Muⱪeddes Kalam (yǝngi yeziⱪ) Zǝbur 18

18-küy •••• Alǝmqǝ ⱪutⱪuzux

1 Nǝƣmiqilǝrning bexiƣa tapxurulup oⱪulsun dǝp, Pǝrwǝrdigarning ⱪuli Dawut yazƣan küy; Pǝrwǝrdigar uni barliⱪ düxmǝnliridin ⱨǝm Saul padixaⱨning ⱪolidin ⱪutⱪuzƣan küni, u Pǝrwǝrdigarƣa munu küyning sɵzlirini eytti: —

Aⱨ, Pǝrwǝrdigarim, mening küq-ⱪudritim,

Mǝn seni sɵyimǝn!

2 Pǝrwǝrdigar mening hada taxliⱪ teƣim, mening ⱪorƣinim, mening nijatkarimdur!

Mening Tǝngrim, mening ⱪoram texim, mǝn Uningdin ⱨimayǝ tapimǝn;

U mening ⱪalⱪinim, mening ⱪutⱪuzƣuqi münggüzüm, mening egiz munarimdur! ◼

3 Mǝdⱨiyilǝrgǝ layiⱪ Pǝrwǝrdigarƣa nida ⱪilimǝn,

Xunda düxmǝnlirimdin ⱪutⱪuzulimǝn;

4 Ɵlümning asarǝtliri meni ⱪorxiwaldi,

Ihlassizlarning yamrap ketixi meni ⱪorⱪutuwǝtti; ◼

5 Tǝⱨtisaraning taniliri meni qirmiwaldi,

Ɵlüm sirtmaⱪliri aldimƣa kǝldi.

6 Ⱪiynalƣinimda mǝn Pǝrwǝrdigarƣa nida ⱪildim,

Hudayimƣa pǝryad kɵtürdüm;

U ibadǝthanisidin awazimni anglidi,

Mening pǝryadim Uning ⱨuzuriƣa kǝldi,

Uning ⱪuliⱪiƣa kirdi.

7 Xu qaƣ yǝr-zemin tǝwrǝp, silkinip kǝtti,

Taƣlarning ulliri dǝⱨxǝtlik tǝwrǝndi, silkinip kǝtti;

Qünki U ƣǝzǝplǝndi. ◼

8 Uning dimiƣidin is ɵrlǝp turatti,

Aƣzidin qiⱪⱪan ot ⱨǝmmisini yutuwǝtti;

Uningdin kɵmür qoƣliri qiⱪti; ◼

9 U asmanlarni tǝzim ⱪildurup qüxti,

Puti asti tum ⱪarangƣuluⱪ idi.

10 Bir kerubni minip pǝrwaz ⱪildi,

Xamalning ⱪanatlirida ƣuyuldap uqup kǝldi. ◼

11 U ⱪarangƣuluⱪni ɵzining yoxurunidiƣan jayi ⱪildi,

Sularning ⱪarangƣusini,

Asmanlarning ⱪoyuⱪ bulutlirini,

Ɵz ǝtrapida qediri ⱪildi.

12 Uning aldidiki yoruⱪluⱪtin,

Ⱪoyuⱪ bulutlar, mɵldür, otluⱪ qoƣlar qiⱪip ɵtti;

13 Pǝrwǝrdigar asmanda güldürlidi;

Ⱨǝmmidin Aliy Bolƣuqi awazini yangratti,

Mɵldür wǝ otluⱪ qoƣlar bilǝn.

14 Bǝrⱨǝⱪ, U oⱪlirini etip, düxmǝnlirimni tarⱪitiwǝtti;

Qaⱪmaⱪlarni qaⱪturup, ularni ⱪiyⱪas-quⱪanƣa saldi; ◼

15 Xuning bilǝn dengizlarning tǝkti kɵrünüp ⱪaldi,

Alǝmning ulliri axkarilandi,

Tǝnbiⱨing bilǝn,

Dimiƣingdin qiⱪⱪan nǝpǝsning zǝrbisi bilǝn, i Pǝrwǝrdigar.

16 U yuⱪiridin ⱪolini uzitip, meni tutti;

Meni uluƣ sulardin tartip aldi.

17 U meni küqlük düxminimdin,

Ⱨǝm manga ɵqmǝnlik ⱪilƣuqilardin ⱪutⱪuzdi;

Qünki ular mǝndin küqlük idi.

18 Külpǝtkǝ uqriƣan künümdǝ, ular manga ⱪarxi ⱨujumƣa ɵtti;

Biraⱪ Pǝrwǝrdigar mening tayanqim idi.

19 U meni kǝngri-azadǝ bir jayƣa elip qiⱪardi;

U meni ⱪutⱪuzdi, qünki U mǝndin hursǝn boldi.

