1 Nǝƣmiqilǝrning bexiƣa tapxurulup oⱪulsun dǝp, Dawut yazƣan küy: —

I mǝdⱨiyǝmning Igisi Hudayim, jim turma!

2 Mana rǝzillǝrning aƣzi, mǝkkarlarning aƣzi kɵz aldimda yoƣan eqildi;

Ular yalƣanqi til bilǝn manga ⱪarxi sɵzlidi.

3 Nǝprǝtlik sɵzlǝr bilǝn meni qulƣap,

Ular bikardin-bikar manga zǝrbǝ bǝrmǝktǝ.■Zǝb. 69:4

4 Muⱨǝbbitim üqün ular manga ⱪarxi xikayǝtqi boldi,

Mǝn bolsam — duaƣa berildim.

5 Yahxiliⱪim üqün yamanliⱪ,

Sɵygüm üqün nǝprǝt ⱪayturdi.

6 Ⱨǝrbirining üstidǝ rǝzil bir adǝm tǝyinligǝysǝn,

Uning ong yenida bir dǝwagǝr tursun.■Zǝk. 3:1, 2

7 U soraⱪ ⱪilinƣanda ǝyibdar bolup qiⱪsun,

Duasi gunaⱨ dǝp ⱨesablansun.■Pǝnd. 15:8; 28:9

8 Künliri ⱪisⱪa bolsun,

Mǝnsipini baxⱪisi igilisun.

9 Baliliri yetim ⱪalsun,

Hotuni tul bolsun.

10 Oƣulliri sǝrgǝrdan tilǝmqi bolsun,

Turƣan harabilikliridin nan izdǝp.

11 Jazanihor uning igiliki üstigǝ tor taxlisun,

Meⱨnǝt ǝjrini yatlar bulap-talisun.

12 Uningƣa meⱨribanliⱪ kɵrsitidiƣan birsi bolmisun,

Yetim ⱪalƣan baliliriƣa iltipat ⱪilƣuqi bolmisun.

13 Uning nǝsli ⱪurutulsun;

Kelǝr ǝwladida namliri ɵqürülsun.

14 Ata-bowilirining ⱪǝbiⱨlikining ǝyibliri Pǝrwǝrdigarning yadida ⱪalsun,

Anisining gunaⱨi ɵqürülmisun.

15 Bularning ǝyibliri daim Pǝrwǝrdigarning kɵz aldida bolsun,

Xuning bilǝn U ularning nam-ǝmilini yǝr yüzidin ɵqürüp taxlaydu.■Ayup 18:17; Zǝb. 34:16

16 Qünki rǝzil kixi meⱨribanliⱪ kɵrsitixni ⱨeq esigǝ kǝltürmidi,

Bǝlki ezilgǝn, yoⱪsul ⱨǝm dili sunuⱪlarni ɵltürmǝkkǝ ⱪoƣlap kǝldi.

17 U lǝnǝt oⱪuxⱪa amraⱪ idi,

Xunga lǝnǝt uning bexiƣa kelidu;

Bǝht tilǝxkǝ rayi yoⱪ idi,

Xunga bǝht uningdin yiraⱪ bolidu.

18 U lǝnǝtlǝrni ɵzigǝ kiyim ⱪilip kiygǝn;

Xunga bular aⱪⱪan sudǝk uning iq-baƣriƣa,

Maydǝk, sɵngǝklirigǝ kiridu;

19 Bular uningƣa yepinƣan tonidǝk,

Ⱨǝrdaim baƣlanƣan bǝlweƣidǝk qaplansun.

20 Bular bolsa meni ǝyibligüqilǝrgǝ Pǝrwǝrdigarning bekitkǝn mukapati bolsun!

Mening yaman gepimni ⱪilƣanlarning in’ami bolsun!

21 Biraⱪ Sǝn, Pǝrwǝrdigar Rǝbbim,

Ɵz naming üqün mening tǝripimdǝ bir ix ⱪilƣaysǝn,

Meⱨir-muⱨǝbbiting ǝla bolƣaqⱪa,

Meni ⱪutⱪuzƣaysǝn;

22 Qünki mǝn ezilgǝn ⱨǝm ⱨajǝtmǝndurmǝn,

Ⱪǝlbim hǝstǝ boldi.

23 Mǝn ⱪuyax uzartⱪan kɵlǝnggidǝk yoⱪilay dǝp ⱪaldim,

Qekǝtkǝ ⱪeⱪiwetilgǝndǝk qǝtkǝ ⱪeⱪiwetildim.

24 Roza tutⱪinimdin tizlirim ketidu,

Ətlirim sizip ketidu.

25 Xunglaxⱪa mǝn ular aldida rǝswa boldum;

Ular manga ⱪaraxⱪanda, bexini silkixmǝktǝ.

26 Manga yardǝmlǝxkǝysǝn, i Pǝrwǝrdigar Hudayim,

Ɵzgǝrmǝs muⱨǝbbiting boyiqǝ meni ⱪutⱪuzƣaysǝn;

27 Xuning bilǝn ular buning Sening ⱪolungdiki ix ikǝnlikini,

Buni ⱪilƣuqining Sǝn Pǝrwǝrdigar ikǝnlikini bilsun.

28 Ular lǝnǝt oⱪuwǝrsun, Sǝn bǝht ata ⱪilƣaysǝn;

Ular ⱨujum ⱪilixⱪa turƣanda, hijalǝttǝ ⱪalsun,

Biraⱪ ⱪulung xadlansun!

29 Meni ǝyibligüqilǝr hijalǝt bilǝn kiyinsun,

Ular ɵz xǝrmǝndilikini ɵzlirigǝ ton ⱪilip yepinsun.

30 Aƣzimda Pǝrwǝrdigarƣa zor tǝxǝkkür-mǝdⱨiyǝ ⱪaytürimǝn;

Bǝrⱨǝⱪ, kɵpqilik arisida turup Uni mǝdⱨiyilǝymǝn;

31 Qünki ⱨajǝtmǝnning jenini gunaⱨⱪa bekitmǝkqi bolƣanlardin ⱪutⱪuzux üqün,

Pǝrwǝrdigar uning ong yenida turidu.