Muⱪeddes Kalam (yǝngi yeziⱪ) Ayup 10

Seƣiz lay kulalqi bilǝn sɵzlixidu

1 Mǝn ɵz jenimdin nǝprǝtlinimǝn;

Ɵz dǝrdimni tɵküwalay;

Ⱪǝlbimdiki aⱨ-zarimni sɵzliwalay.

2 Mǝn Tǝngrigǝ: «Mening gunaⱨimni bekitmǝ; manga kɵrsǝtkinki,

Sǝn zadi nemǝ üqün mǝn bilǝn dǝwalixisǝn?

3 Adǝmni ǝzgining,

Ɵz ⱪolung bilǝn yaratⱪiningni qǝtkǝ ⱪaⱪⱪining Sanga paydiliⱪmu?

Yamanlarning suyiⱪǝstigǝ nur qaqⱪining yahximu?□

4 Sening kɵzüng insanningkidǝk ajizmu?

Sǝn adǝmlǝr kɵrgǝndǝk hirǝ kɵrǝmsǝn?□

5 Sening künliring ɵlidiƣan insanning künliridǝk qǝklikmu?

Sening yilliring insanning yilliridǝk ⱪisⱪimu?□

6-7 Sǝn mening rǝzil adǝm ǝmǝslikimni bilip turup,

Sening ⱪolungdin ⱪutuldurƣudǝk ⱨeqkimning yoⱪluⱪini bilip turup,

Nemixⱪa mening hataliⱪimni sorap yürisǝn?

Nemixⱪa mening gunaⱨimni sürüxtürisǝn?» — dǝymǝn.

8 — Sǝn Ɵz ⱪolliring bilǝn meni xǝkillǝndürüp, bir gǝwdǝ ⱪilip yaratⱪansǝn;

Biraⱪ Sǝn meni yoⱪatmaⱪqisǝn!

9 Sǝn layni yasiƣandǝk meni yasiƣiningni esingdǝ tutⱪaysǝn, dǝp yelinimǝn;

Sǝn meni yǝnǝ tupraⱪⱪa ⱪayturamsǝn?■

10 Sǝn ustiliⱪ bilǝn meni süttǝk ⱪuyup qayⱪap,

Meni irimqiktǝk uyutⱪan ǝmǝsmu?□ ■

11 Sǝn terǝ ⱨǝm ǝt bilǝn meni kiyindürgǝnsǝn,

Ustihan ⱨǝm pǝy bilǝn birlǝxtürüp meni toⱪuƣansǝn.

12 Sǝn manga ⱨayat ⱨǝm meⱨir-xǝpⱪǝt tǝⱪdim ⱪilƣansǝn,

Sǝn sɵygüng bilǝn roⱨimdin hǝwǝr alding.□

13 Biraⱪ bu ixlar Sening ⱪǝlbingdǝ yoxuruⱪluⱪ idi;

Bularning ǝslidǝ ⱪǝlbingdǝ püküklikini bilimǝn.

14 Gunaⱨ ⱪilƣan bolsam, Sǝn meni kɵzitip yürgǝn bolatting;

Sǝn mening ⱪǝbiⱨlikimni jazalimay ⱪoymaytting.

15 Rǝzil ⱨesablanƣan bolsam, manga bala kelǝtti!

Ⱨǝm yaki ⱨǝⱪⱪaniy ⱨesablansammu, ⱪattiⱪ nomusⱪa qɵmüp, azabⱪa qɵmginimdǝ,

Beximni yǝnila kɵtürüxkǝ jür’ǝt ⱪilalmayttim;

16 Ⱨǝtta beximni kɵtürüxkǝ jür’ǝt ⱪilsammu,

Sǝn ǝxǝddiy xirdǝk mening peyimgǝ qüxǝtting;

Sǝn manga karamǝt küqüngni arⱪa-arⱪidin kɵrsitǝtting.■

17 Sǝn meni ǝyiblǝydiƣan guwaⱨqiliringni ⱪaytidin aldimƣa kǝltürisǝn;

Manga ⱪaritilƣan ƣǝzipingni zor ⱪilisǝn;

Küqliring manga ⱪarxi dolⱪunlap kǝlmǝktǝ.□

18 Sǝn ǝslidǝ nemixⱪa meni baliyatⱪudin qiⱪarƣansǝn?

Kaxki, mǝn qaqrap kǝtkǝn bolsam, ⱨeq adǝm meni kɵrmǝs idi!■

19 Mǝn ⱨeqⱪaqan bolmiƣan bolattim!

Baliyatⱪudin biwasitǝ gɵrgǝ apirilƣan bolattim!

20-22 Mening azƣinǝ künlirim tügǝy degǝn ǝmǝsmu?

