Muⱪeddes Kalam (yǝngi yeziⱪ) Yǝxaya 58

Ⱪuruⱪ diniy paaliyǝtlǝr adǝmlǝrni dozahⱪa elip baridu; •••• Hudaƣa yaⱪidiƣan «rozini tutux»

1 — Nida ⱪilip jakarliƣin,

Awazingni ⱪoyup berip boluxiqǝ towla,

Awazingni kanaydǝk kɵtür,

Mening hǝlⱪimgǝ ularning asiyliⱪini,

Yaⱪupning jǝmǝtigǝ gunaⱨlirini bayan ⱪilƣin.

2 Biraⱪ ular Meni ⱨǝr küni izdǝydiƣan,

Ⱨǝⱪⱪaniyliⱪni yürgüzidiƣan,

Mening yollirimni bilixni huxalliⱪ dǝp bilidiƣan,

Hudasining ⱨɵküm-pǝrmanlirini taxliwǝtmǝydiƣan bir ǝlgǝ ohxaydu;

Ular Mǝndin ⱨǝⱪⱪaniyliⱪni bekitidiƣan ⱨɵküm-pǝrmanlarni soraydu;

Ular Hudaƣa yeⱪinlixixni hursǝnlik dǝp bilidu.

3 Andin ular: — «Biz roza tuttuⱪ,

Əmdi nemixⱪa sǝn kɵzünggǝ ilmiding?

Biz jenimizni ⱪiyniduⱪ,

Əmdi nemixⱪa buningdin hǝwiring yoⱪ?» — dǝp soraydu.

— Ⱪaranglar, roza küni ɵz kɵnglünglardikini ⱪiliwerisilǝr,

Hizmǝtqiliringlarni ⱪattiⱪ ixlitisilǝr;

4 Silǝrning roza tutuxliringlar jǝnggi-jedǝl qiⱪirix üqünmu?

Ⱪǝbiⱨ ⱪolliringlar muxt bilǝn adǝm uruxni mǝⱪsǝt ⱪilƣan ohximamdu?

Ⱨazirⱪi roza tutuxliringlarning mǝⱪsiti awazinglarni ǝrxlǝrdǝ anglitix ǝmǝstur!□

5 Mǝn talliƣan xu roza tutux küni —

Adǝmlǝrning jenini ⱪiynaydiƣan künmu?

Bexini ⱪomuxtǝk egip,

Astiƣa bɵz wǝ küllǝrni yeyix kerǝk bolƣan künmu?

Silǝr muxundaⱪ ixlarni «roza»,

«Pǝrwǝrdigar ⱪobul ⱪilƣudǝk bir kün» dǝwatamsilǝr?■

6 Mana, Mǝn talliƣan roza muxuki: —

Rǝzillik-zulumning asarǝtlirini boxitix,

Boyunturuⱪning tasmilirini yexix,

Ezilgǝnlǝrni boxitip ⱨɵr ⱪilix,

Ⱨǝrⱪandaⱪ boyunturuⱪni qeⱪip taxlax ǝmǝsmidi?□

7 Ax-neningni aqlarƣa ülǝxtürüxüng,

Ⱨajǝtmǝn musapirlarni ⱨimayǝ ⱪilip ɵyünggǝ apirixing,

Yalingaqlarni kɵrginingdǝ, uni kiydürüxüng,

Ɵzüngni ɵzüng bilǝn bir jan bir tǝn bolƣanlardin ⱪaqurmasliⱪingdin ibarǝt ǝmǝsmu?■

8 Xundaⱪ ⱪilƣanda nurung tang sǝⱨǝrdǝk wallidǝ eqilidu,

Salamǝtliking tezdin ǝsligǝ kelip yaxnaysǝn;

Ⱨǝⱪⱪaniyliⱪing aldingda mangidu,

Arⱪangdiki muⱨapizǝtqing bolsa Pǝrwǝrdigarning xan-xǝripi bolidu.

9 Sǝn qaⱪirsang, Pǝrwǝrdigar jawab beridu;

Nida ⱪilisǝn, U: «Mana Mǝn!» dǝydu.

Əgǝr aranglardin boyunturuⱪni,

Tǝnglǝydiƣan barmaⱪni,

Ⱨǝm tɵⱨmǝt gǝplirini yoⱪ ⱪilsang,□

10 Jeningni aqlar üqün pida ⱪilsang,

Ezilgǝnlǝrning ⱨajǝtliridin qiⱪsang,

Xu qaƣda nurung ⱪarangƣuluⱪta kɵtürülidu;

Zulmiting qüxtǝk bolidu;

11 Ⱨǝm Pǝrwǝrdigar sening daimliⱪ yetǝkligüqing bolidu,

Jeningni ⱪurƣaⱪqiliⱪ bolƣan waⱪtidimu ⱪamdaydu,

Ustihanliringni küqǝytidu;

Sǝn suƣirilidiƣan bir baƣ,

Suliri urƣup tügimǝydiƣan, adǝmni aldimaydiƣan bir bulaⱪ bolisǝn;□

12 Sǝndin tɵrǝlgǝnlǝr kona harabilǝrni ⱪaytidin ⱪurup qiⱪidu;

Nurƣun dǝwrlǝr ⱪaldurƣan ullarni ⱪaytidin kɵtürisǝn,

Xuning bilǝn «Bɵsülgǝn tamlarni ⱪaytidin yasiƣuqi,

Koqa-yol wǝ turalƣularni ǝsligǝ kǝltürgüqi» dǝp atilisǝn.

