30
30-küy •••• Pǝrwǝrdigarning Dawutning kerilip kǝtkǝnlikini jazalap, andin saⱪaytixi
1 Muⱪǝddǝs ibadǝthanini Hudaƣa ataxni tǝbriklǝp, Dawut yazƣan küy: —
Mǝn Seni aliy dǝp uluƣlaymǝn, i Pǝrwǝrdigar,
Qünki Sǝn meni pǝstin yuⱪiri kɵtürdüng,
Düxmǝnlirimni üstümdin huxallandurmiding.
2 I Pǝrwǝrdigar Hudayim, mǝn Sanga nalǝ kɵtürdüm,
Sǝn meni saⱪaytting.
3 I Pǝrwǝrdigar, Sǝn tǝⱨtisaradin jenimni elip qiⱪting,
Ⱨangƣa qüxidiƣanlar arisidin manga ⱨayat berip saⱪliding.
4 Pǝrwǝrdigarƣa küy eytinglar, i Uning ihlasmǝn bǝndiliri,
Uning pak-muⱪǝddǝslikini yad etip tǝxǝkkür eytinglar. ◘Zǝb. 97:12
5 Qünki Uning ƣǝzipi dǝⱪiⱪidǝ ɵtüp ketidu,
Xapaiti bolsa ɵmürwayǝt bolidu;
Yiƣa-zar keqiqǝ ⱪonup ⱪalsimu,
Huxalliⱪ tang sǝⱨǝr bilǝn tǝng kelidu.
6 Mǝn bolsam ɵz raⱨǝt-paraƣitimdǝ: «Mǝnggügǝ tǝwrǝnmǝy muⱪim turimǝn» — dedim.
7 Pǝrwǝrdigar, xapaiting bilǝn, mening teƣimni mustǝⱨkǝm turƣuzƣaniding;
Əmma Sǝn didaringni ⱪaqurup yoxurdung;
Mǝn alaⱪzadǝ bolup kǝttim;
8 Mǝn Sanga nalǝ-pǝryad kɵtürdüm, i Pǝrwǝrdigar;
Mǝn Sǝn Rǝbgǝ iltija ⱪildim: —
9 — Mening ⱪenim tɵkülüp, ⱨangƣa kirsǝm nemǝ paydisi bardur?
Topa-qang Seni mǝdⱨiyilǝmdu? U ⱨǝⱪiⱪitingni jakarliyalamdu? ◼«Mening ⱪenim tɵkülüp, ⱨangƣa kirsǝm nemǝ paydisi bardur?» — Dawutning kesili (2- ⱨǝm 3-ayǝtni kɵrüng) bǝlkim bir yaridin bolƣanmu, yaki ɵzining ⱪanax kesili barmidi?
10 Angliƣaysǝn, i Pǝrwǝrdigar, manga xǝpⱪǝt kɵrsǝtkǝysǝn;
I Pǝrwǝrdigar, manga yardǝmdǝ bolƣaysǝn!
11 Sǝn matǝm ⱪayƣusini ussul oynaxlarƣa aylandurdung;
Ⱨaziliⱪ bɵz kiyimimni salduruwetip,
Manga huxalliⱪni bǝlwaƣ ⱪilip baƣliding;
12 Xunga mening roⱨim süküt ⱪilmay,
Sanga küylǝr oⱪusun!
I Pǝrwǝrdigar, mening Hudayim, Sanga ǝbǝdil’ǝbǝdgiqǝ tǝxǝkkürlǝrni eytimǝn! ◼«xunga mening roⱨim süküt ⱪilmay,...» — «roⱨim» bu yǝrdǝ ibraniy tilida «xan-xǝripim» degǝn sɵz bilǝn ipadilinidu.