Ayup
1
Ihlasmǝnlik ⱨǝm awatliⱪ
1 «Uz» degǝn yurtta, Ayup isimlik bir adǝm yaxiƣanidi. Bu adǝm bolsa ⱪusursiz, durus, Hudadin ⱪorⱪidiƣan, yamanliⱪtin ɵzini yiraⱪ tutidiƣan adǝm idi. ◘Ayup 2:3
2 Uningdin yǝttǝ oƣul wǝ üq ⱪiz tuƣuldi. 3 Uning yǝttǝ ming ⱪoy, üq ming tɵgǝ, bǝx yüz jüp kala, bǝx yüz mada exǝk ⱪatarliⱪ mal-mülki bar idi. Uning malayliri bǝk kɵp idi; u xǝrⱪliⱪlǝr iqidǝ ⱨǝmmidin uluƣ idi.
4 Uning oƣulliri nɵwǝt boyiqǝ bekitkǝn kündǝ ɵz ɵyidǝ baxⱪilar üqün dastihan selip ziyapǝt ⱪilatti. Bu künlǝrdǝ ular adǝm ǝwǝtip üq singlisini ular bilǝn billǝ tamaⱪlinixⱪa qaⱪirtatti. 5 Ularning xu ziyapǝt künliri ayaƣlixi bilǝn Ayup adǝm ǝwǝtip ularni Huda aldida paklinixⱪa orunlaxturatti. U tang sǝⱨǝrdǝ ornidin turup ularning saniƣa asasǝn kɵydürmǝ ⱪurbanliⱪlarni ⱪilatti. Qünki Ayup: «Balilirim gunaⱨ ⱪilip ⱪoyup, kɵnglidǝ Hudaƣa biⱨɵrmǝtlik ⱪilip ⱪoyamdikin» dǝp oylaytti. Ayup ⱨǝrdaim ǝnǝ xundaⱪ ⱪilip turatti. ◼«Ayup adǝm ǝwǝtip ularni Huda aldida paklinixⱪa orunlaxturatti» — baxⱪa birhil tǝrjimisi: «Ayup ularni qaⱪirixⱪa adǝm ǝwǝtip, ularni Huda aldida paklanduratti». «paklinix» — ǝyni qaƣdiki ⱪurbanliⱪ ⱪilix üqün «adǝmni paklandurrux»ning ⱪandaⱪ elip berilidiƣanliⱪi bizgǝ namǝlum. Bǝlkim yuyundurulup, pakiz kiyimlǝrni kiydürüx degǝndǝk ix boluxi mumkin. «kɵydürmǝ ⱪurbanliⱪ» — ⱪǝdimki zamanlarda mǝlum bir ⱨaywan (ⱪoy, kala, ⱪatarliⱪ)ni soyup, uning ⱪenini yǝrgǝ eⱪitiwetip, andin uning pütün tenini Hudaƣa atap kɵydürüxtin ibarǝttur. Bu hil ⱪurbanliⱪ gunaⱨni tilǝx yaki Hudaƣa ibadǝt ⱪilix mǝⱪsitidǝ ⱪilinidu. «Hudaƣa biⱨɵrmǝtlik ⱪilix» — muxu sɵz ibraniy tilida «baruⱪ» dǝp elinidu. «Baruⱪ» adǝttǝ «bǝrikǝt, bǝht» degǝn mǝnini bildüridu. Xu dǝwrdǝ adǝmlǝr bir-biri bilǝn hoxlaxⱪanda «bǝrikǝtlik bolsun» dǝp bǝht tilǝytti. Xu sǝwǝbtin «bǝht tilǝx» («baruⱪ») «hoxlixix»ni bildürüpmu ⱪelixi mumkin idi. Demǝk, muxu yǝrdǝ bu ibarǝ «Balilirim Hudadin hoxlixip («huddi widalaxⱪandǝk») ayrilip ketǝmdikin» degǝn mǝnidǝ boluxi mumkin.
 
