1 1:1 Kwap 18:19-21; 19:1Kupm Pol, kupm melnum wokgen akwapel a Krais Sisas, a pikekg Maur Wailen kil takweiyopm ak wasrongen alkil. Kupm nira wrkapm kil kai eng kipm wrong kin a kipman wriwen wor a Maur Wailen a ukipma Krais Sisas itna titnongket kai anong Epesus. 2 Kupm oklala naki Maur Wailen, Yan amentepmen, a Wailen Sisas Krais eng mpa tuwekg plan ipma wor ik ngklinsepm atom ntokg kipm rpmi ipma meen wor.

3 1:3 Epe 2:6Mentepm itopen ngkit nang a Maur Wailen, Yan a Wailen Sisas Krais amentepmen ti iye kaino kwa, a lkel wor wail manten eng kil alko kweikwei wor wor a Krais a rpma kaino anong wor ai eng ak angklin Maur Wor amentepmen. 4 1:4 Son 15:16Pikekg ep ak ai ak wang a Maur Wailen kil ake antokg kitnong a kanokg ti pa, kil arkul nikgwalpm a plan ipma wor wasrongen mentepm ti, atom kil takwei mentepm ti ep ise. Atom Krais kil awiyo aye kai itna num eng alkilen la mentepm rpmi wriwen wor, a paipmpaipm kalpisen itni wulmpa a Maur Wailen. 5 1:5 Son 1:12Maur Wailen uk ipma wor wasrongen mentepm ti. Atom kil awi mentepm ti kai arowo kolen warim alkilen atnen kwap a Sisas Krais kil ak pa. Pa pikekg kil akwonalmpen ep ak ai, atom am kil ak katila nikgwalpm wasrongen alkil kolpake. 6 Kil plan ipma wor wasrongen Warim Kipman alkil pa kolpa, atom ari kil plan nikgwalpm wor alkil pa ak angklin wail mentepm ti. Yiprokgen a kil plan nikgwalpm wor alkil pa mentepm ti kolpa pati, la mentepm wrongkwail kiporng yangkipm lkel wor wail manten, ngkit nang akilen iye kaino kwa.

7 1:7 Epe 2:7; Kol 1:14Maur Wailen kil planto ipma wor alkil angklinso wail paipm wrisen kolpa, atom Sisas Krais kil amo akarmpento. Walmpopm a kil pa ungkwan ak klak paipmpaipm amentepmen pa kai plalng atom, mentepm wirng no itna kukula wor. 8 Maur Wailen kil arein mentepm ti wail manten paipm, atom kil alko nikgwalpm ariwe wor wor wrongkwail alkilen ti kalpmlel kimeket angkomis. Atom mentepm nikgwalpm ungkwarngen eng ariwe wrongkwail akilen. 9 1:9 Rom 16:25Nikgwalpm ariwe wor a Maur Wailen pikekg kil yapon itna ampen ep ak ai la ikga ik kai Krais pa, pa kil ariwe la pa wor. Pa am kil plan kai angko wunong mentepm ariwe ise. 10 1:10 Kol 1:16,20Nikgwalpm yiprokgen a Maur Wailen pikekg yapon la ntokg kweikwei wrongkwail a itna kaino kitnong a itna kanokg ti iye kai or wris, atom Krais kil pa itni tukgunakg ikglen pa. Pa kil ak katnun wang alkil a pikekg alm ep elng itna.

11 1:11 Rom 8:28-29Maur Wailen pikekg takwei men Suta ti ep ak wasrongen alkil katila nikgwalpm alkil a pikekg kil yapon ep ak ai, la men ti ikga palng wrong kin a kipman a Krais. 12 Men Suta ti pa pikekg ukipma rpma nungkwangen Krais pa ep. Yiprokgen a kil takwei men ti ep pa pati, la men lkel wor ngkit nang wailen klalen alkilen pa iye kaino kwa.

13 Wa kipm ti yat, kipm a Krais ise. Kipm atning yangkipm wor aklale a pikekg Krais amo akarmpentepm pa, atom kipm ukipma katnun pipa, wa kil anel kla alkil pa akamprin kipm pa yat katnun yangkipm alkil a pikekg yapon pa. Maur Wor alkilen a kil alkepm pa am kol kla ur a kil anel ak amprinsepm pake. 14 1:14 2 Kor 1:22Mentepm ariwe la Maur Wailen kil ikga ri kla a kil ak amprin mentepm ti, atom ikga mentepm ngkwrerng kruitn a uwi num itnen kweikwei wrongkwail wor wor a kil numprampen elng itna eng mentepm wrong kin a kipman a ukipma kil pa. Kolpa ti mentepm itopen ngkit nang wailen akilen pa iye kaino kwa!

15 Pikekg kupm atning a kipm ukipma Wailen Sisas, a wa kipm plan ipma wor wasrongen tu wrongkwail kin a kipman ute wor a Maur Wailen pa. 16 Am yiprokgen kolpa atom kupm ake wa elngen a ukwor Maur Wailen eng kipm pa, kalpis. Ak wang a kupm oklala naki Maur Wailen pa, kupm akangklei asentel la kil ngklinsepm. 17 1:17 Kol 1:9Kupm oklala naki Maur Wailen a Wailen Sisas Krais, Yan amentepmen a antiwe klalen titnongket wail manten pa kolpa kai, eng mpa Maur Wor akilen pa kiling plantepm kweikwei ampen akilen pa palng ngko wunong, eng kipm uwi riwe yangkipm wor a Maur Wailen pa riworwor iye or pa kai. 18 A wa kupm asen eng mpa kil ntokg wulmpa a Maur Wor a kipm ti ore a nikgwalpm umpen. Eng mpa kipm uwi riwe yiprokgen a pikekg kil akwewepm, atom kipm ukipma rpma nungkwangen la ikga ngkwrerng kruitn a kweikwei wor wor wailet paipm antiwe a pikekg kil elngkitna aknamput mentepm wrong kin a kipman alkilen la ikga lko pa. 19 1:19 Kol 1:11Wa kupm wasrongen la kipm uwi riwe titnongket a kalnten wail manten a Maur Wailen kil uk mentepm wrong kin a kipman a ukipma kil pa. Am titnongket a kalnten irir kolen, 20 1:20 Nang 110:1; 2 Kor 13:4; Kol 2:12a pikekg kil la atom Wailen Sisas a pikekg amo pa wa wrekg kaino rpma nampokgentel awi nang wailen kolen kil alkil kaino anong wor. 21 1:21 Kol 1:16; 2:10Kolpa atom Krais kil itna ep Wailen ikgalen tu wrongkwail a antiwe titnongket, kolen tu mring, a mring maur, maur akwapel a Maur Wailen, a maur wrongkwail a antiwe titnongket, tu melnum a arpmen titnongket paipm paipm, a tu mring tukgunakg a mring man, tu pa tu a mentepm la tu nang wailen antiwe titnongket. Pake Krais pa kil itna ep angen tu wrongkwail pake, ak wang ti a wa ikga ik wang kutnukg iye or pa kai. 22 1:22 Nang 8:6Atom Maur Wailen elng kweikwei wrongkwail pa kulnar itna orngwatneikgen titnongket a kalnten a Krais. Atom elng kil pa itna tukgunakg ikgalen mentepm wrong kin a kipman mapming a Maur Wailen pake. 23 1:23 Rom 12:5; Epe 4:10,15; Kol 1:18Mentepm wrong kin a kipman mapming a Maur Wailen pa, mentepm num a Krais. Atom am Krais kil alkil pa rpma or arpme kweikwei wrongkwail kimeket yela pake.