9
9-küy •••• Xuda Öz sheripi hem adalitini körsetkey!
1 Neghmichilerning béshigha tapshurulup, «Mut-Labben» dégen ahangda oqulsun dep, Dawut yazghan küy: —
Men Sen Perwerdigarni pütün qelbim bilen medhiyeleymen;
Men Séning qilghan barliq karametliringni bayan qilay;□««Mut-Labben» dégen ahangda oqulsun dep» — «Mut-Labben» belkim «oghulning ölümi» dégen menide.
2 Men Sendin xushal bolup shadlinimen;
Séning namingni naxsha qilip éytimen, i Hemmidin Aliy!
3 Méning düshmenlirimning keynige yénishliri bolsa,
Del ularning séning didaring aldida yiqilip, yoqilishidin ibaret bolidu.
4 Chünki Sen méning heqqim hem dewayimni soriding;
Sen textke olturup, heqqaniylarche sotliding.
5 Sen ellerge tenbih bérip, rezillerni halak qilding;
Sen ularning namini menggüge öchürüwetkensen.
6 I düshminim! Halaketliring menggülük boldi!
Sen sheherlirini yulup tashliwetting,
Hetta ularning namlirimu yoqap ketti;
7 Biraq Perwerdigar menggüge olturup höküm süridu;
U Öz textini sot qilishqa teyyarlap békitken;
8 Alemni heqqaniyliq bilen sot qilghuchi Udur;
Xelqlerning üstidin U adilliq bilen höküm chiqiridu;■Zeb. 96:13; 98:9
9 Hem U Perwerdigar ézilgüchilerge égiz panah,
Shundaqla azabliq künlerde égiz panahdur.■Zeb. 37:39; 46:1-3; 91:1-2
10 Namingni bilgenler bolsa Sanga tayinidu;
Chünki Sen, i Perwerdigar, Özüngni izdigenlerni hergiz tashlighan emessen.
11 Zionda turghuchi Perwerdigargha küylerni yangritinglar!
Uning qilghanlirini xelqler arisida bayan qilinglar;
12 Chünki tökülgen qanning soriqini qilghuchi udur,
U del shundaq kishilerni esleydu,
Xar qilin’ghanlarning nale-peryadlirini U untughan emes.
13 Manga shepqet körsetkin, i Perwerdigar,
Méning öchmenlerdin körgen xorluqlirimgha nezer salghinki,
Méni ölüm derwaziliri aldidin kötürgeysen;
14 Shundaq qilghanda men Zion qizining derwazilirida turup,
Sanga teelluq barliq medhiyilerni jakarlaymen;
Men nijatliq-qutquzushungda shadlinimen.□«...men Zion qizining derwazilirida turup,... » — «Zion qizi» Yérusalémni körsitidu.
15 Eller bolsa özliri kolighan origha özliri chüshüp ketti,
Özliri yoshurup qoyghan torgha puti qapsilip qaldi.■Zeb. 7:16; Pend. 5:22
16 Perwerdigar chiqarghan hökümi bilen tonular;
Rezil ademler öz qolida yasighini bilen ilinip qaldi.
17 Reziller,
Yeni Xudani untughan barliq eller,
Yandurulup, tehtisaragha tashlinidu.□«...yandurulup, tehtisaragha tashlinidu» — «tehtisara» toghruluq 6-küy, 5-ayettiki izahatni, shundaqla «Tebirler»ni körüng.
18 Chünki namratlar menggüge estin chiqirilmaydu;
Möminlerning ümidi menggü öchmey, turiwéridu.
19 I Perwerdigar, ornungdin turghin;
Adem balilirining ghelibe qilishigha yol qoymighin;
Huzurung aldida barliq eller sotlansun.
20 Ularni dekke-dükkige chüshür, i Perwerdigar;
Eller özlirini biz peqet adem baliliri xalas, dep bilsun!
Sélah!
□9:1 ««Mut-Labben» dégen ahangda oqulsun dep» — «Mut-Labben» belkim «oghulning ölümi» dégen menide.
■9:9 Zeb. 37:39; 46:1-3; 91:1-2
□9:14 «...men Zion qizining derwazilirida turup,... » — «Zion qizi» Yérusalémni körsitidu.
□9:16 «Xiggaon — Sélah» — «Xiggaon» belkim «séghinip oylinish» dégenni bildüridu; shundaqla yene belkim: — «muzika pes awazliq bolushi kérek» dégenni bildürüshi mumkin.
□9:17 «...yandurulup, tehtisaragha tashlinidu» — «tehtisara» toghruluq 6-küy, 5-ayettiki izahatni, shundaqla «Tebirler»ni körüng.