Muⱪeddes Kalam (yǝngi yeziⱪ) Ayup 14

Ɵlümdin keyin ⱪandaⱪ bolidu?

1 Anidin tuƣulƣanlarning künliri azdur,

Palakǝt uningƣa yardur. ◘

2 U güldǝk dunyaƣa kelip andin tozuydu,

U ⱪuyax aldidin sayigǝ ohxax ⱪeqip ketidu. ◘

3 Biraⱪ Sǝn tehi xundaⱪ bir ajiz bolƣuqiƣa kɵzüngni tikip,

Meni Ɵz aldingƣa soraⱪⱪa tartiwatamsǝn? ◼ ◘

4 Kim napak nǝrsilǝrdin pak nǝrsini qiⱪiralaydu? — ⱨeqkim! ◼ ◘

5 Insanning künliri bekitilgǝndikin,

Uning aylirining sani Sening ilkingdǝ bolƣandikin,

Sǝn uning ɵtsǝ bolmaydiƣan qǝklirini bekitkǝndikin, ◘

6 Uning bir’az dǝm elixi üqün uningdin kɵzüngni elip ⱪaqⱪin,

Xuning bilǝn mǝdikardǝk uningƣa ɵz künliridin sɵyünüx nesip bolsun! ◼ ◘

7 Qünki dǝrǝh kesiwetilgǝndin keyin, ⱪayta ɵsüxtin ümid bar;

Buningliⱪ bilǝn uning yumran bihliri tügǝp kǝtmǝydu;

8 Uning yiltizi yǝrdǝ ⱪurup kǝtkǝn bolsimu,

Uning kɵtiki topida ɵlüp kǝtkǝn bolsimu,

9 Biraⱪ suning puriⱪi bilǝnla u yǝnǝ kɵkiridu,

Yumran ot-qɵptǝk yengi bihlarni qiⱪiridu.

10 Biraⱪ adǝm bolsa ɵlidu, ilajsiz ongda yatidu, bǝrⱨǝⱪ,

Insan nǝpǝstin ⱪalidu, andin nǝdǝ bolidu?

11 Dengizdiki sular parƣa aylinip tügǝp kǝtkǝndǝk,

Dǝryalar ⱪaƣjirap ⱪurup kǝtkǝndǝk,

12 Ohxaxla adǝm yetip ⱪalsila ⱪaytidin turmaydu;

Asmanlar yoⱪimiƣuqǝ, ular oyƣanmaydu, uyⱪudin turmaydu.

13 Aⱨ, tǝⱨtisaraƣa meni yoxurup ⱪoysang idi,

Ƣǝziping ɵtüp kǝtküqǝ meni mǝhpiy saⱪlap ⱪoysang idi,

Meni esinggǝ alidiƣan bir waⱪit-saǝtni manga bekitip bǝrsǝng idi! ◼

14 Adǝm ɵlsǝ, ⱪayta yaxamdu?

Xundaⱪ bolsa manga xundaⱪ ɵzgirix waⱪti kǝlgüqǝ,

Muxu japaƣa tolƣan künlirim ɵtküqǝ, sǝwr-taⱪǝt bilǝn kütǝttim! ◼

15 Xundaⱪ bolsa Sǝn meni qaⱪirsang, jawab berǝttim;

Sǝn Ɵz ⱪolung bilǝn yaratⱪiningƣa ümid-arzuyung bolatti. ◼

16 Biraⱪ Sǝn ⱨazir ⱨǝrbir dǝssigǝn ⱪǝdǝmlirimni sanap,

Gunaⱨimni kɵzitiwatisǝnƣu! ◼ ◘

17 Itaǝtsizlikim haltiƣa selinip peqǝtlǝndi,

Gunaⱨlirimni dɵwǝ-dɵwǝ ⱪilip saⱪlap ⱪoydung. ◼

18 Dǝrwǝⱪǝ taƣmu yimirilip yoⱪalƣandǝk,

Tax ɵz ornidin tǝwrinip kǝtkǝndǝk,

19 Sular tax-xeƣillarni upritip yoⱪatⱪandǝk,

Topanlar zemindiki topini süpürüp kǝtkǝndǝk,

Sǝn adǝmning ümidini yoⱪ ⱪilisǝn.

20 Sǝn mǝnggügǝ uning üstidin ƣalib kelisǝn,

Xunga u dunyadin ketidu; uning qirayini tutuldurisǝn,

Uni Ɵz yeningdin yiraⱪ ⱪilisǝn.

21 Uning oƣulliri ⱨɵrmǝtkǝ erixidu, biraⱪ u buni bilmǝydu;

Ular pǝs ⱪilinsimu,

Biraⱪ uning bulardinmu hǝwiri bolmaydu.

