1 3:1 Mak 12:36; 16:19; Epe 1:20Maur Wor akipmen am pikekg amo ise, atom Maur Wailen antokg kipm wrekg rpma malepmen nampokgen Krais. Kolpa ti kipm mpa lok nol nikgwalpm akipmen ti rki eng nikgwalpm wor wor a kweikwei wrongkwail a itna kaino anong wor ai kolti. Kaino anong wor a Krais kil rpma wam wi a Yan alkil awi nang wailen itna ep eng ikgalen kweikwei wrongkwail. 2 3:2 Mat 6:33Lok nol nikgwalpm akipmen ti rki eng ikwonilmpen nikgwalpm wor wor a kweikwei kaino Anong Wor ai kolti. A ake mpa ikwonilmpen nikgwalpm a kweikwei a itna kanokg ti. 3 Maur Wor akipmen am pikekg amo ise, atom ti Maur Wor akipmen wrekg rpma malepmen nampokgen Krais, atom Maur Wailen lam ikgalen ariworwor rpma. 4 Krais, melnum a alkepm Maur Wor weten pa kil ikga palng ngko wunong pa, kipm ti yat, kipm ikga palng ngko wunong uwi titnongket klalen wail manten nimpokgen kil.

5 3:5 Rom 6:6,11; Epe 4:19; 5:3-6Kipm mpa ilm ipma tingklaket wrongkwail a kanokg ti a akwap kawor ipma akipmen pa imo plalng. Kupm la ipma a kol kil: angkli arkul tita aki, antokg kweikwei a kimpilpet a numkropis a uk numpaipm kamel aki, nikgwalpm wrekg la ntokg kuina ur a paipm aki, ari angkowe kuina ur a mla ur ai, pa am wa irir kolen a kapor kilko alein mring a mring maur a kweikwei wailet a itna kanokg a ti kol la pa maur a kipm pa. 6 Maur Wailen kil ipma wakget paipm atom ikga kil uk wleket ntokg paipm tu mlaur a talpulng yangkipm a kil kolpa. 7 Kipm am pikekg nikgwalpm kolpa arkulepm atom kipm rpma antokg kweikwei kolpake.

8 3:8 Epe 4:25-29; 5:4Kolpa ti, kipm mpa ungkwan nikgwalpm wrongkwail a paipm pa kimeket. Nikgwalpm kolen: ipma wakget, a ipma wrekg or kamel, a nikgwalpm paipm, a aknokgel kamel a numkropis kweikwei pa. 9 3:9 Epe 4:22,25Ake mpa kipm kinsil mlaur, eng ntei, kipm am pikekg ungkwan ipma tingklaket a pikekg kipm ak kolpa yat ise. 10 3:10 Epe 4:24A nol nikgwalpm akwonalmpen akipmen pa am palng weten ise, kolen kipm awi apm maing pa wa nowe. Melnum a pikekg antokg kipm ti pa, am kil antokg kipm palng weten a weten kolpa aye kai pake, atom kipm awi ariwe kil pa worwor, atom ikga kipm palng irir kol kil alkil pa. 11 3:11 Kal 3:28Kipm a palng weten ukipma atom awi Maur Wor klalen pa, mentepm ake wa manet manet, tu Krik aki, men Suta, tu a pikekg angket num aki, tu a ake pikekg angket num, tu a ak ok manet manet aki, tu a anong kanokg manet manet, a tu a aken kwap kalpmlel orngwatneikgen mring ur aki, tu a rka akwap ak wasrongen alntu. Pake Krais wris ata pa kil a mentepm wrongkwail atom kil pa rpma kawor ipma a mentepm wrongkwail.

