Muⱪeddes Kalam (yǝngi yeziⱪ) Ayup 31

Ɵzini aⱪlax üqün ⱪǝsǝm iqix

1 «Mǝn kɵzüm bilǝn ǝⱨdilǝxkǝn;

Xuning üqün mǝn ⱪandaⱪmu ⱪizlarƣa ⱨǝwǝs ⱪilip kɵz taxlap yürǝy?□

2 Undaⱪ ⱪilsam üstümdiki Tǝngridin alidiƣan nesiwǝm nemǝ bolar?

Ⱨǝmmigǝ ⱪadirdin alidiƣan mirasim nemǝ bolar?

3 Bu gunaⱨning nǝtijisi ⱨǝⱪⱪaniysizlarƣa bala-ⱪaza ǝmǝsmu?

Ⱪǝbiⱨlik ⱪilƣanlarƣa külpǝt ǝmǝsmu?

4 U mening yollirimni kɵrüp turidu ǝmǝsmu?

Ⱨǝrbir ⱪǝdǝmlirimni sanap turidu ǝmǝsmu?■

5 Əgǝr sahtiliⱪⱪa ⱨǝmraⱨ bolup mangƣan bolsam’idi!

Əgǝr putum aldamqiliⱪ bilǝn billǝ boluxⱪa aldiriƣan bolsa,

6 (Mǝn adilliⱪ mizaniƣa ⱪoyulƣan bolsam’idi!

Undaⱪta Tǝngri ǝyibsizlikimdin hǝwǝr alalaytti!)

7 Əgǝr ⱪǝdimim yoldin qiⱪⱪan bolsa, kɵnglüm kɵzümgǝ ǝgixip mangƣan bolsa,

Əgǝr ⱪolumƣa ⱨǝrⱪandaⱪ daƣ qaplaxⱪan bolsa,

8 Undaⱪta mǝn teriƣanni baxⱪa birsi yesun!

Bihlirim yulunup taxliwetilsun!□

9 Əgǝr ⱪǝlbim mǝlum bir ayaldin azdurulƣan bolsa,

Xu niyǝttǝ ⱪoxnamning ixik aldida paylap turƣan bolsam,■

10 Ɵz ayalim baxⱪilarning tügminini tartidiƣan küngǝ ⱪalsun,

Baxⱪilar uni ayaⱪ asti ⱪilsun.□

11 Qünki bu ǝxǝddiy nomusluⱪ gunaⱨtur;

U soraⱪqilar tǝripidin jazalinixi kerǝktur.

12 Bu gunaⱨ bolsa adǝmni ⱨalak ⱪilƣuqi ottur;

U mening barliⱪ tapⱪanlirimni yulup alƣan bolatti.

13 Əgǝr ⱪulumning yaki dedikimning manga ⱪarita ǝrzi bolƣan bolsa,

Ularning dǝwasini kɵzümgǝ ilmiƣan bolsam,

14 Undaⱪta Tǝngri meni soraⱪⱪa tartixⱪa ornidin turƣanda ⱪandaⱪ ⱪilimǝn?

Əgǝr U mǝndin soal-soraⱪ alimǝn dǝp kǝlsǝ,

Mǝn Uningƣa ⱪandaⱪ jawab berimǝn?■

15 Meni baliyatⱪuda apiridǝ ⱪilƣuqi ularnimu apiridǝ ⱪilƣan ǝmǝsmu.

Mǝn bilǝn u ikkimizni anilirimizning baliyatⱪusida tɵrǝldürgüqi bir ǝmǝsmu?■

16 Əgǝr miskinlǝrni ɵz arzu-ümidliridin tosⱪan bolsam,

Əgǝr tul hotunning kɵz nurini ⱪarangƣulaxturƣan bolsam,

17 Yaki ɵzümning bir qixlǝm nenimni yalƣuz yegǝn bolsam,

Uni yetim-yesir bilǝn billǝ yemigǝn bolsam

18 (Əmǝliyǝttǝ yax waⱪtimdin tartip oƣli ata bilǝn billǝ bolƣandǝk umu mǝn bilǝn billǝ turƣanidi,

Apamning ⱪorsiⱪidin qiⱪⱪandin tartipla tul hotunning yɵlǝnqüki bolup kǝldim),

19 Əgǝr kiyim-keqǝk kǝmlikidin ⱨalak bolay degǝn birigǝ,

Yaki qapansiz bir yoⱪsulƣa ⱪarap olturƣan bolsam,

20 Əgǝr uning bǝlliri kiyimsiz ⱪelip manga bǝht tilimigǝn bolsa,

Əgǝr u ⱪozilirimning yungida issinmiƣan bolsa,

21 Əgǝr xǝⱨǝr dǝrwazisi aldida «Ⱨɵküm qiⱪarƣanlar arisida mening yɵlǝnqüküm bar» dǝp,

Yetim-yesirlarƣa ziyankǝxlik ⱪilixⱪa ⱪol kɵtürgǝn bolsam,

22 Undaⱪta mürǝm taƣiⱪidin ajrilip qüxsun!

Bilikim ügisidin sunup kǝtsun!

