36
36-küy •••• Gunahkar insan we Xudaning méhribanliqi
1 Neghmichilerning béshigha tapshurulup oqulsun dep, Perwerdigarning quli Dawut yazghan küy: —
Rezil ademning asiyliqi méning qelbimde bir bésharetni peyda qilidu: —
«Uning neziride Xudadin qorqidighan ish yoqtur!».□«Perwerdigarning quli Dawut yazghan küy» — ibraniy tilida: «Perwerdigarning qulining, Dawutning küyi».
2 Chünki u öz-özini maxtayduki,
U öz-özige: — «Mende gunah tépilmas, qilghinim yirginchlik ish emestur!» — deydu. □«U öz-özige: — «Mende gunah tépilmas, qilghinim yirginchlik ish emestur!» — deydu» — belkim u özini aldimaqchi bolup: «Méning gunahim anche éghir emes», démekchi. Toluq ayetning yene birxil terjimisi: «Uning gunahining yirginchliki ashkarilan’ghan bolsimu, u yenila öz özini maxtaydu».
3 Aghzidiki sözler qebihlik we hiyligerliktur;
Peziletlik ish qilish parasitidin u alliburun mehrumdur.
4 U ornida yatqandimu gunahni közleydu;
U durus bolmighan yolgha méngishni irade qilidu;
Yamanliqtin héch nepretlenmeydu.
5 I Perwerdigar, özgermes muhebbiting ershlerge taqishidu;
Heqiqet-sadiqliqing bulutlargha yétidu!■Zeb. 57:10; 108:4
6 Heqqaniyliqing büyük taghlardek,
Hökümliring tilsimatliq chongqur déngizlardektur.
I Perwerdigar, Sen ademler we haywanlarni saqlighuchidursen;
7 Séning özgermes muhebbiting neqeder qimmetliktur, i Xuda!
Shunga insan baliliri qanatliring sayiside panahlinidu.
8 Ular öyüngdiki mol dastixandin toyghuche behrimen bolidu;
Sen ulargha huzur-halawetliringning deryasidin ichküzisen.
9 Chünki Sendila bardur hayatliq buliqi;
Nurungda bolup nurni körimiz.
10 Ah, Özüngni tonup, bilgenlerge muhebbitingni,
Köngli duruslarghimu heqqaniyliqingni körsitishni dawamlashturghaysen.
11 Tekebburlarning putining manga hujum qilishigha yol qoymighaysen;
Rezillerning qoli méni ornumdin qoghliwetmisun;
12 Mana, yamanliq qilghuchilar yiqildi!
Ghulitiwétildi, ornidin qayta turalmaydu!
□36:1 «Perwerdigarning quli Dawut yazghan küy» — ibraniy tilida: «Perwerdigarning qulining, Dawutning küyi».
□36:2 «U öz-özige: — «Mende gunah tépilmas, qilghinim yirginchlik ish emestur!» — deydu» — belkim u özini aldimaqchi bolup: «Méning gunahim anche éghir emes», démekchi. Toluq ayetning yene birxil terjimisi: «Uning gunahining yirginchliki ashkarilan’ghan bolsimu, u yenila öz özini maxtaydu».