12 3:12 1 Pi 2:9Maur Wailen kil plan ipma wor wasrongen kipm atom kil takweiyepm la kipm rpmi wriwen wor eng alkilen. Kolpa ti nol nikgwalpm akipmen pa mpa rki kolkil: mpa kipm ipma wor rein ngklin tita, rku kipm alkipm iye kinar rpmi meen orngwatneikgen tita, rpmi meen rki kaikuten nimpokgen ipma wor. 13 3:13 Epe 4:2,32Melnum ur la lkepm kaikuten pa, ake mpa wa kipm ikilmpe pa, kalpis. Kipm itopen rki kaikuten pa nimpokgen ipma wor rpmi kolti. A wa kipm itnuurng paipm kuina ur a tu antokg kul kipm pa. Pati atnen Maur Wailen kil pikekg atnuurng paipmpaipm akipmen ise. 14 3:14 Rom 13:8-10Nikgwalpm wrongkwail a wet kupm la ela ep pa wor pake, itna ep angen pa pati, kupm la la kipm mpa rkul nikgwalpm a plan ipma wor wasrongen tita. Pa pati mpa iye kipm iye kai orwris a wa kipm mpa itni titnongket eng kitila nikgwalpm wrongkwail pa riworwor. 15 3:15 1 Kor 12:27; Epe 4:4; Pil 4:7Kipm elng ipma meen wor a Krais pa itni wailen ikglen nol nikgwalpm akipmen pa. Krais kil takwei kipm ti kolen numpwam wris wris ur a kai almpatne itna num wris akilen ti. Atom ti kipm mpa rpmi meen wor a wa uk wor Maur Wailen ikngklei wang kolti. 16 3:16 Epe 5:19Kipm ngkleikg a kipm itning yangkipm a laron Krais pa atom lupmen iye rpmi, uwi riwe worwor eng mpa kipm uk ariwe tita, a lok kiling plan tita. Wa kipm ik nangnang a ela wrkapm a Nangnang a Tepit, a kipm ukwor ik nangnang a ak ak eng ak ngkat nang a Wailen, a wa ik nang weten weten tiur a Maur Wor alkepm pa. Kipm ik kolpa itopen ik ngkit nang a Maur Wailen. 17 3:17 1 Kor 10:31; Epe 5:20Kai kweikwei wrongkwail a kipm antokg pa, kipm oklala aki kipm ikwap pa, kipm ik kolen la pa kipm akwap a Wailen Sisas a wa kipm ukwor Maur Wailen, Yan amentepmen pa, atnen kwap a Sisas kil ak pa.

18 3:18 Epe 5:22Kipm kin pa, kipm mpa itning nungkulkg orngwatneikgen kipman alkipm pa. Wailen kil atopen la kipm kutnun kolpake. 19 3:19 Epe 5:25Kipm kipman pa, kipm mpa plan ipma wor wasrongen tu kin alkipm pa, ake mpa kipm ntokg tu pa ipma paipm eng kipm pa.

20 3:20 Epe 6:1Kipm warim pa, kipm mpa itning nungkulkg orngwatneikgen man a yan alkipm pa eng kweikwei a worampei. Wailen kil awi wor lawepm kaporng yangkipm eng kipm ak kol pake. 21 3:21 Epe 6:4Kipm yantin pa, ake mpa kipm or ikle tintangen tu warim alkipm pa ikngklei wang, kolpa pa mpa tu ipma kaikut a rpma la rere a atn paipmpaipm nampokgen ipma kaikut.

22 3:22 Epe 6:5-8Kipm melnum a pikekg mring ur armpentepm eng aken kwap kalpmlel orngwatneikgen kil pa, itning nungkulkg ikwap kuina ur kitila wasrongen a mring alkipm pa riworwor. Ake lala kipm kinsil ik itni wulmpa akilen pa eng mpa kil uwi wor lawepm pa. Kipm ngkirk atom kipm ikwap nimpokgen nol nikgwalpm iklale. Kipm ik kolen la pa kipm ak eng Wailen Sisas. 23 Kolpa ti, kuina ur a kipm antokg pa, kipm ik nimpokgen nol nikgwalpm iklale, kolen la pa ak eng Wailen Sisas ai, a ake ak eng melnum pa. 24 Kol kipm ariwe la, kipm ikga uwi num itnen kweikwei wor wor a Maur Wailen kil numprampen elng itna eng ikilmpe kwap a kipm ak eng Wailen pa. Pa ake la kipm ak eng melnum ur kolti pa, pa kipm ak eng Wailen Sisas Krais. 25 3:25 Rom 2:11Mlaur a kitn antokg paipm pa, kitn ikga uwi paipm ikilmpe paipm a kitn alkitn antokg. Kil ikgake iye la ur a ntokg paipm ti wompel pa, kalpis. Kil ikga ik kolpa kitila kwap a mentepm ak pa kimeket pake.