23 Qünki Tǝngri qüxürgǝn balayi’apǝt meni ⱪorⱪunqⱪa salmaⱪta idi,

Uning ⱨǝywitidin undaⱪ ixlarni ⱪǝt’iy ⱪilalmayttim.

24 Əgǝr altunƣa ixinip uni ɵz tayanqim ⱪilƣan bolsam,

Yaki sap altunƣa: «Yɵlǝnqükümsǝn!» degǝn bolsam,■

25 Əgǝr bayliⱪlirim zor bolƣanliⱪidin,

Yaki ⱪolum alƣan ƣǝniymǝttin xadlinip kǝtkǝn bolsam,■

26 Əgǝr mǝn ⱪuyaxning julasini qaqⱪanliⱪini kɵrüp,

Yaki ayning aydingda mangƣanliⱪini kɵrüp,■

27 Kɵnglüm astirtin azdurulƣan bolsa,

Xundaⱪla bularƣa qoⱪunup aƣzim ⱪolumni sɵygǝn bolsa,

28 Bumu soraⱪqi aldida gunaⱨ dǝp ⱨesablinatti,

Qünki xundaⱪ ⱪilƣan bolsam mǝn yuⱪirida turƣuqi Tǝngrigǝ wapasizliⱪ ⱪilƣan bolattim.

29 Əgǝr manga nǝprǝtlǝngǝn kixining ⱨalakitigǝ ⱪariƣinimda xadlinip kǝtkǝn bolsam,

Bexiƣa külpǝt qüxkǝnlikidin huxal bolƣan bolsam —■

30 (Əmǝliyǝttǝ u tügǝxsun dǝp ⱪarƣap, uning ɵlümini tilǝp aƣzimni gunaⱨ ɵtküzüxkǝ yol ⱪoymiƣanmǝn)■

31 Əgǝr qedirimdikilǝr mǝn toƣruluⱪ: «Hojayinimizning dastihinidin yǝp toyunmiƣan ⱪeni kim bar?» demigǝn bolsa,□

32 (Musapirlardin koqida ⱪalƣini ǝzǝldin yoⱪtur;

Qünki ixikimni ⱨǝrdaim yoluqilarƣa eqip kǝlgǝnmǝn)■

33 Əgǝr Adǝm’atimizdǝk itaǝtsizliklirimni yapⱪan,

Ⱪǝbiⱨlikimni kɵnglümgǝ yoxurƣan bolsam,

34 Ⱨǝmdǝ xuning üqün pütkül halayiⱪ aldida uning axkarilinixidin ⱪorⱪup yürgǝn bolsam,

jǝmiyǝtning kǝmsitixliri manga wǝⱨimǝ ⱪilƣan bolsa,

Xuning bilǝn mǝn talaƣa qiⱪmay yürgǝn bolsam,... □

35 — Aⱨ, manga ⱪulaⱪ salƣuqi birsi bolsidi!

Mana, imzayimni ⱪoyup berǝy;

Ⱨǝmmigǝ Ⱪadir manga jawab bǝrsun!

Rǝⱪibim mening üstümdin ǝrz yazsun!□

36 Xu ǝrzni zimmǝmgǝ artattim ǝmǝsmu?

Qoⱪum tajlardǝk beximƣa kiyiwalattim.

37 Mǝn Uningƣa ⱪǝdǝmlirimning pütün sanini ⱨesablap berǝttim;

Xaⱨzadidǝk mǝn Uning aldiƣa barattim.□

38 Əgǝr ɵz etizlirim manga ⱪarxi guwaⱨ bolup quⱪan kɵtürsǝ,

Uning qünǝkliri bilǝn birgǝ yiƣlaxsa,

39 Qünki qiⱪarƣan mewisini ⱨǝⱪ tɵlimǝy yegǝn bolsam,

Ⱨɵddigǝrlǝrni ⱨalsizlandurup nǝpisini tohtatⱪan bolsam,

40 Undaⱪta buƣdayning ornida xumbuya ɵssun!

Arpining ornida mǝstǝk ɵssun.

