1 1:1 Mat 13:55; Kwap 15:13; Kal 1:19; 1 Pi 1:1Kipm om wampwam yikak wekg a Isrel, yoampei amentepm, kipm a or rak kai rka tatu palpa pa, kupm alkepm wor! Kupm Semis, kupm melnum a akwap a Maur Wailen, wa a Wailen Sisas Krais, kupm nira wrkapm kil eng ak angklin kipm.

2 1:2 Rom 5:3-5Kipm melnum alkupm a mentepm ukipma Sisas Krais, kalkuten a kipm arki pa, ampur kipm akwonalmpen la pa paipm pa, kalkuten wrongkwail pa wor eng ak angklinsepm, ti kipm itopen o! 3 1:3 1 Pi 1:7Kipm ariwe pa, kipm rkul Sisas Krais pa ik wang a kipm rki kalkuten pa, pa ak antokg kipm eng kipm antiwe itna titnongket. 4 Kipm itni titnongket kolpa iyekai, eng ikga kipm palng wor, eng ikgake kipm tukwok eng nikgwalpm wor ur pa. Kipm ikga itn wor, ikwap wor wrisen.

5 1:5 Nimnol 2:3-6Kol kipm tukwok eng ariwe a nikgwalpm wor pa, kipm oklala niki Maur Wailen, kil antiwe mpa lkepm. Kil melnum a ake langkinen kweikwei pa, kil melnum mitaket wor. Kol mla ur kil isentel eng kuina ur pa, kil mpa uk kolti. 6 Ampur kipm akwonalmpen watipmen atom kipm oklala naki Maur Wailen pa. Kipm lupm nikgwalpm wris ita kolti, atom kipm oklala niki Wailen! Melnum a alupm nikgwalpm watipmen pa, kil itna kaingkul kolen unokg a wripm el kai ak antokg atom tapor pa. 7-8 Nikgwalpm a melnum pa kai pa kai pa, ti yawrik a kil atn pa, ake wa kil atn ute. Melnum a kolpa pa ampur kil akwonalmpen la mpa Wailen ikilmpe asen akilen pa atom lkel kweiur pa, mpa kalpis.

9 Melnum a ukipma Sisas Krais, a rpma tukwok nang kalpisen eng kweikwei pa, melnum a kolpa pa kil itopen o! Kil pa nang wailen antiwe kweikwei itna wulmpa a Maur Wailen pake. 10 1:10 Aisaia 40:6-7Maur Wailen plan melnum a nang wailen, a antiwe kweikwei pa kil palng tukwok wrisen itna wulmpa akilen pa kil itopen o! Kweikwei a kil antiwe pa ikga kai plalng, kol ampei rwin ariwor a takgni al. 11 Takgni al atom kai plulng rurus pa. Melnum a antiwe kweikwei pa am kolpake, kil ikga kai plalng kol pake, ngket wangkel wang a kol a rpmi kanokg ti ikwap pa rpmi i pen.

12 Melnum a itna titnongket arki kalkuten pa, kil itopen o! Kil ampur angko! Kil rkul Sisas pa itni titnongket ik wang a kil rki kalkuten pa, pa mpa Maur Wailen kil lkel yaprekg watin eng rpmi yongkyong, kol pikekg kil yapon yangkipm la uk tu a plan ipma wor wasrongen kil pa. 13 Kol kalkuten ur palng melnum ur la ik riwel pa, ampur kil akwonalmpen la, Maur Wailen kil almpilel nikgwalpm la kil ngko kai paipmpaipm pa, kolpa kalpis. Paipmpaipm pa ake antiwe mpa rkolng Maur Wailen kai ngko pa, wa Maur Wailen pa ake mpa ilmpil nikgwalpmel melnum ur eng ngko kai paipmpaipm pa, kalpis. 14 Pa ipma wasrongen a melnum kil alkil pa ak ningkail kil alkil angko kai paipmpaipm. Kol kweikwei a ak ningkail wampung kai angkowe ampei a melnum ur angkli pa. 15 Ipma wasrongen a kil pa itna kaingkai, kil antokg ise. Pa kol kin a itna, kai ipma wail, raku pa. Kil antokg paipmpaipm pa kolpa kaingkai kai wail kolti, maur wor a kil pa am amo ise. Pa kol warim alkil pa wrekg wail kai wa angket warim.