22 U pǝⱪǝt ɵz tenidiki aƣriⱪidinla azablinidu,

U kɵnglidǝ ɵzi üqünla ⱨǝsrǝt-nadamǝt qekidu. ◼

Ayup
<
14
>

◘14:1 Zǝb. 90:5-6, 9-10; 102:11; 103:15; 144:4; Yaⱪ. 4:14

◘14:2 Ayup 8:9; Zǝb. 90:5-6, 9-10; 102:11; 103:15; 144:4; Yǝx. 40:6; 1Pet. 1:24

◼14:3 «Meni Ɵz aldingƣa soraⱪⱪa tartiwatamsǝn?» — yaki «Uni Ɵz aldingƣa soraⱪⱪa tartiwatamsǝn?».

◘14:3 Ayup 7:17,18; 10:20

◼14:4 «Kim napak nǝrsilǝrdin pak nǝrsini qiⱪiralaydu? — ⱨeqkim!» — demǝk, insan balisi Hudaning aldida ⱪandaⱪ ⱪilip pak bolalaydu ⱨǝm ⱪobul ⱪilinalaydu? Ayupning ɵzi 19-babta bexarǝt ⱪilip bu soalƣa jawab beridu.

◘14:4 Yar. 5:3; Zǝb. 51:5-7; Yuⱨ. 3:6; Rim. 5:12; Əf. 2:3

◘14:5 Ayup 7:1

◼14:6 «Uning bir’az dǝm elixi üqün ... mǝdikardǝk uningƣa ɵz künliridin sɵyünüx nesip bolsun!» — Ayupning degini boyiqǝ insanlarƣa adǝttiki turmuxning (mǝdikarningkidǝk) japasi kupayǝ, xunga u bu japaliⱪ ⱨayat künliridin azraⱪⱪinǝ ⱨuzur alsun, «bu adǝttiki japaƣa tehimu kɵp japa artmiƣaysǝn» degǝn mǝnidǝ.

◘14:6 Ayup 7:1, 2, 16, 19; 10:20

◼14:13 «tǝⱨtisara» — ɵlgǝnlǝrning roⱨliri baridiƣan jayni kɵrsitidu. Yǝnila 7-bab, 9-ayǝttiki izaⱨatni kɵrüng.

◼14:14 «Adǝm ɵlsǝ, ⱪayta yaxamdu? Xundaⱪ bolsa ... sǝwr-taⱪǝt bilǝn kütǝttim!» — Ayupning insanning ülümdin (yǝni tǝⱨtisaradin) tirilixi toƣrisida hǝwiri yoⱪ. Biraⱪ u bundaⱪ ix bolsila, nǝⱪǝdǝr yahxi bolatti, undaⱪ ümid wǝ sǝwr-taⱪǝt bilǝn Hudaning orunlaxturuxini («xundaⱪ ɵzgirix»ni) kütǝttim, dǝydu. Keyin u ɵzining tirilixi toƣruluⱪ bexarǝt beridu (19-babta).

◼14:15 «Xundaⱪ bolsa ... Sǝn Ɵz ⱪolung bilǝn yaratⱪiningƣa ümid-arzuyung bolatti» — Ayup yǝnila Hudaning Ɵzi tüjüpilǝp yaratⱪan ⱨǝmmǝ insanƣa bolƣan ajayib ümid-arzusiƣa etiⱪad ⱪilƣanliⱪini bildüridu.

◼14:16 «Biraⱪ Sǝn ⱨazir ⱨǝrbir dǝssigǝn ⱪǝdǝmlirimni sanap...» — yaki «Qünki Sǝn ⱨazir ⱨǝrbir dǝssigǝn ⱪǝdǝmlirimni sanap...».

◘14:16 Ayup 31:4; 34:21; Zǝb. 56:8; 139:1-5; Pǝnd. 5:21; Yǝr. 32:19

◼14:17 «Itaǝtsizlikim haltiƣa selinip peqǝtlǝndi...» — bǝzi tǝrjimanlar Ayupning muxu sɵzlirining mǝnisini, Huda Ayupning gunaⱨlirini yapⱪanikǝn, dǝp ⱪaraydu. Biz ǝksiqǝ, Ayupning muxu sɵzining mǝnisini Huda uni tehimu ǝyiblǝx üqün gunaⱨlirini dɵwǝ-dɵwǝ ⱪilip peqǝtlǝp saⱪlap ⱪoyƣan, dǝp qüxinimiz.

◼14:22 «U pǝⱪǝt ɵz tenidiki aƣriⱪidinla azablinidu, ... ⱨǝsrǝt-nadamǝt qekidu» — Ayup muxu yǝrdǝ insan gɵrgǝ qüxkǝndin keyin ɵz tenining qirip kǝtkǝnlikini ⱨes ⱪilip ⱪiynilidu, dǝp oyliƣan boluxi mumkin.