héch adem, hetta bowaqlarningmu qalmasliqi üchün idi. Babilning padishahi Néboqadnesar miladiyedin ilgiriki 582-yili Rabbah shehirini weyran qiliwetti.

◘1:14 Җер. 40:14, 48:7; Ez.25:2-5