Ərxtiki birinqi ⱪetimliⱪ kengǝx; Xǝytan soⱪunup kiridu
6 Bir küni, Hudaning oƣulliri Pǝrwǝrdigarning ⱨuzuriƣa ⱨazir boldi. Xǝytanmu ularning arisiƣa kiriwaldi. ◼«Hudaning oƣulliri» — muxu yǝrdǝ eⱨtimal muⱪǝddǝs pǝrixtilǝrni kɵrsitidu. 38:7ni kɵrüng. «Xǝytanmu ularning arisiƣa kiriwaldi» — Huda nemǝ üqün Xǝytanning ɵzining ⱨuzuriƣa kirip, ɵzini ǝrkinlik bilǝn ⱨaⱪarǝtlixigǝ yol ⱪoyidu? Bu muⱨim mǝsilǝ toƣruluⱪ «ⱪoxumqǝ sɵz»imizni kɵrüng. 7 Pǝrwǝrdigar Xǝytandin: — Nǝdin kǝlding? — dǝp soridi.
Xǝytan Pǝrwǝrdigarƣa jawabǝn: — Yǝr yüzini kezip paylap, uyaⱪ-buyaⱪlarni aylinip qɵrgilǝp kǝldim, dedi. ◘1Pet. 5:8
8 Pǝrwǝrdigar uningƣa: — Mening ⱪulum Ayupⱪa diⱪⱪǝt ⱪilƣansǝn? Yǝr yüzidǝ uningdǝk mukǝmmǝl, durus, Hudadin ⱪorⱪidiƣan ⱨǝm yamanliⱪtin yiraⱪ turidiƣan adǝm yoⱪ, — dedi.
9 Xǝytan Pǝrwǝrdigarƣa jawabǝn: — Ayup Hudadin bikardin bikar ⱪorⱪmiƣandu? 10 Ɵzüng uning ɵzi, ailisidikiliri ⱨǝm uning ⱨǝmmǝ nǝrsisining ǝtrapiƣa ⱪaxa ⱪoyƣan ǝmǝsmu? Sǝn uning ⱪoliƣa bǝrikǝt ata ⱪilding, xuning bilǝn uning tǝǝlluⱪati tǝrǝp-tǝrǝptin güllinip awumaⱪta. ◼«ǝtrapiƣa ⱪaxa ⱪoyƣan» — yaki «ǝtrapiƣa tosaⱪ ⱪoyƣan». 11 Əgǝr Sǝn ⱪolungni sozup, uning ⱨǝmmǝ nǝrsilirigǝ tegip ⱪoysang, u Sǝndin yüz ɵrüp, Seni tillimisa Xǝytan bolmay ketǝy! — dedi.
12 Pǝrwǝrdigar Xǝytanƣa: — Mana, uning ⱨǝmmǝ nǝrsisini sening ⱪolungƣa tutⱪuzdum! Biraⱪ uning ɵzigǝ tǝgküqi bolma! — dedi.
Xundaⱪ ⱪilip Xǝytan Pǝrwǝrdigarning ⱨuzuridin qiⱪip kǝtti.
 
Birinqi sinaⱪ
13 Bir küni, Ayupning oƣul-ⱪizliri qong akisining ɵyidǝ tamaⱪ yǝp, xarab iqip olturatti. 14 Bir hǝwǝrqi Ayupning yeniƣa kelip uningƣa: — Kalilar bilǝn yǝr ⱨǝydǝwatattuⱪ, exǝklǝr ǝtrapta otlawatatti; 15 Xebaliⱪlar ⱨujum ⱪilip kala-exǝklǝrni bulap kǝtti. Ixlǝwatⱪan yaxlarni ⱪiliqlap ɵltürüwǝtti. Yalƣuz mǝnla ⱪutulup ⱪelip, siligǝ hǝwǝr yǝtküzüxkǝ nesip boldi, — dedi.
16 Bu adǝmning gepi tehi tügimǝy turupla, yǝnǝ birsi yügürüp kelip Ayupⱪa: — Asmandin Hudaning oti qüxüp ⱪoylar wǝ ixlǝwatⱪan yaxlarni kɵydürüwǝtti; yalƣuz mǝnla ⱪutulup ⱪaldim, siligǝ hǝwǝr yǝtküzüxkǝ nesip boldum, — dedi.
17 Bu adǝmning gepi tehi tügimǝy turupla, yǝnǝ birsi yügürüp kelip Ayupⱪa: — Kaldiylǝr üq tǝrǝptin ⱨujum ⱪilip tɵgilǝrni bulap elip kǝtti, ixlǝwatⱪan yaxlarni ⱪiliqlap ɵltürüwǝtti; yalƣuz mǝnla ⱪutulup ⱪaldim, siligǝ hǝwǝr yǝtküzüxkǝ nesip boldum, — dedi.
18 Bu adǝmning gepi tehi tügimǝy turupla, yǝnǝ birsi yügürüp kelip Ayupⱪa: — Oƣulliri wǝ ⱪizliri qong akisining ɵyidǝ tamaⱪ yǝp, xarab iqip olturƣinida, 19 tuyuⱪsiz, qɵldin ⱪattiⱪ bir boran qiⱪip ɵyning tɵt bulungini ⱪattiⱪ soⱪup, ɵy ƣulap qüxüp yaxlarni ɵltürüwǝtti; yalƣuz mǝnla ⱪutulup ⱪaldim, siligǝ hǝwǝr yǝtküzüxkǝ nesip boldum, — dedi.
20 Ayup bolsa buni anglap ornidin dǝs turup, tonini yirtip, qeqini qüxürüwetip, ɵzini yǝrgǝ taxlap Hudaƣa ibadǝt ⱪildi: —
21 Mǝn apamning ⱪorsiⱪidin yalingaq qüxkǝn, u yǝrgimu yalingaq ⱪaytimǝn; ⱨǝmmini Pǝrwǝrdigar manga bǝrgǝn, ǝmdi Pǝrwǝrdigar mǝndin elip kǝtti; Pǝrwǝrdigarning namiƣa tǝxǝkkür-mǝdⱨiyǝ ⱪayturulsun! — dedi. ◘Top. 5:14; 1Tim. 6:7
22 Bularning ⱨǝmmisidǝ Ayup gunaⱨ ⱪilmidi wǝ yaki Hudani ⱨeqⱪandaⱪ nalayiⱪliⱪ bilǝn ǝyiblimidi.
 
