4
Sulaymanning ǝmǝldarliri wǝ hizmǝtkarliri
1 Sulayman padixaⱨ pütkül Israilƣa padixaⱨ boldi.
2 Uning qong ǝmǝldarliri munular: — Zadokning oƣli Azariya kaⱨin idi; 3 Xixaning oƣulliri Elihorǝf wǝ Ahiyaⱨ katiplar idi; Aⱨiludning oƣli Yǝⱨoxafat diwanbegi idi; 4 Yǝⱨoyadaning oƣli Binaya ⱪoxunning bax sǝrdari idi. Zadok bilǝn Abiyatar kaⱨinlar idi; 5 Natanning oƣli Azariya nazarǝt begi, Natanning yǝnǝ bir oƣli Zabud ⱨǝm kaⱨin wǝ padixaⱨning mǝsliⱨǝtqisi idi. 6 Ahixar ordining ƣojidari, Abdaning oƣli Adoniram baj-alwan begi idi.■1Pad. 12:18
7 Pütkül Israil zeminida Sulayman padixaⱨning ɵzi üqün wǝ ordidikiliri üqün yemǝk-iqmǝk tǝminlǝydiƣan, on ikki nazarǝtqi tǝyinlǝngǝnidi; ularning ⱨǝrbiri yilda bir aydin yemǝk-iqmǝk tǝminlǝxkǝ mǝs’ul idi. 8 Ularning ismi tɵwǝndǝ hatirilǝngǝn: Əfraim taƣliⱪ rayoniƣa Bǝn-Hur; 9 Makaz, Xaalbim, Bǝyt-Xǝmǝx wǝ Elon-Bǝyt-Ⱨananƣa Bǝn-Dǝkǝr; 10 Arubotⱪa Bǝn-Hǝsǝd; u yǝnǝ Sokoⱨ wǝ Hǝfǝr degǝn barliⱪ yurtⱪimu mǝs’ul idi; □«Sokoⱨ» — yaki «Soko». 11 yǝnǝ Nafat-Dorƣa Bǝn-Abinadab (u Sulaymanning ⱪizi Tafatni hotunluⱪⱪa alƣan); 12 Taanaⱪ, Mǝgiddo wǝ Yizrǝǝlning tɵwǝnki tǝripidiki Zarǝtanning yenida bolƣan pütkül Bǝyt-Xanƣa, xundaⱪla Bǝyt-Xandin tartip Abǝl-Mǝⱨolaⱨƣiqǝ, Jokneamdin ɵtküqǝ bolƣan zeminlarƣa Aⱨiludning oƣli Baana; 13 Ramot-Gileadⱪa Bǝn-Gǝbǝr; u yǝnǝ Gilead yurtiƣa jaylaxⱪan, Manassǝⱨning oƣli Yairƣa tǝwǝ bolƣan kǝntlǝr wǝ ⱨǝm Baxandiki yurt Argob, jümlidin u yǝrdiki sepili, mis baldaⱪliⱪ ⱪowuⱪliri bolƣan atmix qong xǝⱨǝrgimu mǝs’ul idi.
14 Maⱨanaimƣa Iddoning oƣli Aⱨinadab; 15 Naftaliƣa Ahimaaz (u Sulaymanning ⱪizi Basimatni hotunluⱪⱪa alƣanidi). 16 Axir wǝ Alotⱪa Ⱨuxayning oƣli Baanaⱨ; 17 Issakarƣa Paruaⱨning oƣli Yǝⱨoxafat; 18 Binyamin zeminiƣa Elaning oƣli Ximǝy; 19 Gilead zeminiƣa (ǝslidǝ Amoriylarning padixaⱨi Siⱨon wǝ Baxanning padixaⱨi Ogning zemini idi) Urining oƣli Gǝbǝr. U xu yurtⱪa birdinbir nazarǝtqi idi.
