Muⱪeddes Kalam (yǝngi yeziⱪ) Ayup 15

Elifaz yǝnǝ sɵzlǝydu — Yamanlarning aⱪiwiti

1 Temanliⱪ Elifaz buningƣa jawabǝn mundaⱪ dedi: —

2 Danixmǝn kixining ⱪuruⱪ xamaldǝk sǝpsǝtǝ bilǝn jawab berixi toƣrimu?

Danixmǝn ⱪorsiⱪini issiⱪ mǝxriⱪ xamili bilǝn toyƣuzsa bolamdu?

3 Paydisiz sɵzlǝr bilǝn,

Tayini yoⱪ gǝplǝr bilǝn munazirilixixi muwapiⱪmu?

4 Bǝrⱨǝⱪ, sǝn iman-ihlasni yoⱪ ⱪiliwǝtmǝkqisǝn,

Hudaning aldida dua-istiⱪamǝtkǝ tosalƣu bolisǝn.

5 Qünki ⱪǝbiⱨliking aƣzingƣa sɵz salidu,

Sǝn mǝkkarlarning tilini tallap ⱪollinisǝn.

6 Mǝn ǝmǝs, bǝlki ɵz aƣzing ɵzüngning gunaⱨingni bekitidu,

Ɵz lǝwliring sanga ⱪarxi guwaⱨliⱪ beridu.□

7 Sǝn insanlar iqidǝ tunji bolup tuƣulƣanmu?

Sǝn taƣ-dawanlardin awwal apiridǝ bolƣanmu?

8 Tǝngrining mǝhpiy kengixini anglap kǝlgǝnmusǝn?

Danaliⱪ sǝn bilǝnla qǝklinǝmdu?■

9 Sǝn bilgǝnlǝrni bizning bilmǝydiƣanlirimiz barmu?

Sǝn qüxǝngǝnni bizning qüxǝnmǝydiƣinimiz barmu?

10 Aⱪsaⱪallar ⱨǝm ⱪerilar bizning tǝripimizdǝ turidu,

Ular sening atangdinmu yaxta qongdur.□ ■

11 Tǝngrining tǝsǝlliliri,

Yǝni sanga mulayimliⱪ bilǝn eytⱪan muxu sɵz sǝn üqün azliⱪ ⱪilamdu?

12 Nemixⱪa kɵngülning kǝynigǝ kirip ketisǝn?

Kɵzüngni nemigǝ parⱪiritisǝn?

13 Xundaⱪ ⱪilip sǝn roⱨingni Tǝngrigǝ ⱪarxi turƣuzdung,

Eƣizingdin xundaⱪ sɵzlǝrning qiⱪixiƣa yol ⱪoyuwatisǝn!

14 Insan nemǝ idi? Ɵz-ɵzini pakliyaliƣudǝk?

Anidin tuƣulƣan adǝm balisi nemǝ idi? Ⱨǝⱪⱪaniy bolaliƣudǝk?■

15 Ⱪara, Huda Ɵz muⱪǝddǝslirigimu ixǝnmigǝn yǝrdǝ,

Asmanlarmu uning nǝziridǝ pak bolmiƣan yǝrdǝ,□ ■

16 Yirginqlik bolƣan, sesip kǝtkǝn,

Ⱪǝbiⱨlikni su iqkǝndǝk iqidiƣan insan balisi zadi ⱪandaⱪ bolar?□

17 Mǝn sanga kɵrsitǝy, manga ⱪulaⱪ sal;

Kɵzüm kɵrgǝnni bayan ⱪilmaⱪqimǝn.

18 Danixmǝnlǝr ata-bowiliridin bularni angliƣan,

Yoxurmay bularni bayan ⱪilƣan: —

19 (Pǝⱪǝt xularƣila, yǝni ata-bowiliriƣila yǝr-zemin tapxurulƣanidi,

Ularning arisidin yat adǝm ɵtüxkǝ petinalmaytti)□

20 — Rǝzil adǝm barliⱪ künliridǝ azablinidu,

Zalim kixigǝ yillar sanaⱪliⱪla bekitilgǝndur.□

21 Uning ⱪuliⱪiƣa wǝⱨimilǝrning awazi kiridu,

Bayaxatliⱪida bulangqi uning ustigǝ besip qüxidu.■

22 Ⱪarangƣuluⱪtin ⱪutuluxⱪa uning kɵzi yǝtmǝydu,

U ⱪiliq bilǝn qepilixⱪa saⱪlanƣandur.

