Tu a ukipma Krais pa tu mpa itn a rpmi a ikwap kolai?
12
(Klapm 12:1-15:13)
Mentepm mpa uk mentepm almentepm ti Maur Wailen kolen wlikgok a alwor uk kil pa
1 12:1 Rom 6:11,13; 12:11; 1 Pi 2:5Kipm melnum wor alkupm a mentepm ukipma Krais, Maur Wailen kil plantepm ipma wor areinsepm wail kolpa, ti kupm tilpepm titnongket la,
- kipm uk kipm alkipm ti kimeket kai eng Maur Wailen.
Kol kipm ik kolpa pa, kipm palng kolen wlikgok a kil anel kla ak amprinsepm itna manet eng mpa il wor uk kil pa, wa kolen wlikgok a awi yaprekg watin eng rpma wor yongkyong pa eng mpa kil kirpo yangkipm ute! Kipm uk kipm alkipm ti kimeket kai kolpa eng Maur Wailen pa pipa, pa am ya aklale alkil a kol a kipm kipor kilko ilein Maur Wailen kolpake.
- 2 Ampur kipm ak apo ak apo kai katnun atn a rpma a tu wrong kin a kipman a kanokg ti, atom palng kol tu pa.
- Kipm mpa elng eng Maur Wailen kil plelngen nol nikgwalpm lngkep akipmen ti waiketn a waiketn kolpa kai palng weten ik ntokg kipm mpa wa itn a rpmi a ikwap wor waiketn a waiketn kolpa kai palng weten.
Kipm elng eng kil plelngen nol nikgwalpm akipmen pa kolpa pipa, kipm antiwe mpa ri la kuina a i a Maur Wailen kil wasrongen la mpa kipm ntokg pa, a kuina a i wor akalkilel, a kuina a i kil karpo yangkipm ute pa, a wa kuina a i ute wor wrisen pa.
Mentepm ikwap ik ariwe a titnongket a Maur Wor kil alko pa
3 12:3 1 Kor 12:11; Epe 4:7; Pil 2:3Maur Wailen kil plantopm ipma wor akilen pa angklinsopm atom kil uk kwap kil kul kupm ti. Kolpa ti kupm laniki kipm wris wris pa kolkil la, ampur kipm ngkat nang a kipm alkipm ti kalpmilel pa, kolpa kalpis. Kipm ri ntin kipm alkipm pa la, kipm kolai pa, kipm ikwonilmpen kipm alkipm pa la kipm am kolpake. Mpa kipm wris wris ik ipma a kipm uk Sisas pa ik ntin kipm alkipm ti. 4 12:4 1 Kor 12:12,27Mpa wa kupm lanikepm kolkil la, mentepm ti num wris, pake numpwam wrongkwail ti kul atnewe. Kwap a numpwam wris wris pa man man, ake akwap irir pa. 5 Am wa kolpa yat pake, mentepm melnum watipmen pake, mentepm ukipma Krais pa atom mentepm palng num wris a Krais pa. Wa mentepm numpwam wrongkwail a kai almpatne itna num wris a Krais pa mentepm akwap manman eng akangklin tita.
6 12:6 1 Kor 12:4-11; 1 Pi 4:10-11Maur Wailen kil planto ipma wor a kil alkil angklinso pa a wa kil ampreingto kwap a ariwe a titnongket kweikwei wor wor manet manet alkil pa wris wris ak nirakewo.
- Kol kil uk kwap a laron nikgwalpm ampen akilen pa palng wli ok a melnum ur pa, mpa kil laron kitila kol a kil ukipma ariwe la am nikgwalpm a Maur Wailen ngkatel ok la kil laron pake.
- 7 Wa kol melnum ur pa kil lkel kwap a angklin tu melnum pa, mpa kil ikwap ngklinsen ik ipma wor kolpa kai o!
- Wa kol melnum ur pa kil lkel kwap a kaling plan tu melnum pa, mpa kil kiling planten riworwor kolpa kai o!
- 8 Wa kol melnum ur pa kil lkel kwap a ak titnongketel ipma a tu melnum pa, mpa kil ikwap pa eng ik titnongketel ipma atuwen kolpa kai o!
- Wa kol melnum ur pa kil lkel kwap a ak angklin marpm apmnung kweikwei tu melnum a rpma tukwok pa, mpa kil uk nimpokgen ipma kukula wor ik ngklinsen kolti!
- Wa kol melnum ur kil uwi kwap a melnum wailen a ikgalen tu wrong kin a kipman pa, mpa kil nikgwalpm rkekgen ikglen tu pa riworwor!
- Wa kol melnum ur kil uwi kwap a plan ipma wor arein tu a rpma paipm arki kaikuten pa, mpa kil ngklin tu pa nimpikgen ipma atopen!
Kolpa mentepm numpwam a num wris pake mentepm awi kwap, a ariwe, a titnongket manet manet kolpa eng ak angklin tita.