20 Pǝrwǝrdigar ⱨǝⱪⱪaniyliⱪimƣa ⱪarap manga iltipat kɵrsǝtti;

Ⱪolumning ⱨalalliⱪini U manga ⱪayturdi;

21 Qünki Pǝrwǝrdigarning yollirini tutup kǝldim;

Rǝzillik ⱪilip Hudayimdin ayrilip kǝtmidim;

22 Qünki Uning barliⱪ ⱨɵkümliri aldimdidur;

Mǝn Uning bǝlgilimilirini ɵzümdin neri ⱪilmidim;

23 Mǝn Uning bilǝn ƣubarsiz yürdum,

Ɵzümni gunaⱨtin neri ⱪildim;

24 Xuning üqün Pǝrwǝrdigar ⱨǝⱪⱪaniyliⱪimƣa ⱪarap,

Kɵz aldidiki ⱪolumning ⱨalalliⱪiƣa ⱪarap, ⱪilƣanlirimni ⱪayturdi. ◼

25 Wapadar-meⱨribanlarƣa Ɵzüngni wapadar-meⱨriban kɵrsitisǝn;

Ƣubarsizlarƣa Ɵzüngni ƣubarsiz kɵrsitisǝn;

26 Sap dilliⱪlarƣa Ɵzüngni sap dilliⱪ kɵrsitisǝn;

Tǝtürlǝrgǝ Ɵzüngni tǝtür kɵrsitisǝn;

27 Qünki ajiz mɵmin hǝlⱪni ⱪutⱪuzƣuqi Ɵzüngdursǝn;

Biraⱪ tǝkǝbbur kɵzlǝrni xǝrmǝndǝ ⱪilisǝn;

28 Qiriƣimni julaliⱪ ⱪilƣan Sǝndursǝn;

Pǝrwǝrdigar Hudayim meni basⱪan ⱪarangƣuluⱪni nurlanduridu;

29 Qünki Sǝn arⱪiliⱪ düxmǝn ⱪoxuni arisidin yügürüp ɵttüm;

Sǝn Hudayim arⱪiliⱪ mǝn sepildin atlap ɵttüm. ◼

30 Tǝngrim — Uning yoli mukǝmmǝldur;

Pǝrwǝrdigarning sɵzi sinap ispatlanƣandur;

U Ɵzigǝ tayanƣanlarning ⱨǝmmisigǝ ⱪalⱪandur.

31 Qünki Pǝrwǝrdigardin baxⱪa yǝnǝ kim ilaⱨtur?

Bizning Hudayimizdin baxⱪa kimmu ⱪoram taxtur?

32 Yǝni belimni küq-ⱪuwwǝt bilǝn oriƣuqi Tǝngri,

Yolumni tüptüz, mukǝmmǝl ⱪilƣuqi Tǝngridur;

33 U mening putlirimni keyikningkidǝk uqⱪur ⱪilidu,

Xuning bilǝn meni egiz jaylirimda turƣuzidu;

34 Ⱪollirimni urux ⱪilixⱪa ɵgitidu,

Xunglaxⱪa bilǝklirim mis kamanni kerǝlǝydu;

35 Sǝn manga nijatliⱪing bolƣan ⱪalⱪanni ata ⱪilding,

Nening ong ⱪolung meni yɵlidi;

Sening mulayim kǝmtǝrliking meni uluƣ ⱪildi.

36 Sǝn ⱪǝdǝmlirim astidiki jayni kǝng ⱪilding,

Mening putlirim teyilip kǝtmidi.

37 Mǝn düxmǝnlirimni ⱪoƣlap yǝttim;

Ular ⱨalak bolmiƣuqǝ ⱨeq yanmidim.

38 Ⱪaytidin ornidin turalmas ⱪilip ularni yanjiwǝttim,

Ular putlirim astida yiⱪildi.

39 Sǝn jǝng ⱪilixⱪa küq bilǝn belimni baƣliding;

Sǝn manga ⱨujum ⱪilƣanlarni putum astida egildürdüng;

40 Düxmǝnlirimni kɵz aldimda arⱪisiƣa yandurup ⱪaqⱪuzdung,

Xuning bilǝn manga ɵqmǝnlǝrni yoⱪattim.

41 Ular pǝryad kɵtürdi, biraⱪ ⱪutⱪuzidiƣan ⱨeqkim yoⱪ idi;

Ⱨǝtta Pǝrwǝrdigarƣa nida ⱪildi, Umu ularƣa jawab bǝrmidi.

42 Mǝn ularƣa soⱪⱪa berip, xamal uqurƣan topidǝk ⱪiliwǝttim;

Koqidiki patⱪaⱪtǝk, ularni tɵküwǝttim.

43 Sǝn meni hǝlⱪning nizaliridin ⱪutⱪuzƣansǝn;

Sǝn meni ǝllǝrning bexi ⱪilƣansǝn;

Manga yat bolƣan bir hǝlⱪ hizmitimdǝ bolmaⱪta. ◼

44 Sɵzümni anglapla ular manga itaǝt ⱪilidu;

Yat ǝldikilǝr manga biqarilǝrqǝ tǝslim bolidu;

45 Yat ǝldikilǝr qüxkünlixip ketidu;

Ular ɵz istiⱨkamliridin titrigǝn ⱨalda qiⱪip kelidu;

46 Pǝrwǝrdigar ⱨayattur!

Mening Ⱪoram Texim mubarǝklǝnsun!

