Muⱪeddes Kalam (yǝngi yeziⱪ) Yǝxaya 59

Hudaning sɵzining dawami — Gunaⱨning ɵzini tǝⱨlil ⱪilix

1 — Ⱪaranglar, Pǝrwǝrdigarning ⱪoli ⱪutⱪuzalmiƣudǝk küqsiz bolup ⱪalƣan ǝmǝs;

Yaki Uning ⱪuliⱪi anglimiƣudǝk eƣir bolup ⱪalƣan ǝmǝs;■

2 Biraⱪ silǝrning ⱪǝbiⱨlikinglar silǝrni Hudayinglardin yiraⱪlaxturdi,

Gunaⱨinglar Uning yüzini silǝrdin ⱪaqurup Uningƣa tilikinglarni anglatⱪuzmidi.□

3 Qünki ⱪolliringlar ⱪan bilǝn,

Barmaⱪliringlar ⱪǝbiⱨlik bilǝn milǝngǝn,

Lǝwliringlar yalƣan gǝp eytⱪan,

Tilinglar kaldirlap ⱪerixip sɵzligǝn;

4 Ⱨǝⱪⱪaniyliⱪ tǝrǝptǝ sɵzligüqi yoⱪtur,

Ⱨǝⱪiⱪǝt tǝrǝptǝ turidiƣan ⱨɵküm soriƣuqi yoⱪtur;

Ular yoⱪ bir nǝrsigǝ tayinip, aldamqiliⱪ ⱪilmaⱪta,

Ularning ⱪorsiⱪidikisi ziyandax,

Ularning tuƣuwatⱪini ⱪǝbiⱨlik;■

5 Ular qar yilanning tuhumlirini tɵrǝldüridu,

Ɵmüqükning torini torlaydu,

Kim uning tuhumlirini yesǝ ɵlidu;

Ulardin biri qeⱪilsa zǝⱨǝrlik yilan qiⱪidu.□

6 Ularning torliri kiyim bolalmaydu;

Ɵzliri ixligǝnliri bilǝn ɵzlirini yapalmaydu;

Ixligǝnliri bolsa ⱪǝbiⱨ ixlardur;

Ularning ⱪolida zorawanliⱪ turidu;□ ■

7 Ⱪǝdǝmliri yamanliⱪ tǝrǝpkǝ yügüridu,

Gunaⱨsiz ⱪanni tɵküxkǝ aldiraydu,

Ularning oyliri ⱪǝbiⱨlik toƣrisidiki oylardur;

Barƣanla yǝrdǝ wǝyranqiliⱪ wǝ ⱨalakǝt tepilidu.■

8 Tinqliⱪ-aramliⱪ yolini ular ⱨeq tonumaydu;

Yürüxliridǝ ⱨeq ⱨǝⱪiⱪǝt-adalǝt yoⱪtur;

Ular yollirini ǝgri-toⱪay ⱪiliwaldi;

Kim bularda mangƣan bolsa tinq-aramliⱪni kɵrmǝydu.

Israil gunaⱨini iⱪrar ⱪilidu

9 — Xunga ⱨǝⱪiⱪǝt-adalǝt bizdin yiraⱪ turidu;

Ⱨǝⱪⱪaniyliⱪ yetip bizni qümkigǝn ǝmǝs;

Nurni kütimiz, biraⱪ yǝnila ⱪarangƣuluⱪ!

Birla ƣil-pal parliƣan yoruⱪluⱪnimu kütimiz,

Yǝnila zulmǝttǝ mangimiz.

10 Ⱪariƣulardǝk biz tamni silaxturup izdǝymiz,

Kɵzsiz bolƣandǝk silaxturimiz;

Gugumda turƣandǝk qüxtimu putlixip ketimiz,

Qǝt yaⱪilarda ɵlüklǝrdǝk yürimiz.□

11 Eyiⱪlardǝk nǝrǝ tartimiz,

Pahtǝklǝrdǝk ⱪattiⱪ aⱨ urimiz;

Biz ⱨɵküm-ⱨǝⱪiⱪǝtni kütüp ⱪaraymiz, biraⱪ u yoⱪ;

Nijat-ⱪutuluxni kütimiz, biraⱪ u bizdin yiraⱪtur;

12 Qünki itaǝtsizliklirimiz aldingda kɵpiyip kǝtti,

Gunaⱨlirimiz bizni ǝyiblǝp guwaⱨliⱪ beridu;