23 U ax izdǝp: «Zadi nǝdin tepilar?» dǝp yolda tenǝp yüridu,

U zulmǝt künining uningƣa yeⱪinlaxⱪanliⱪini bilidu.□ ■

24 Dǝrd-ǝlǝm ⱨǝm azab uningƣa wǝⱨimǝ ⱪilidu,

Ⱨujumƣa tǝyyar bolƣan padixaⱨtǝk uning üstidin ƣǝlibǝ ⱪilidu.

25 Qünki u Tǝngrigǝ ⱪarxi ⱪolini kɵtürgǝn,

Ⱨǝmmigǝ ⱪadirƣa küq kɵrsǝtmǝkqi bolƣan,

26 Xunga u boynini ⱪattiⱪ ⱪilip,

Kɵp ⱪǝwǝtlik ⱪalⱪanni kɵtürüp uningƣa ⱪarap etilidu.

27 Yüzini yaƣ basⱪan bolsimu,

Beⱪinliri sǝmrǝp kǝtkǝn bolsimu,

28 U harabǝ xǝⱨǝrlǝrdǝ,

Adǝm ⱪonƣusi kǝlmǝydiƣan,

Kesǝk düwiliri boluxⱪa bekitilgǝn ɵylǝrdǝ yaxaydu;□

29 U ⱨeq beyimaydu,

Uning mal-mülki bolsa üzülüp ⱪalidu,

Uning tǝǝlluⱪatliri zemin üstidǝ kengǝymǝydu.

30 U ⱪarangƣuluⱪtin ⱪeqip ⱪutulalmaydu,

Yalⱪun uning xahlirini kɵydürüp ⱪurutidu,

Hudaning bir nǝpisi bilǝn u dunyadin ketidu.□

31 U sahtiliⱪⱪa tayanmisun!

U aldinip kǝtkǝn, xunga sahtiliⱪning ɵzi uning in’ami bolidu;

32 Uning küni tehi toxmay turupla,

Uning xehi tehi kɵkirip bolmayla, bu ixlar ǝmǝlgǝ axurulidu.■

33 Üzüm teli silkinip, tong üzümlǝr qüxürüwetilgǝndǝk,

Zǝytun dǝrihining qeqiki eqilipla tɵkülüp kǝtkǝndǝk bolidu.□

34 Qünki iplaslarning jǝmǝti tuƣmas bolidu,

Ot para yegǝnlǝrning qedirlirini kɵydüriwetidu.

35 Biraⱪ ular ⱨǝrdaim yamanliⱪni oylap, ⱪǝbiⱨlik tuƣduridu,

Kɵnglidǝ ⱨaman ⱨiylǝ-mikir tǝyyarlaydu. ■

Ayup
<
15
>

□15:6 «Ɵz lǝwliring sanga ⱪarxi guwaⱨliⱪ beridu» — Elifaz muxu yǝrdǝ Ayupning Huda aldida jazalanƣan gunaⱨi ⱨǝm ⱨakawurluⱪi uning ɵz aƣzi bilǝn ⱪilƣan aqqiⱪ ⱨǝm ɵtkür sɵzliridǝ kɵrünidu, demǝkqi. Biraⱪ Elifaz bilǝn ikki dostining Ayupning aƣzidin qiⱪⱪan xu aqqiⱪ ɵtkür sɵzlǝrgǝ mǝs’uliyiti bar.

■15:8 Rim. 11:34

□15:10 «Aⱪsaⱪallar ⱨǝm ⱪerilar bizning tǝripimizdǝ turidu... » — Elifaz ilgiriki dǝwrlǝrdiki ata-bowilirining kɵzⱪarixini ɵziningkigǝ ohxax dǝp ⱪarawatidu.