Xunga mǝn barsa kǝlmǝs yǝrgǝ barƣuqǝ,

— Ⱪarangƣuluⱪ, ɵlüm sayǝ bolƣan zeminƣa,

— Zulmǝt bir zeminƣa, yǝni ⱪarangƣuluⱪning ɵzining zeminiƣa,

Ɵlüm sayisining zeminiƣa,

Tǝrtipsiz, ⱨǝtta ɵz nuri ⱪapⱪarangƣu ⱪilinƣan xu zeminƣa barƣuqǝ,

Manga azraⱪ jan kirix üqün,

Ixingni bir dǝⱪiⱪǝ tohtat, mǝndin neri bol!».

Ayup
<
10
>

□10:3 «Ɵz ⱪolung bilǝn yaratⱪiningni qǝtkǝ ⱪaⱪⱪining Sanga paydiliⱪmu?» — Ayup bǝlkim: — «Sǝn manga ⱨǝm pütün insanƣa xunqǝ yahxi ǝjringni singdurgǝnikǝnsǝn, nemixⱪa bu yahxi nǝrsǝnggǝ xundaⱪ ziyan yǝtküzisǝn?» demǝkqi. U tɵwǝndiki 8-12-ayǝtlǝrdǝ bu sɵzining mǝnisini kengǝytidu.

□10:4 «Sening kɵzüng insanningkidǝk ajizmu?» — ibraniy tilida: «Sening kɵzliri ǝtlik kɵzlǝrmu?».

□10:5 «sening künliring ... qǝklikmu? Sening yilliring insanning yilliridǝk ⱪisⱪimu?» — Ayup bu jümliliridǝ ⱨǝmmǝ imkaniyǝtni ottura ⱪoyidu; andin u ⱨǝmmisini degüdǝk qǝtkǝ ⱪaⱪidu — Huda adǝmni ǝzginigǝ huxalmu-ya? U adǝmdǝk kaltǝ pǝmlikmu-ya, yaki uning ɵmri ⱪisⱪa bolup ɵzini jazalaxⱪa ülgürǝlmǝmdu-ya? (undaⱪ bolmisa, mǝn zadi nemixⱪa xundaⱪ azabⱪa ⱪaldurulimǝn?) dǝp oylaydu Ayup.

■10:9 Yar. 2:7; 3:19

□10:10 «Sǝn ... meni irimqiktǝk uyutⱪan ǝmǝsmu?» — Ayupning «meni süttǝk ⱪuyup qayⱪap, ... irimqiktǝk uyutⱪan» degǝn sɵzliri Hudaning ɵz tenini xunqǝ ajayibliⱪ bilǝn murǝkkǝp yaratⱪanliⱪini bildüridu.

■10:10 Zǝb. 139:15,16

□10:12 «Sǝn sɵygüng bilǝn...» — ibraniy tilida: «sǝn yoⱪlixing bilǝn...». «... Sǝn sɵygüng bilǝn roⱨimdin hǝwǝr alding» — 8-12-ayǝttǝ, Ayup Hudaning insanning tenini xunqǝ karamǝt ustiliⱪ bilǝn birlǝxtürüp yasap, xǝpⱪǝt-sɵygü kɵrsǝtkǝndin keyin, Hudaning ⱨǝrbir adǝmgǝ nisbǝtǝn uluƣ, karamǝt bir pilani boluxi kerǝk, dǝp ⱪaraydu. Biraⱪ Ayup ɵzining ixida mundaⱪ ajayib pilanni kɵrǝlmǝy, ǝksiqǝ Hudaning uning barliⱪini astin-üstün ⱪiliwǝtkǝnlikini kɵrüp ⱪorⱪup ketip: «Biraⱪ bu ixlar sening ⱪǝlbingdǝ yoxuruⱪluⱪ idi» (13-ayǝt) dǝp, Huda mening dostum ǝmǝs, düxminim bolup qiⱪⱪan dǝp gumanlinidu. Ayupning Hudaning dostluⱪidin mǝⱨrum bolƣanmǝn degǝn ⱨessiyati wǝ uningda Hudaning uning bilǝn billǝ bolƣanliⱪ sezimining yoⱪluⱪi, xübⱨisizki uning üqün ⱨǝmmidin azabliⱪ ix idi.

■10:16 Yǝx. 38:13; Yiƣ. 3:10

□10:17 «Meni ǝyiblǝydiƣan guwaⱨqiliring» — Ayupning bu degini, bǝlkim, Hudaning uni «Sǝn gunaⱨ ⱪilding, xunga jazalanding» dǝp ǝyiblǝydiƣan birnǝqqǝ guwaⱨqini orunlaxturƣan, dǝp kɵrsǝtmǝkqi; guwaⱨqilar bolsa, uning üq dostini, ɵz bexiƣa qüxkǝn külpǝtlǝrni ⱨǝmdǝ kesǝlning azablirini ɵz iqigǝ alsa kerǝk.

■10:18 Ayup 3:11