16 Kipm melnum yek yek alkupm a mentepm ukipma Sisas Krais, kipm itn riwe, ampur kipm arki Maur Wailen la kil pa paipm pa. Kil pa wor wrisen. 17 Yiprokgen a nikgwalpm wor a kweikwei wor wor wrongkwail pa angkaino anong wor a Yan Maur Wailen pa nar pake. Kil antokg takgni, kainil, kumeim a am palng, am palng, a antokg mrangkum pa tukwok watin. Pake kil alkil pa ake am palng, tukwok watin kolpa, kil pa am itna katikati kol a kil itna pake. 18 1:18 Son 1:13Ipma wasrongen a Maur Wailen alkil pa atom, kil alko yangkipm wor aklale a la Sisas Krais pikekg amo akarmpen mentepm ti, atom mentepm palng kol warim alkilen, eng mpa mentepm palng kol okipma a tukgun ep a kil antokg. A kweikwei wrongkwail tiur a kil antokg pa kul kai itna katnukg.

19 Kipm melnum yek yek alkupm a mentepm ukipma Sisas, kipm itning yangkipm kil riworwor! Ampur ok akipm pa kukula eng la yangkipm ok pa itatu. Kipm itning nungkulkg rpme riworwor plalng pipa, kipm la yangkipm ok! Ampur kipm ipma wakget atatu! 20 1:20 Ariwe 7:9Melnum a ipma wakget kol pa, pa ake kil akwap wor itna wulmpa a Maur Wailen. 21 1:21 Kol 3:8; 1 Pi 2:1Kolpa ti kipm ungkwan nikgwalpm kimpilpet a kweikwei paipm paipm wrongkwail pa plalng, kipm rku kipm alkipm, uwi yangkipm a Maur Wailen a kil arm rpma kawor ipmanikg akipmen ti. Yangkipm pa la Sisas Krais a antiwe ak awiyepm aye kai eng Maur Wailen.

22 1:22 Mat 7:26; Rom 2:13Kipm itning kutnun kitila yangkipm alkilen pa pati wor pake. Kipm atning ak nungkulkg kalpmilel kolti, pa kipm kansil ipma alkipmen. 23 Melnum a atning yangkipm a Maur Wailen pake ake katnun pa pati, kol melnum a awi mrangku ak ari ikgokg alkil pa. 24 Kil ak ari plalng, kil elngkirmpa kolti kil kai, am wa kil woniketen ikgokg alkilen ise. 25 1:25 Rom 8:2; Sem 2:12Kol melnum ur kil uwi yangkipm titnongket wor a Maur Wailen pa ik ri riworwor ikngklei wang iye kolpa kai pa, wa kol kil uwi atom ake kil woniketen pa, kil awi kolti, kil antokg katila, atom yangkipm a Maur Wailen pa ak angketen paipmpaipm a kil pa palng wor. Atom kuina ur a kil antokg pa, palng wor kolti.

26 1:26 Nang 141:3Kol melnum ur kil ikwonilmpen la, “Kupm kil melnum wor a akwap a Maur Wailen.” Pake ake kil ikgalen ok alkil pa ariworwor. Pa kil kansil ipma alkilen ti. Ti kwap a Maur Wailen a kil ak pa, ake palng ok arke. 27 Kwap a Yan Maur Wailen pa pati, kil wasrongen la kipm kai ngklin tu a rpma paipm, kolen warim ilmpo a kin karpikg, a kil wasrongen yat la kipm alkipm ngkom nilokgen kweikwei paipm paipm kimpilpet a itna kanokg ti. Kipm ikwap kolpa pati, pa ute wor wrisen itna wulmpa a Maur Wailen pake.