91
91-küy •••• Hudaning ⱨǝrhil yamanliⱪtin, jin-xǝytanlardin ⱪoƣdixi
1 Əng Aliy Bolƣuqining mǝhpiy jayida turƣuqi,
Ⱨǝmmigǝ ⱪadirning sayisidǝ aramhuda yaxaydu.
2 Mǝn Pǝrwǝrdigarni: —
«Mening baxpanaⱨim, Mening ⱪorƣinim;
Mening Hudayim, Uningƣa tayinimǝn» — dǝymǝn.
3 Bǝrⱨǝⱪ, U ⱪiltaⱪqining toziⱪidin seni ⱪutulduridu,
Xum waba-ⱪazadin ⱨǝm halas etidu.■Zǝb. 124:7
4 U pǝyliri bilǝn seni yapidu;
Ⱪanatliri astida panaⱨ tapisǝn;
Uning ⱨǝⱪiⱪiti sanga ⱪalⱪan ⱨǝm istiⱨkamdur.■Zǝb. 57:1
5 Sǝn nǝ keqidiki wǝⱨimidin,
Nǝ kündüzi uquwatⱪan oⱪtin,■Ayup 5:19,20; Pǝnd. 3:25; Küy. 3:8
6 Nǝ ⱪarangƣuluⱪta kǝzgüqi wabadin,
Nǝ qüx waⱪtida wǝyranqiliⱪ ⱪilƣuqi ⱨalakǝttin ⱪorⱪmaysǝn.
7 Sening yeningda mingi yiⱪilip,
Ong yeⱪingda on mingi ƣulap qüxsimu,
Lekin bala-ⱪaza sanga yeⱪinlaxmaydu.
8 Sǝn pǝⱪǝt kɵzliring bilǝn beⱪip,
Pasiⱪlarƣa berilgǝn jazani kɵrisǝn.
9 Pǝrwǝrdigarni panaⱨim dǝp bilgining üqün,
Ⱨǝmmidin Aliy Bolƣuqini makan ⱪilƣining üqün,
10 Bexingƣa ⱨeq palakǝt qüxmǝydu,
Ⱨeq waba qediringƣa yeⱪinlaxmaydu.
11 U Ɵz pǝrixtilirigǝ sening ⱨǝⱪⱪingdǝ ǝmr ⱪilidu,
Xuning bilǝn ular pütkül yolliringda seni saⱪlaydu.■Zǝb. 34:7; Mat. 4:6; Luⱪa 4:10
12 Ayiƣing taxⱪa urulup kǝtmǝsliki üqün,
Ular seni ⱪollirida kɵtürüp yüridu.■Luⱪa 4:11
13 Xir wǝ kobra yilan üstidin besip ɵtisǝn,
Arslan wǝ ǝjdiⱨani dǝssǝp-qǝylǝysǝn.■Ayup 5:22,23
14 «U Manga muⱨǝbbitini baƣliƣanliⱪi üqün,
Mǝn uni ⱪutuldurimǝn;
U namimni tǝn alƣini üqün yuⱪirida saⱪlaymǝn.
15 U Manga nida ⱪilidu, Mǝn uningƣa jawab berimǝn;
Eƣir kün uni basⱪanda uning bilǝn billǝ bolimǝn;
Mǝn uni halas ⱪilip, izzǝt-ⱨɵrmǝtkǝ sazawǝr ⱪilimǝn.
16 Uzaⱪ ɵmür bilǝn uni ⱪandurimǝn,
Ⱨǝm nijatliⱪimni uningƣa kɵrsitimǝn».