■15:10 Ayup 32:7

■15:14 1Pad. 8:46; 2Tar. 6:36; Ayup 14:4; Zǝb. 14:2-3; 51:5; Pǝnd. 20:9; Top. 7:20; 1Yuⱨa. 1:8,10

□15:15 «Ⱪara, Huda Ɵz muⱪǝddǝslirigimu ixǝnmigǝn yǝrdǝ...» — muxu yǝrdiki «muⱪǝddǝslǝr» Hudaning pǝrixtilirini kɵrsǝtsǝ kerǝk. Elifaz ⱨeliⱪi yaman roⱨning ǝslidǝ uningƣa degǝn gǝplirigǝ (4:15-21) ixinip , ⱪaytilaydu.

■15:15 Ayup 4:18; 25:5

□15:16 «Ⱪǝbiⱨlikni su iqkǝndǝk iqkǝn bir adǝm» — muxu gǝp, xübⱨisizki, Ayupning ɵzini kɵrsitidu.

□15:19 «Pǝⱪǝt xularƣila, yǝni ata-bowiliriƣila yǝr-zemin tapxurulƣanidi, ularning arisidin yat adǝm ɵtüxkǝ petinalmaytti» — Elifaz bu sɵz bilǝn bu ata-bowilarning Huda aldida ⱨǝⱪⱪaniy bolƣanliⱪini, xunga Huda ularning yǝr-zeminini yat adǝmlǝrning basturup kirixidin ⱪoƣdiƣanliⱪini kɵrsǝtmǝkqi; xuning bilǝn ularning mǝdiniyiti urux-jedǝlning dǝhligǝ uqrimay, tǝdriji tǝrǝⱪⱪiy ⱪilip, bilimi pǝlligǝ yǝtkǝnidi, demǝkqi boluxi mumkin.

□15:20 «Rǝzil adǝm barliⱪ künliridǝ azablinidu, zalim kixigǝ yillar sanaⱪliⱪla bekitilgǝndur» — bu sɵz ⱨǝm tɵwǝndiki 35-ayǝtkiqǝ bolƣan sɵzlǝrning ⱨǝmmisi Ayupⱪa biwasitǝ ⱪaritilip deyilgǝn boluxi mumkin.

■15:21 1Tes. 5:3

□15:23 «U ax izdǝp: «Zadi nǝdin tepilar?» dǝp yolda tenǝp yüridu» — baxⱪa birhil tǝrjimisi: «U yoldin tenip ketip, ⱪorultazlar üqün yǝm bolidu».

■15:23 Ayup 18:12; Zǝb. 109:10

□15:28 «U harabǝ xǝⱨǝrlǝrdǝ..., kesǝk düwiliri boluxⱪa bekitilgǝn ɵylǝrdǝ yaxaydu» — ⱪǝdimdǝ bǝzi xǝⱨǝrlǝr Hudaning lǝniti bilǝn wǝyran bolƣan bolup, Hudaning lǝnitigǝ uqriƣan bu jaylarda adǝttiki kixilǝr ularni ⱪaytidin ⱪurup u yǝrdǝ olturaⱪlixixⱪa petinalmaytti. Biraⱪ (Elifazning deyixiqǝ) bu rǝzil kixilǝr (jümlidin Ayupning ɵzi?) Hudadin ⱪorⱪmay undaⱪ yǝrlǝrdǝ turuxtin bax tartmaytti.

□15:30 «Hudaning bir nǝpisi bilǝn u dunyadin ketidu» — ibraniy tilida «Uning bir nǝpisi bilǝn u dunyadin ketidu».

■15:32 Ayup 22:16; Zǝb. 55:23

□15:33 «Üzüm teli silkinip, tong üzümlǝr qüxürüwetilgǝndǝk...» — adǝttǝ üzüm teli pixmiƣan üzümlirini taxlimaydu. Biraⱪ Elifaz xu ohxitixi bilǝn, mundaⱪ adǝmlǝrning ixliri tehi ⱨeq pixmiƣan bolup bikarƣa ketidu, demǝkqi.

■15:35 Zǝb. 7:14; Yǝx. 59:4; Ⱨox. 10:13