Qünki itaǝtsizliklirimiz ⱨǝrdaim biz bilǝn billidur;

Ⱪǝbiⱨliklirimiz bolsa, bizgǝ roxǝndur: —

13 Qünki Pǝrwǝrdigarƣa itaǝtsizlik ⱪilmaⱪtimiz, wapasizliⱪ ⱪilmaⱪtimiz,

Uningdin yüz ɵrimǝktimiz,

Zulumni ⱨǝm asiyliⱪni tǝrƣip ⱪilmaⱪtimiz,

Yalƣan sɵzlǝrni oydurup, iq-iqimizdin sɵzlimǝktimiz;

14 Adalǝt-halisliⱪ bolsa yoldin yenip kǝtti;

Ⱨǝⱪⱪaniyliⱪ yiraⱪta turidu;

Qünki ⱨǝⱪiⱪǝt koqida putlixip ketidu;

Durus-diyanǝtningmu kirgüdǝk yeri yoⱪtur.

15 Xuning bilǝn ⱨǝⱪiⱪǝt yoⱪay dǝp ⱪaldi;

Ɵzümni yamanliⱪtin neri ⱪilay degǝn adǝm hǝⱪning olja nixani bolup ⱪaldi!

Pǝrwǝrdigar duani anglap ixⱪa kiridu

16 Ⱨǝm Pǝrwǝrdigar kɵrdi;

Ⱨɵküm-ⱨǝⱪiⱪǝtning yoⱪluⱪi Uning nǝziridǝ intayin yaman bilindi.

Wǝ U amal ⱪilƣudǝk birmu adǝmning yoⱪluⱪini kɵrdi;

Gunaⱨkarlarƣa wǝkil bolup dua ⱪilƣuqi ⱨeqkimning yoⱪluⱪini kɵrüp, azablinip kɵngli parakǝndǝ boldi.

Xunga Uning Ɵz Biliki ɵzigǝ nijat kǝltürdi;

Uning Ɵz ⱨǝⱪⱪaniyliⱪi Ɵzini ⱪollap qidamliⱪ ⱪildi;□ ■

17 U ⱨǝⱪⱪaniyliⱪni ⱪalⱪan-sawut ⱪildi,

Bexiƣa nijatliⱪ dubulƣisini kiydi;

Ⱪisas libasini kiyim ⱪildi,

Muⱨǝbbǝtlik ⱪizƣinliⱪni ton ⱪilip kiydi.■

18 Adǝmlǝrning ⱪilƣanliri boyiqǝ, u ularƣa ⱪayturidu;

Rǝⱪiblirigǝ ⱪǝⱨr qüxüridu,

Düxmǝnlirigǝ ixlirini ⱪayturidu,

Qǝt arallardikilǝrgimu u ixlirini ⱪayturidu.

19 Xuning bilǝn ular ƣǝrbtǝ Pǝrwǝrdigarning namidin,

Künqiⱪixta Uning xan-xǝripidin ⱪorⱪidu;

Düxmǝn kǝlkündǝk besip kirginidǝ,

Əmdi Pǝrwǝrdigarning Roⱨi uningƣa ⱪarxi bir tuƣni kɵtürüp beridu;

20 Xuning bilǝn Ⱨǝmjǝmǝt-Ⱪutⱪuzƣuqi Zionƣa kelidu,

U Yaⱪup jǝmǝtidikilǝr arisidin itaǝtsizliktin yenip towa ⱪilƣanlarƣa yeⱪinlixidu, — dǝydu Pǝrwǝrdigar.□ ■

21 Mǝn bolsam, mana, Mening ular bilǝn bolƣan ǝⱨdǝm xuki, — dǝydu Pǝrwǝrdigar —

«sening üstünggǝ ⱪonup turƣan Mening Roⱨim, xundaⱪla Mǝn sening aƣzingƣa ⱪuyƣan sɵz-kalamim bolsa,

Buningdin baxlap ǝbǝdil’ǝbǝdgiqǝ ɵz aƣzingdin, nǝslingning aƣzidin yaki nǝslingning nǝslining aƣzidin ⱨǝrgiz qüxmǝydu! — dǝydu Pǝrwǝrdigar. □

■59:1 Qɵl. 11:23; Yǝx. 50:2

□59:2 «Ⱪaranglar, Pǝrwǝrdigarning ⱪoli ⱪutⱪuzalmiƣudǝk küqsiz bolup ⱪalƣan ǝmǝs... biraⱪ silǝrning ⱪǝbiⱨlikinglar silǝrni Hudayinglardin yiraⱪlaxturdi, gunaⱨinglar Uning yüzini silǝrdin ⱪaqurup Uningƣa tilikinglarni anglatⱪuzmidi» — muxu -1-2-ayǝtlǝr bolsa 58-bab, 3-ayǝttiki soalƣa berilgǝn jawabtur.