Sulaymanning dɵliti wǝ xɵⱨriti
20 Yǝⱨuda bilǝn Israilning adǝmliri dengiz saⱨilidiki ⱪumdǝk nurƣun idi. Ular yǝp-iqip, huxalliⱪ ⱪilatti. 21 Wǝ Sulayman bolsa Əfrat dǝryasidin tartip Filistiylǝrning zeminiƣa wǝ Misirning qegraliriƣiqǝ bolƣan ⱨǝmmǝ padixaⱨliⱪlarning üstidǝ sǝltǝnǝt ⱪilatti. Ular ulpan kǝltürüp Sulaymanning pütün ɵmridǝ uning hizmitidǝ bolatti. 22 Sulaymanning ordisiƣa ketidiƣan künlük tǝminat üqün ottuz kor tasⱪiƣan aⱪ un, atmix kor ⱪara un, □«ottuz kor» — bir kor on litr, 30 kor 300 litr. 23 on bordiƣan uy, yaylaⱪtin kǝltürülgǝn yigirmǝ uy, yüz ⱪoy ketǝtti; buningdin baxⱪa buƣilar, jǝrǝnlǝr, kiyiklǝr wǝ bordiƣan tohular lazim idi. 24 Qünki u Tifsaⱨdin tartip Gazaƣiqǝ, Əfrat dǝryasining bu tǝripidiki ⱨǝmmǝ yurtlarning üstidǝ, yǝni Əfrat dǝryasining bu tǝripidiki barliⱪ padixaⱨlarning üstidǝ ⱨɵküm sürǝtti; uning tɵt ǝtrapi tinq idi. 25 Sulaymanning pütkül künliridǝ Dandin tartip Bǝǝr-Xebaƣiqǝ Yǝⱨuda bilǝn Israil adǝmlirining ⱨǝrbiri ɵz üzüm teli wǝ ɵz ǝnjür dǝrihining tegidǝ aman-esǝn olturatti.■Law. 26:5
26 Sulaymanning jǝng ⱨarwilirining atliri üqün tɵt ming athanisi, on ikki ming qǝwǝndizi bar idi.□«tɵt ming athanisi» — kɵp kona kɵqürmilǝrdǝ «ⱪiriⱪ ming athanisi» deyilidu. Lekin biz bu sanni kɵqürgüqilǝrning hataliⱪi dǝp ⱪaraymiz. «2Tar.» 9:25dǝ wǝ bu tekistning bǝzi grek tǝrjimiliridǝ «tɵt ming» deyilidu. «on ikki ming qǝwǝndizi» — yaki «on ikki ming eti». ■1Pad. 10:26; 2Tar. 1:14; 9:25
27 Mǝzkur nazarǝtqilǝrning ⱨǝrbiri ɵzigǝ bekitilgǝn ayda Sulayman padixaⱨⱪa wǝ uning dastihiniƣa kǝlgǝnlǝrning ⱨǝmmisining yemǝk-iqmǝklirini kemǝytmǝy tǝminlǝytti. 28 Hǝlⱪ bolsa ⱨǝrbiri ɵzigǝ bekitilgǝn norma boyiqǝ at-ⱪeqirlar üqün arpa bilǝn samanlarni nazarǝtiqilǝr bar yǝrgǝ elip kelǝtti.
29 Huda Sulaymanƣa dengiz saⱨilidiki ⱪumdǝk danaliⱪ, intayin mol pǝm-parasǝt ata ⱪilip, uning ⱪǝlbini kǝng ⱪilip zor yorutti. □«uning ⱪǝlbini kǝng ⱪilip zor yorutti» — yaki «uning kɵksi-ⱪarnini bǝk kǝng ⱪildi». 30 Xuning bilǝn Sulaymanning danaliⱪi barliⱪ xǝrⱪtikilǝrning danaliⱪidin wǝ Misirdiki barliⱪ danaliⱪtin axti. 31 Qünki u barliⱪ adǝmlǝrdin, jümlidin ǝzraⱨliⱪ Etan bilǝn Maholning oƣulliri Ⱨeman, Kalkol wǝ Darda degǝnlǝrdin dana idi; wǝ uning xɵⱨriti ǝtrapidiki ⱨǝmmǝ ǝllǝr arisida yeyildi. 32 U eytⱪan pǝnd-nǝsiⱨǝt üq ming idi; uning xeir-küyliri bir ming bǝx idi. 33 U Liwandiki kedir dǝrihidin tartip tamda ɵsidiƣan lepǝkgülgiqǝ dǝrǝh-giyaⱨlarning ⱨǝmmisini bayan ⱪilip hatiriligǝnidi; u yǝnǝ mal wǝ ⱨaywanlar, ⱪuxlar, ⱨaxarǝt-ɵmiligüqilǝr wǝ beliⱪlar toƣrisida bayan ⱪilip hatiriligǝnidi. 34 Sulaymanning danaliⱪini angliƣili kixilǝr barliⱪ ǝllǝrdin kelǝtti, xundaⱪla uning danaliⱪi toƣruluⱪ hǝwǝr tapⱪan yǝr yüzidiki ⱨǝmmǝ padixaⱨlardin kixilǝr kǝlmǝktǝ idi.
□4:10 «Sokoⱨ» — yaki «Soko».
□4:22 «ottuz kor» — bir kor on litr, 30 kor 300 litr.
□4:26 «tɵt ming athanisi» — kɵp kona kɵqürmilǝrdǝ «ⱪiriⱪ ming athanisi» deyilidu. Lekin biz bu sanni kɵqürgüqilǝrning hataliⱪi dǝp ⱪaraymiz. «2Tar.» 9:25dǝ wǝ bu tekistning bǝzi grek tǝrjimiliridǝ «tɵt ming» deyilidu. «on ikki ming qǝwǝndizi» — yaki «on ikki ming eti».
■4:26 1Pad. 10:26; 2Tar. 1:14; 9:25
□4:29 «uning ⱪǝlbini kǝng ⱪilip zor yorutti» — yaki «uning kɵksi-ⱪarnini bǝk kǝng ⱪildi».