Nijatliⱪim bolƣan Huda ⱨǝmmidin aliydur, dǝp mǝdⱨiyilǝnsun!

47 U, mǝn üqün toluⱪ ⱪisas alƣuqi Tǝngri,

Hǝlⱪlǝrni manga boysundurƣan Hudadur;

48 U meni düxmǝnlirimdin ⱪutⱪuzƣan;

Bǝrⱨǝⱪ, Sǝn meni manga ⱨujum ⱪilƣanlardin yuⱪiri kɵtürdüng;

Zorawan adǝmdin Sǝn meni ⱪutuldurdung.

49 Xuning üqün mǝn ǝllǝr arisida Sanga rǝⱨmǝt eytimǝn, i Pǝrwǝrdigar;

Namingni uluƣlap küylǝrni eytimǝn;

50 Pǝrwǝrdigar Ɵzi tikligǝn padixaⱨⱪa zor nusrǝtlǝrni beƣixlaydu;

Ɵzi mǝsiⱨ ⱪilƣiniƣa,

Yǝni Dawutⱪa ⱨǝm uning nǝsligǝ mǝnggügǝ ɵzgǝrmǝs muⱨǝbbitini kɵrsitidu. ◼

◼18:2 «mening ⱪutⱪuzƣuqi münggüzüm» — ibraniy tilida «nijatliⱪimning münggüzi».

◼18:4 «Ihlassizlarning yamrap ketixi meni ⱪorⱪutuwǝtti» — ibraniy tilida «Ihlassizlarning ⱪiyan-taxⱪinliri meni ⱪorⱪutuwǝtti».

◼18:7 «...Taƣlarning ulliri dǝⱨxǝtlik tǝwrǝndi, silkinip kǝtti; qünki U ƣǝzǝplǝndi...» — bu küydiki sɵzlǝr tǝdrijiy ⱨalda Dawutning ɵzining ǝⱨwalidin ayrilip, Dawutning bolƣusi ǝwladi Mǝsiⱨning ⱨayatiƣa ɵtidu. Küydǝ Mǝsiⱨning ⱨayati, japa-muxǝⱪⱪǝt tartidiƣanliⱪi, ahirida uning xan-xǝrǝpkǝ erixidiƣanliⱪi wǝ pütkül alǝmgǝ padixaⱨ bolidiƣanliⱪi kɵrsitilidu. Demǝk, bu küyning ɵzi uluƣ bir bexarǝttur.

◼18:8 «Uningdin kɵmür qoƣliri qiⱪti» — yaki «Uningdin kɵmür qoƣliri tutaxturuldi».

◼18:10 «Bir kerubni minip pǝrwaz ⱪildi» — «kerub» intayin küqlük birhil ⱪanatliⱪ pǝrixtǝ. «Tǝbirlǝr»ni kɵrüng.

◼18:14 «U oⱪlirini etip, düxmǝnlirimni tarⱪitiwǝtti» — ibraniy tilida «U oⱪlirini etip, ularni tarⱪitiwǝtti». 17-ayǝtni kɵrüng.

◼18:24 «Pǝrwǝrdigar ⱨǝⱪⱪaniyliⱪimƣa ⱪarap, kɵz aldidiki ⱪolumning ⱨalalliⱪiƣa ⱪarap, ⱪilƣanlirimni ⱪayturdi» — xübⱨisizki, muxu 19-24-ayǝtlǝrdǝ Mǝsiⱨning pak-ƣubarsizliⱪi, gunaⱨsizliⱪi bexarǝt ⱪilinidu. Dawut ɵzi toƣruluⱪ bu sɵzlǝrni ⱨǝrgiz deyǝlmǝytti. Mǝsilǝn, 25-küy, 7-ayǝt wǝ 51-küyni kɵrüng.

◼18:29 «Sǝn arⱪiliⱪ düxmǝn ⱪoxuni arisidin yügürüp ɵttüm» — «yügürüp ɵttüm» degǝn sɵzlǝr «bɵsüp ɵttüm» degǝn mǝnini ɵz iqigǝ alidu.

◼18:43 «Sǝn meni hǝlⱪning nizaliridin ⱪutⱪuzƣansǝn» — xübⱨisizki, muxu bexarǝttǝ eytilƣan «hǝlⱪ» Dawut padixaⱨning ɵz ⱪowmi bolƣan Yǝⱨudiy hǝlⱪini kɵrsitidu.

◼18:50 «Ɵzi mǝsiⱨ ⱪilƣiniƣa, Yǝni Dawutⱪa ⱨǝm uning nǝsligǝ...» — «Mǝsiⱨ ⱪilƣini» yǝni «Mǝsiⱨ» toƣruluⱪ 2-küydiki izaⱨatlarni kɵrüng.