 

◘1:1 Ayup 2:3

◼1:5 «Ayup adǝm ǝwǝtip ularni Huda aldida paklinixⱪa orunlaxturatti» — baxⱪa birhil tǝrjimisi: «Ayup ularni qaⱪirixⱪa adǝm ǝwǝtip, ularni Huda aldida paklanduratti». «paklinix» — ǝyni qaƣdiki ⱪurbanliⱪ ⱪilix üqün «adǝmni paklandurrux»ning ⱪandaⱪ elip berilidiƣanliⱪi bizgǝ namǝlum. Bǝlkim yuyundurulup, pakiz kiyimlǝrni kiydürüx degǝndǝk ix boluxi mumkin. «kɵydürmǝ ⱪurbanliⱪ» — ⱪǝdimki zamanlarda mǝlum bir ⱨaywan (ⱪoy, kala, ⱪatarliⱪ)ni soyup, uning ⱪenini yǝrgǝ eⱪitiwetip, andin uning pütün tenini Hudaƣa atap kɵydürüxtin ibarǝttur. Bu hil ⱪurbanliⱪ gunaⱨni tilǝx yaki Hudaƣa ibadǝt ⱪilix mǝⱪsitidǝ ⱪilinidu. «Hudaƣa biⱨɵrmǝtlik ⱪilix» — muxu sɵz ibraniy tilida «baruⱪ» dǝp elinidu. «Baruⱪ» adǝttǝ «bǝrikǝt, bǝht» degǝn mǝnini bildüridu. Xu dǝwrdǝ adǝmlǝr bir-biri bilǝn hoxlaxⱪanda «bǝrikǝtlik bolsun» dǝp bǝht tilǝytti. Xu sǝwǝbtin «bǝht tilǝx» («baruⱪ») «hoxlixix»ni bildürüpmu ⱪelixi mumkin idi. Demǝk, muxu yǝrdǝ bu ibarǝ «Balilirim Hudadin hoxlixip («huddi widalaxⱪandǝk») ayrilip ketǝmdikin» degǝn mǝnidǝ boluxi mumkin.

◼1:6 «Hudaning oƣulliri» — muxu yǝrdǝ eⱨtimal muⱪǝddǝs pǝrixtilǝrni kɵrsitidu. 38:7ni kɵrüng. «Xǝytanmu ularning arisiƣa kiriwaldi» — Huda nemǝ üqün Xǝytanning ɵzining ⱨuzuriƣa kirip, ɵzini ǝrkinlik bilǝn ⱨaⱪarǝtlixigǝ yol ⱪoyidu? Bu muⱨim mǝsilǝ toƣruluⱪ «ⱪoxumqǝ sɵz»imizni kɵrüng.

◘1:7 1Pet. 5:8

◼1:10 «ǝtrapiƣa ⱪaxa ⱪoyƣan» — yaki «ǝtrapiƣa tosaⱪ ⱪoyƣan».

◘1:21 Top. 5:14; 1Tim. 6:7

© 2010 Mukeddes Kalam - Uyghur Bible Translation Committee