Kipm plan ipma wor wasrongen tita
- 9 Kipm mpa plan ipma wor wasrongen tita ik ipma iklale!
- A kipm mpa kirken wrisen kweikwei a paipm pa,
- a kipm mpa nimpil kweikwei a wor wor pa iye itni titnongket!
- 10 12:10 1 Pi 1:22Kipm mpa wasrongen tu melnum wor akipmen a kipm ukipma Sisas pa kolen la tu pa wusok wusok a wail wail alkipmen pa.
- Kipm mpa nikgwalpm rkekgen ikoporen tita eng ngkit nangkel tita a uk wor tita.
- 11 Kipm mpa elng wakg a Maur Wor pa nuruk rpmi kawor kipm pa, eng mpa kipm itni kalnten ikwap tumplowis, ampur kipm ak lpmaaken pa!
- Kipm mpa ikwap orngwatneikgen Wailen Sisas.
- 12 12:12 1 Te 5:16-18Kipm mpa itopen rpmi nungkwangen kweikwei a kipm ariwe la ikga Maur Wailen kil ntokg pa.
- Kipm mpa rkul ipma itni titnongket rki kaikuten.
- Kipm mpa oklala niki Wailen pa ikngklei wang kolpa itni.
- 13 12:13 Ipr 13:2Wa kipm mpa rein tu a mentepm wrong kin a kipman a Maur Wailen a rpma tukwok pa atom ngklinsen.
- Kipm mpa kipor ilei wokgmprak.
- 14 12:14 Mat 5:44; 1 Kor 4:12Kipm mpa oklala niki Wailen eng kil ngklin tu melnum a or ungkwantepm alkepm wleket pa. Wa kipm mpa oklala nikel eng kil plan ipma wor akilen pa ngklinsen, a ake mpa kipm ok nti la lalongen tu pa.
- 15 Kipm mpa itopen nimpikgen tu a atopen pa.
- A kipm mpa akg rein nimpikgen tu a akg arein pa.
- 16 12:16 Nimnol 3:7Kipm mpa lupm nikgwalpm wris kolti.
- Ampur kipm akwonalmpen kipm alkipm ti la kipm ti melnum wailen angen tu melnum a nang kalpisen pa, kipm mpa kai or wris nimpokgen tu pa.
- A ake mpa kipm ikwonilmpen kipm alkipm ti la kipm melnum ariwe pa.
- 17 12:17 1 Te 5:15Kol melnum ur ntokg kwei ur paipm kai kipm ti pa, ampake wa kipm ikilmpe ntokg kwei ur paipm kai tu pa.
- Kweikwei a tu wrongkwail kaporng yangkipm la pa wor pa, kipm mpa nikgwalpm rkekgen ntokg kweikwei wor wor kolpake.
- 18 Kipm mpa rpmi meen wor nimpokgen tu wrongkwail. Kol tu melnum tiur ntokg kolai, pake kipm ti mpa iken kwap eng kipor ngkeng nikgwalpm paipm a ak angketen nikgwalpm wor a rpma meen or wris nampokgen tita pa.
19 12:19 Yang 32:35; Mat 5:39; Ipr 10:30Kipm melnum alkupm a kupm plan ipma wor wasrongentepm pa,
- ampake kipm ikilmpe paipm a tu antokgtepm pa, yaper. Kipm elng pa kai wam a Maur Wailen atom kil alkil pa ikilmpe paipm a tu antokgtepm pa ik ipma wakget a kil alkil pa kul.
Melnum ok wripm a Maur Wailen pa nira ela wrkapm pa la kolkil la, “Wailen kil la kolpa, 'Kupm alkupm wris ata pa yan yiprokgen a uk wleket tu melnum ikilmpe paipmpaipm a tu antokg pa.'”
20 12:20 Nimnol 25:21-22; Mat 5:44Kipm mpa ik kitila kol wrkapm a Maur Wailen la kolkil la,
- “Kol wrongmanto akitnen pa la nikg ilmpel pa, kitn mpa lkel okipma il. Wa kil lala uwaketel pa, kitn mpa lkel u il.
Kitn itning, kitn plan nikgwalpm wor kolpa pa, pa mpa kitn lkel num paipm wail manten.”
- 21 Ampake kitn elng paipm pa itni wailen lok ngkli kitn pa, yaper. Kitn rkul wor pa itni titnongket eng mpa lok ngkli paipm pa.
12:1 12:1 Rom 6:11,13; 12:11; 1 Pi 2:5
12:3 12:3 1 Kor 12:11; Epe 4:7; Pil 2:3
12:4 12:4 1 Kor 12:12,27
12:6 12:6 1 Kor 12:4-11; 1 Pi 4:10-11
12:12 12:12 1 Te 5:16-18
12:14 12:14 Mat 5:44; 1 Kor 4:12
12:16 12:16 Nimnol 3:7
12:19 12:19 Yang 32:35; Mat 5:39; Ipr 10:30
12:20 12:20 Nimnol 25:21-22; Mat 5:44