Mana xuning bilǝn mǝn Ayupning sɵzliri tamam wǝssalam!» □

Ayup
<
31
>

□31:1 «Mǝn kɵzüm bilǝn ǝⱨdilǝxkǝn; xuning üqün mǝn ⱪandaⱪmu ⱪizlarƣa ⱨǝwǝs ⱪilip kɵz taxlap yürǝy?» — mana biz bu yǝrdin Ayupning ɵzining birdin bir ⱨǝmriyi bolƣan ayaliƣa sadiⱪ bolup ɵtkǝnlikini kɵrüwalalaymiz. U ɵz ayaliƣa pǝⱪǝt sirttin ⱪariƣandila ǝmǝs, bǝlki qin yürikidin sadaⱪǝtmǝn idi. U bu babta nixan ⱪilƣan pǝzilǝt, Mǝsiⱨ Əysa Injilda tǝlǝp ⱪilƣan pǝzilǝtkǝ naⱨayiti yeⱪin kelidu (yǝni, adǝmning ⱪǝlb-oylirini baxⱪuridiƣan ⱨǝⱪⱪaniyliⱪ ⱨǝm meⱨir-muⱨǝbbǝt). Injil, «Matta» 5-7-babni kɵrüng.

■31:4 2Tar. 16:9; Ayup 34:21; Pǝnd. 5:21; 15:3; Yǝr. 32:19

□31:8 «Bihlirim yulunup taxliwetilsun!» — «bihlirim» degǝn sɵzning «balilirim» degǝn kɵqmǝ mǝnisimu bar.

■31:9 Ayup 24:15; Pǝnd. 7:25

□31:10 «Ɵz ayalim baxⱪilarning tügminini tartidiƣan küngǝ ⱪalsun» — baxⱪa bir hil tǝrjimisi: «Ayalim baxⱪa birsi bilǝn billǝ bolsun».

■31:14 Zǝb. 44:20-21

■31:15 Ayup 34:19; Pǝnd. 14:31; 17:5

■31:24 Mar. 10:24; 1Tim. 6:17

■31:25 Zǝb. 62:10

■31:26 Ⱪan. 4:19

■31:29 Pǝnd. 17:5

■31:30 Mat. 5:44; Rim. 12:14

□31:31 «Əgǝr qedirimdikilǝr mǝn toƣruluⱪ: «hojayinimizning dastihinidin yǝp toyunmiƣan ⱪeni kim bar?» demigǝn bolsa...» — dǝrwǝⱪǝ, Ayupning bu gepi ⱨǝm xuningƣa ohxax nurƣun sɵzliri ⱨǝⱪiⱪǝt bolmiƣan bolsa, ǝmdi ɵz yurtidikilǝr, qedirdikilǝr uni anglapla guwaⱨliⱪ ⱪilip dǝrⱨal inkar ⱪilatti.

■31:32 Ibr. 13:2; 1Pet. 4:9

□31:34 «Əgǝr Adǝm’atimizdǝk itaǝtsizliklirimni yapⱪan... ... jǝmiyǝtning kǝmsitixliri manga wǝⱨimǝ ⱪilƣan bolsa, xuning bilǝn mǝn talaƣa qiⱪmay yürgǝn bolsam,...» — (33-34-ayǝt) ǝslidǝ Adǝm’atimiz gunaⱨini Hudadin yoxurmaⱪqi bolup dǝrǝhlǝr iqigǝ mɵküwalƣanidi. Əmiliyǝttǝ adǝm ɵz gunaⱨlirini Hudaning aldida oquⱪ-axkara etirap ⱪilsila dǝrⱨal uning yardimigǝ erixǝlǝydu. Xundaⱪ ⱪaraymizki, Ayup muxu yǝrdǝ «Əgǝr gunaⱨ ⱪilƣan bolsam, Hudaning aldida etirap ⱪilattim; undaⱪta halayiⱪtin ⱨeq ⱪorⱪmayttim» demǝkqi. Bǝzi adǝmlǝrning gunaⱨ ⱪilmasliⱪining birdinbir sǝwǝbi baxⱪilarning kɵrüp ⱪalmasliⱪi üqün bolidu — yǝni halayiⱪning pikridin bolƣan ⱪorⱪunqisidinla, halas. Ayup ⱨǝrgiz bundaⱪ hildiki adǝmlǝrdin ǝmǝs, ⱨǝrdaim Hudani ɵz aldida ǝng aliy orunƣa ⱪoyidu.

□31:35 «Ⱨǝmmigǝ Ⱪadir manga jawab bǝrsun! Rǝⱪibim mening üstümdin ǝrz yazsun!» — biz «mening rǝⱪibim» degǝn bu sɵzni yǝnila Hudani kɵrsitidu, dǝp tǝⱨlil ⱪilimiz. Yǝnǝ bǝzi xǝrⱨqilǝr uni Ayupning üq dostlini kɵrsitidu, dǝp ⱪaraydu.

□31:37 «Mǝn uningƣa ⱪǝdǝmlirimning pütün sanini ⱨesablap berǝttim» — «Uningƣa» yǝni Hudaƣa, demǝkqi.

□31:40 «Arpining ornida mǝstǝk ɵssun!» — «mǝstǝk» buƣdayƣa ziyan yǝtküzidiƣan birhil ɵsümlük; yǝnǝ «kürmǝk» dǝpmu atilidu.