■59:4 Ayup 15:35; Zǝb. 7:14

□59:5 «Ulardin biri qeⱪilsa zǝⱨǝrlik yilan qiⱪidu» — demǝk, ulardin ⱨeqⱪandaⱪ yahxiliⱪ qiⱪmaydu, ularƣa taⱪabil turux intayin tǝs; adǝm «tuhumlar»ni yesǝ, ɵlidu; «tuhumlar»ni buzsa, ulardin tehi hǝtǝrlik bir yilan qiⱪidu.

□59:6 «ularning torliri kiyim bolalmaydu» — muxu ayǝt wǝ 5-ayǝtkǝ ⱪariƣanda, «torliri» degǝnlik ularning ⱪǝstliri ⱨǝm yamanliⱪlirini diniy niⱪab bilǝn yapidiƣan usullarni bildüridu.

■59:6 Ayup 8:14,15

■59:7 Pǝnd. 1:16; Rim. 3:15

□59:10 «Qǝt yaⱪilarda ɵlüklǝrdǝk yürimiz» — baxⱪa birhil tǝrjimisi: «küqi barlar arisida ɵlüklǝrdǝk yürimiz».

□59:16 «Ⱨǝm Pǝrwǝrdigar kɵrdi; ⱨɵküm-ⱨǝⱪiⱪǝtning yoⱪluⱪi Uning nǝziridǝ intayin yaman bilindi» — Pǝrwǝrdigar Ɵz mɵmin bǝndilirining duasini anglap ixⱪa kirixidu. «xunga uning ɵz biliki ɵzigǝ nijat kǝltürdi» — oⱪurmǝnlǝrning esidǝ boluxi kerǝkki, «Pǝrwǝrdigarning Biliki» Uning dunyaƣa ǝwǝtidiƣan Ⱪutⱪuzƣuqi-Mǝsiⱨi, yǝni «Pǝrwǝrdigarning ⱪuli»dur. Demǝk, Israil ɵzining asiyliⱪi, itaǝtsizlikini, ɵzlirining gunaⱨⱪa taⱪabil turalmaydiƣanliⱪini toluⱪ iⱪrar ⱪilip towa ⱪilƣan waⱪitta, «ⱨeq ⱪutⱪuzƣudǝk adǝm bolmiƣanda», Hudaning xan-xǝripini ǝsligǝ kǝltürüx üqün, xundaⱪla amalsiz ⱪalƣan insanni ⱪutⱪuzux üqün «Pǝrwǝrdigarning Biliki» nijatni elip muxu dunyaƣa kelidu. Ⱪutⱪuzux ixlirini u yalƣuz ada ⱪilidu; «ⱨeq adǝm» uningƣa yardǝm bǝrmǝydu. Yǝnǝ 53-babni kɵrüng.

■59:16 Yǝx. 63:5

■59:17 Əf. 6:17; 1Tes. 5:8

□59:20 «Xuning bilǝn Ⱨǝmjǝmǝt-Ⱪutⱪuzƣuqi Zionƣa kelidu, u Yaⱪup jǝmǝtidikilǝr arisidin itaǝtsizliktin yenip towa ⱪilƣanlarƣa yeⱪinlixidu» — «Rim.» 11:26 kɵrüng.

■59:20 Yǝx. 10:21,22; Rim. 11:26

□59:21 «sening üstünggǝ ⱪonup turƣan Mening Roⱨim» — ǝmdi muxu ayǝttiki «sǝn» degǝn kim? Yuⱪiriⱪi 20-ayǝttǝ «Ⱨǝmjǝmǝt-Ⱪutⱪuzƣuqi Zionƣa kelidu» deyilgǝn. «Ⱨǝmjǝmǝt-Ⱪutⱪuzƣuqi» bolsa, 16-ayǝttiki «Pǝrwǝrdigarning Biliki», yǝni «Pǝrwǝrdigarning ⱪuli»dur. Xübⱨisizki, muxu sɵzlǝr uningƣa, yǝni Mǝsiⱨgǝ deyilidu.