1 Dawut yazƣan küy: —

(Əslimǝ üqün)

I Pǝrwǝrdigar, ƣǝzipingdǝ tǝnbiⱨ bǝrmigǝysǝn,

Ⱪǝⱨringdǝ meni jazalimiƣaysǝn! ◘Zǝb. 6:1

2 Qünki oⱪliring meni zǝhimlǝndürüp sanjidi,

Ⱪolung üstümdin ⱪattiⱪ basti.

3 Ⱪattiⱪ ƣǝziping tüpǝylidin ǝtlirimdǝ ⱨeq saⱪliⱪ yoⱪ,

Gunaⱨim tüpǝylidin ustihanlirimda aram yoⱪtur.

4 Qünki gunaⱨlirim boyumdin taxti;

Ular kɵtürǝlmigüsiz eƣir yüktǝk meni besiwaldi.

5 Əhmǝⱪliⱪimdin jaraⱨǝtlirim sesip, xǝlwǝrǝp kǝtti.

6 Azabtin bǝllirim tolimu pükülüp kǝtti,

Kün boyi ƣǝmgǝ petip yürimǝn!

7 Qatiraⱪlirim otⱪa toldi,

Ətlirimning saⱪ yeri yoⱪtur.

8 Mǝn tolimu ⱨalsirap, ezilip kǝttim;

Ⱪǝlbimdiki azab-ⱪayƣu tüpǝylidin ⱨɵrkirǝymǝn.

9 Rǝb, barliⱪ arzuyum kɵz aldingdidur;

Uⱨ tartixlirim Sǝndin yoxurun ǝmǝs;

10 Yürikim jiƣildap, ⱨalimdin kǝttim;

Kɵzlirimning nuri ɵqti.

11 Yar-buradǝrlirimmu meni urƣan waba tüpǝylidin, ɵzlirini mǝndin tartti;

Yeⱪinlirimmu mǝndin yiraⱪ ⱪaqti.

12 Jenimni almaⱪqi bolƣanlar tuzaⱪ ⱪuridu;

Manga ziyanni ⱪǝstligǝnlǝr zǝⱨirini qaqmaⱪta;

Ular kün boyi ⱨiylǝ-mikirlǝrni oylimaⱪta.

13 Lekin mǝn gas adǝmdǝk anglimaymǝn,

Gaqa adǝmdǝk aƣzimni aqmaymǝn;

14 Bǝrⱨǝⱪ, mǝn angliyalmaydiƣan gaslardǝk bolup ⱪaldim;

Aƣzimda ⱪilidiƣan rǝddiyǝ-tǝnbiⱨ yoⱪ.

15 Qünki ümidimni Sǝn Pǝrwǝrdigarƣa baƣlidim;

Rǝb Hudayim, Sǝn iltijayimƣa ijabǝt ⱪilisǝn.

16 Qünki mǝn: — «Ular mening üstümgǝ qiⱪip mahtanmiƣay;

Bolmisa, putlirim teyilip kǝtkǝndǝ, ular xadlinidu» — dedim mǝn.

17 Qünki mǝn dǝldǝngxip, tügixǝy dǝp ⱪaldim,

Azabim kɵz aldimdin kǝtmǝydu.

18 Qünki mǝn ɵz yamanliⱪimni iⱪrar ⱪilimǝn;

Gunaⱨim üstidǝ ⱪayƣurimǝn. ◘Zǝb. 32:5

19 Lekin düxmǝnlirim juxⱪun ⱨǝm küqlüktur;

Ⱪara qaplap, manga nǝprǝtlǝngǝnlǝrning sani nurƣundur.

20 Wapaƣa japa ⱪilidiƣanlar bolsa, mǝn bilǝn ⱪarxilixidu;

Qünki mǝn yahxiliⱪni kɵzlǝp, intilimǝn.

21 I Pǝrwǝrdigar, mǝndin waz kǝqmigǝysǝn!

I Hudayim, mǝndin yiraⱪlaxmiƣaysǝn!

22 I Rǝb, mening nijatliⱪim,

Manga qapsan yardǝm ⱪilƣaysǝn!