Wrkapm ep a
Son
nira
Mentepm mpa itn a rpmi kai klalen, ake mpa mentepm itn a rpmi ik miningket pa
1
(Klapm 1:1-3:10)
Yangkipm wor a la yaprekg watin a antokg mentepm rpma wor yongkyong
1 1:1 Son 1:1Kupm nira wrkapm kil ak lanakepm melnum a pikekg rpma ep ak ai kul ai. Men pikekg nungkulkg a wulmpa, a men wamparpmewel ak wam a men almen ti atom men nira ak lanakepm melnum pa, la kil Yangkipm yiprokgen a alko yaprekg watin a ak antokg mentepm rpma wor yongkyong. 2 1:2 Son 1:14Kil yiprokgen a alko yaprekg watin pa pikekg palng angko wunong, men nungkulkg a wulmpa, atom men lakati nakepm la pa aklale wrisen. La kil yiprokgen a yaprekg watin a ak antokg mentepm rpma wor yongkyong pake, kil pikekg rpma nampokgen Yan ai, wa kil pikekg wa palng angko wunong eng men ti atom men ariwel. 3 Kuina ur a pikekg men nungkulkg a wulmpa pa men am lakati nakepm pake, eng mpa kipm pa wa or wris ipma wris nimpokgen men ti, atom mentepm kimeket mpa or wris ipma wris nimpokgen Yan a nimpokgen Sisas Krais Warim Kipman akilen pa. 4 1:4 Son 16:24Atom men nirantepm yangkipm kil, eng mpa kipm pa wa or wris ipma wris itopen kol men kil. Kol kipm ntokg kolpa pipa, men mpa itopen wail manten.
Maur Wailen pa kil klalen, ti mentepm mpa itn a rpmi kai klalen
5 1:5 1 Ti 6:16; Sem 1:17Men pikekg atning yangkipm wor a Sisas Krais kil laron pa atom men lakati nakepm. Maur Wailen pa kil klalen, ake miningket ketnketn ur itna kil pa, kalpis wrisen. 6 1:6 1 Son 2:4Kol mentepm lala, mentepm ti or wris ipma wris nampokgen Maur Wailen, pake atn a rpma amentepmen pa wa plan lala mentepm ti rpma kai miningket pa a pa, pa mentepm kansil. Ake mentepm antokg kuina ur a ute aklale pa. 7 Pake kol mentepm ngkom or klalen kolen kil alkil a klalen pa, pa mentepm mpa or wris ipma wris nimpokgen tita. Wa walmpopm a Sisas Warim Kipman akilen pa mpa ik klak paipmpaipm wrongkwail a mentepm ti plalng, atom mentepm palng rukis wor.
8 1:8 Nang 32:5; Nimnol 28:13Kol mentepm lala mentepm ti paipmpaipm kalpisen, pa mentepm kansil ipma a mentepm almentepm ti. Atom pa plan la nikgwalpm ute aklale a Maur Wailen pa ake rpma kawor mentepm pa, kalpis. 9 Pake kol mentepm laron paipmpaipm a mentepm antokg pa, Maur Wailen mpa ik kitila nikgwalpm ute wor a kil kol pikekg kil la pa atom mpa ungkwan paipmpaipm amentepmen pa plalng, a wa kuluk klak nikgwalpm paipm wrongkwail a mentepm pa, atom mpa mentepm palng rukis wor. 10 Pake kol mentepm lala mentepm ti ake antokg paipmpaipm ur pa, pa mentepm plan kolen lala Maur Wailen pa kil melnum a la yangkipm kansil. A wa plan la la yangkipm akilen pa ake rpma kawor ipma amentepmen ti pa, kalpis.