Muⱪeddes Kalam (yǝngi yeziⱪ) Lawiylar 12

Ayal kixining tuƣuttin keyinki «paklinixi»

1 Pǝrwǝrdigar Musaƣa sɵz ⱪilip mundaⱪ dedi: —

2 Israillarƣa sɵz ⱪilip mundaⱪ degin: — «Ayal kixi ⱨamilidar bolup oƣul tuƣsa, adǝt kɵrüp aƣriⱪ bolƣan künliridikidǝk yǝttǝ küngiqǝ napak sanalsun. □ 3 Sǝkkizinqi küni oƣli bolsa hǝtnǝ ⱪilinsun. □ ■ 4 Ayal bolsa xuningdin keyin ottuz üq küngiqǝ «ⱪan paklinix»ta tursun; paklinix künliri tamam bolmiƣuqǝ ⱨeqbir muⱪǝddǝs nǝrsigǝ tǝgmisun, muⱪǝddǝs jayƣimu kirmisun. □ 5 Əgǝr u ⱪiz tuƣsa undaⱪta adǝt künliridikidǝk ikki ⱨǝptigiqǝ napak turup, andin atmix altǝ küngiqǝ «ⱪan paklinix»ta tursun.

6 Mǝyli oƣul yaki ⱪiz tuƣsun, ⱪan paklinix künliri tamam bolƣandin keyin u ayal kɵydürmǝ ⱪurbanliⱪ üqün bir yaxⱪa kirgǝn ⱪozini, gunaⱨ ⱪurbanliⱪi üqün bir baqka yaki pahtǝkni elip jamaǝt qedirining kirix aƣziƣa, kaⱨinning ⱪexiƣa kǝltürsun. 7 Kaⱨin uni Pǝrwǝrdigarning aldida sunup, xu ayal üqün kafarǝt kǝltüridu; xuning bilǝn u hunidin pak bolidu. Oƣul yaki ⱪiz tuƣⱪan ayal toƣrisidiki ⱪanun-bǝlgilimǝ mana xudur.

8 Əgǝr uning ⱪoziƣa ⱪurbi yǝtmisǝ, u ikki pahtǝk yaki ikki baqka kǝltürsun; ularning biri kɵydürmǝ ⱪurbanliⱪ üqün, yǝnǝ biri gunaⱨ ⱪurbanliⱪi üqün bolidu; xu yol bilǝn kaⱨin uning üqün kafarǝt kǝltüridu; u ayal pak bolidu.□

□12:2 «adǝt kɵrüp aƣriⱪ bolƣan künliri» — ibraniy tilida «ayrim turux künliri». Ⱪiz-ayallar adǝt kɵrgǝn waⱪtida «napak» ⱨesablinip, eri bilǝn billǝ bolsa erimu kǝq kirgüqǝ «napak» ⱨesablinidu, xundaⱪla muⱪǝddǝs ibadǝthaniƣa kirsǝ yaki ⱪurbanliⱪlarning gɵxliridin yesǝ bolmaydu. Lekin Tǝwrat-Injil boyiqǝ ⱨǝrⱪandaⱪ waⱪitlarda Hudaning hǝlⱪi dua-ibadǝt ⱪilsa boliweridu!

□12:3 «hǝtnǝ ⱪilinsun» — ibraniy tilida «uning hǝtniliki kesilsun» degǝn sɵzlǝr bilǝn ipadilinidu.

■12:3 Yar. 17:12; Luⱪa 1:59; 2:21; Yⱨ. 7:22

□12:4 «xuningdin keyin ottuz üq küngiqǝ «ⱪan paklinix»ta tursun» — ayal ɵz erigǝ yeⱪinlixix tǝrǝptǝ «pak» ⱨesablinatti, lekin muⱪǝddǝs qedirƣa kirip ⱪurbanliⱪ ⱪilixⱪa bolmaytti.

□12:8 «Əgǝr uning ⱪoziƣa ⱪurbi yǝtmisǝ...» — ibraniy tilida: — «Əgǝr uning ⱪoza elixⱪa ⱪoli ⱪisⱪiliⱪ ⱪilsa...». «u ayal pak bolidu» — bu babtiki «ayallarning pakliⱪi» degǝn tema toƣruluⱪ kɵp uⱪuxmasliⱪlar bolƣaqƣa, biz u toƣruluⱪ «ⱪoxumqǝ sɵz»imizdǝ azraⱪ tohtilimiz.