Muqeddes Kalam (latin yéziq) Zebur 34

34-küy •••• Xudaning méhribanliqigha medhiye •••• «élipbe tertipilik» küy •••• 1-ayettiki izahatni körüng.

1 Dawut yazghan küy: —

(Dawut Abimelek padishahning aldida yürüsh-turushini bashqiche qiliwalghanda, Abimelek uni heydiwetken waqitta yazghan)

|א| Men herqandaq waqitlarda Perwerdigargha teshekkür-medhiye qayturimen;

Uni medhiyilesh aghzimdin chüshmeydu.□ ■

2 |ב| Qelbim Perwerdigarni iptixarlinip medhiyeleydu,

Möminler buni anglap shadliqta bolidu.

3 |ג| Men bilen bille Perwerdigarni ulughlanglar,

Birlikte Uning namigha medhiyiler yangritayli.

4 |ד| Perwerdigarni izdidim,

U méning duayimni ijabet qildi,

Méni basqan barliq wehime-qorqunchlirimdin qutquzdi.

5 |ה| Möminler Uninggha telmürüp nurlandi;

|ו|Yüzliri yerge qaritilmidi.

6 |ז| Men péqir-bichare Uninggha nida qildi,

Perwerdigar anglap, méni hemme awarichiliklerdin qutquzdi.

7 |ח| Perwerdigarning Perishtisi Uningdin eyminidighanlarni qoghdap etrapigha chédirini tikidu,

Ularni qutquzidu.□

8 |ט| Perwerdigarning méhribanliqini tétip, bilgin,

Uninggha ishinip tayan’ghan adem némidégen bextliktur!

9 |י| I Uning muqeddes bendiliri, Perwerdigardin eymininglar!

Chünki Uningdin eyminidighanlarning héch nersisi kem bolmas.

10 |כ| Küchlük arslanlar ozuqsiz qélip ach qalsimu,

Emma Perwerdigarni izdigüchilerning héchbir yaxshi nersisi kem bolmas.■

11 |ל| Kélinglar balilirim, manga qulaq sélinglar;

Men silerge Perwerdigardin eyminishni ögitip qoyay.

12 |מ| Hayatni etiwarlaydighan kishi kim?

Kimning uzun we yaxshi künlerni körgüsi bar?■

13 |נ| Undaqta tilingni yamanliqtin tartip yür,

Lewliring mekkarliqtin néri bolsun;

14 |ס| Yamanliqtin ayrilip yiraq bolup, güzel emellerni qilip yür;

Aman-xatirjemlikni izdep, uni qoghlap yür.□

15 |ע| Perwerdigarning közi heqqaniylarning üstide turidu,

Uning quliqi ularning iltijalirigha ochuq turidu;■

16 |פ| Perwerdigarning chirayi rezillik qilghuchilargha qarshi chiqar,

Ularning herqandaq nam-xatirilirini yer yüzidin élip tashlar;

17 |צ| Heqqaniylar iltija qilidu,

Perwerdigar anglaydu, ularni barliq azab-musheqqetliridin qutquzidu;

18 |ק| Perwerdigar köngli sunuqlargha yéqindur,

Rohi ézilgenlerni qutquzidu.□ ■

19 |ר| Heqqaniylar duch kelgen awarichilikler köptur;

Biraq Perwerdigar ularni bularning hemmisidin qutquzidu.■

20 |ש| U heqqaniyning söngeklirini saq qalduridu,

Ulardin birsimu sunup ketmeydu.■

21 |ח| Yamanliqning özi rezillerni öltüridu;

Heqqaniylargha nepretlinidighanlar gunahta qalidu.

22 |פ| Perwerdigar Öz qullirining janlirini bedel tölep hörlükke chiqiridu;

Uninggha tayan’ghanlardin héchkimge gunah békitilmeydu.□

Zebur
<
34
>

□34:1 « א alef, ibraniy tilidiki birinchi herp» — bu küy «élipbe tertipilik» küy. Herbir ayet aldida ibraniy herpler körsitilidu (10-küyge bérilgen, «élipbe tertipilik küy» toghruluq izahatnimu körüng). «Men herqandaq waqitlarda Perwerdigargha teshekkür-medhiye qayturimen» — «teshekkür-medhiye qayturush» dégen söz ibraniy tilida «(Xudagha) rehmet éytish», «uni ulughlash» dégen menide kélidu, uning yene «Xudani xursen qilish» dégen menisimu bar. «Teshekkür-medhiye qayturush» dégenning ibraniy tilidiki shekli ereb tilidiki «mubareklesh» dégen sözge oxshap kétidu; démek, Xudagha ««barek» (beriket) yetküzüsh».

■34:1 1Sam. 21:13

□34:7 ««Perwerdigarning Perishtisi» yaki «Perwerdigarning Elchisi»)» — Tewrat dewride intayin alahide bir shexs idi. «Tebirler»ni körüng. «Perwerdigarning Perishtisi» bezi ishlarda Xudaning ornida körünetti (mesilen, «Yar.» 16:7-14, 18-babni, «Tebirler»nimu körüng).

■34:10 Ayup 4:11

■34:12 1Pét. 3:10

□34:14 «Aman-xatirjemlikni izdep...» — yaki «hemmeylen bilen inaq ötüshke tiriship,...».

■34:15 Ayup 36:7; Zeb. 33:18; 1Pét. 3:12

□34:18 «Perwerdigar köngli sunuqlargha yéqindur, rohi ézilgenlerni qutquzidu» — bu ayettiki «köngli sunuqlar» hemde «rohi ézilgenler», shübhisizki, towa qilghanlarni körsitidu.

■34:18 2Tim. 3:11

■34:19 2Tim. 3:12

■34:20 Yuh. 19:36

□34:22 «Perwerdigar Öz qullirining janlirini bedel tölep hörlükke chiqiridu» — bu yerde ishletken péil («bedel tölep hörlükke chiqiridu») adette qullarni (melum bahada) qulluqtin azad qilish, hör qilishni bildüridu.