13 Əgǝr sǝn xabat künidǝ ⱪǝdǝmliringni sanap mangsang,

Yǝni Mening muⱪǝddǝs künümdǝ ɵzüngningki kɵnglüngdikilǝrni ⱪilmay,

Xabatni «huxalliⱪ»,

Pǝrwǝrdigarning muⱪǝddǝs künini «ⱨɵrmǝtlik kün» dǝp bilsǝng,

Ⱨǝm Uni ⱨɵrmǝtlǝp,

Ɵz yolliringda mangmay,

Ɵz bilginingni izdimǝy,

Ⱪuruⱪ parang salmisang,□

14 Undaⱪta Pǝrwǝrdigarni kɵnglüngning huxalliⱪi dǝp bilisǝn,

Ⱨǝm Mǝn seni yǝr yüzidiki yuⱪiri jaylarƣa mingüzüp mangdurimǝn;

Atang Yaⱪupning mirasi bilǝn seni ozuⱪlandurimǝn —

Qünki Pǝrwǝrdigar Ɵz aƣzi bilǝn xundaⱪ sɵz ⱪildi. □

□58:4 «ǝrxlǝrdǝ» — ibraniy tilida «yuⱪirida»

■58:5 Zǝk. 7:5

□58:6 «Ⱨǝrⱪandaⱪ boyunturuⱪni qeⱪip taxlax ǝmǝsmidi?» — «boyunturuⱪ» bǝlkim insanlarƣa ulaƣ ⱨaywanlarning ⱪatarida muamilǝ ⱪilixni bildüridu. Hudaning yolyoruⱪining birinqi basⱪuqi bolsa, «boyunturuⱪning tasmilirini yexix»; biraⱪ ⱨǝⱪⱪaniyliⱪning ahirⱪi mǝⱪsiti barliⱪ boyunturuⱪlarni paqaⱪlap taxlaxtin ibarǝt bolux kerǝk.

■58:7 Əz. 18:7,16; Mat. 25:35

□58:9 «Tǝnglǝydiƣan barmaⱪ» — ⱨiyligǝrlik ixarǝtlǝrni yaki ǝrz-xikayǝt ⱪilƣanliⱪini kɵrsǝtsǝ kerǝk.

□58:11 «Adǝmni aldimaydiƣan bir bulaⱪ» — qɵl-bayawanda yürgǝn yoluqilar üqün bulaⱪlar intayin muⱨim, ǝlwǝttǝ. Ⱨeli bar, ⱨazir yoⱪ bolƣan bulaⱪlar, «adǝmni aldaydiƣan» bulaⱪlar deyilǝtti; bundaⱪ bulaⱪlar yoluqilarning jeniƣa zamin boluxi mumkin.

□58:13 «Ⱨǝm Uni ⱨɵrmǝtlǝp...» — muxu ibaridǝ «Uni» yaki Pǝrwǝrdigarning Ɵzini yaki uning «xabat küni»ni kɵrsitidu. «Ɵz yolliringda mangmay, ɵz bilginingni izdimǝy, ⱪuruⱪ parang salmisang,...» — Musa pǝyƣǝmbǝr arⱪiliⱪ Israilƣa berilgǝn «on pǝrman»ning tɵtinqisi «xabat künini muⱪǝddǝs küni süpitidǝ saⱪlanglar» degǝn. Xabatning muⱨim ixliri bolsa ɵzining ⱨeqⱪandaⱪ hususiy ix-hizmǝtlirini ⱪilmay, Hudani seƣinixtur.

□58:14 «yuⱪiri jaylarƣa mingüzüp mangdurimǝn» — bu ajayib sirliⱪ gǝp bolup, mǝnisi (1) ornung naⱨayiti üstün bolidu; (2) naⱨayiti müxkül ⱨǝm hǝtǝrlik ixlar sanga asan kelidu. Əmdi Huda Ɵzigǝ itaǝt ⱪilƣanlarni nemigǝ mindüridu? — muxu yǝrdǝ deyilmidi. Bǝlkim pǝrixtilǝrning küq-ⱪudriti kɵrsitilixi mumkin.