5
Numprampen rpmi nungkwangen Wailen
1 Kipm melnum almintowen a mentepm ukipma Krais, minto ake la mpa nira nikepm wring a wang a Wailen ikga nar pa. 2 5:2 Mat 24:42-43; 2 Pi 3:10; Amp 3:3Kipm alkipm ariwe worwor pa la, wang a Wailen ikga nar pa ikga palng ik misel kolti kol melnum ikgwampet a wli ak mining pa. 3 5:3 Mat 24:39; Luk 21:34-35Ikga ik wang pa tu ikga wonmis itopen laniki tita lala, “Ti mentepm am rka wor tike, ikgake kalkuten ur palngto.” Pipa, wleket wail ur am ikgam palngten pinterngen kolen kin a warim alm eng a raku pa, ti tu akentiwe ikga ngkom nilokgen wleket pa. 4 Pake kipm melnum almintowen a mentepm ukipma Krais pa, kipm ake melnum a rpma kai miningket pa, kalpis, kolpa ti ikga wang pa palngtepm pa, kipm ikgake wrekg paipm eng pa. 5 5:5 Rom 13:12Eng ntei, kipm plalngten pa kipm melnum klalen a atn ak ran. Mentepm ti ake melnum miningket a atn ak mining pa. 6 Ti ampur mentepm okg kol tu tiur a okg pa. Mentepm rki wulmpa ore a wontrakole ikwon lok numpwam wris wris almentepmen ti. 7 Tu melnum a okg okg pa, tu am okg ak mining pake. Wa tu melnum a al al u titno pa, tu am titno titno ak mining pake. 8 5:8 Aisaia 59:17; Epe 6:14,17Pake mentepm ti melnum a atn ak ran, kolpa ti mentepm rpmi wontrakole lok ipaar numpwam almentepmen ti: mentepm ukipma Sisas wa plan ipma wor wasrongen tita pa kol apm klingen a mentepm alil ak ipaarng num a mentepmen pa. Mentepm ariwe la Sisas ikga nar eng ikuwiyo iye kai wor, kolpa ti mentepm rpmi nungkwangentel, pa kol wamung a mentepm ngkat ak ampri ikgokg tukgunakg a mentepmen pa. 9 Yiprokgen a Maur Wailen pikekg takweiyo pa pati, ake lala ikga lko wleket ikilmpe paipmpaipm a mentepm ti antokg pa, kalpis. Yiprokgen a kil pikekg takweiyo pa pati, lala ikga Sisas ikiwiyo tukuleikgen ipma wakget akilen pa. 10 5:10 Rom 14:8-9; 1 Te 4:14Sisas pikekg amo akarmpen mentepm. Ti mentepm imo kai aki, mentepm rpmi aki, pa kil ikga ikiwiyo iye kaino, mentepm rki wris nimpokgentel. 11 Kolpa kipm la yangkipm kil ikingklin tita a ik titnongketel tita, kol a kipm ak ak itna ti pa.
Maur Wailen mpa ngklin tu a ukipma eng la mpa tu plan nikgwalpm wor
12 Kipm melnum almintowen a mentepm ukipma Krais, minto la lanikepm la, kipm ngkit nang a tu melnum a aken kwap eng ikgalentepm pa. Tu pikekg Wailen kil takweiyen eng la itni ep eng mpa tu kling plan a lokepm pa. 13 Tu akwap wail wor, kolpa ti kipm ngkit nang atuwen pa iye kaino kwa, wa kipm planten ipma wor wasrongenten. Wa kipm alkipm pa lok ngkli tita terng rpmi meen kolti.
14 5:14 2 Te 3:6,11Kipm melnum almintowen a mentepm ukipma Krais, minto alkepm yangkipm la, kipm niki kurkurng a lok tu melnum a antokg melkget pa, wa kipm uk nikgwalpm wor wor ik ngklin tu melnum a rpma nampokgen nikgwalpm kalkuten pa, wa kipm ngklin ik titnongketel tu a ake itna titnongket pa. Tu mlaur alkepm kalkuten pa, kipm uwi nimpokgen ipma meen wor kolti.
15 5:15 Rom 12:17; 1 Pi 3:9Kipm la kurkurngten la ake mpa melnum ur ikilmpe paipmpaipm a melnum ur antokgtel pa. Ikngklei wang kipm mpa nikgwalpm rkekgen eng plan nikgwalpm wor eng tita wa eng tu wrongkwail ai yat.
16 5:16 Pil 4:4Kipm rki itopen ikngklei wang! 17 Wa oklala niki Wailen pa ikngklei wang kolpa iye kai. 18 5:18 Epe 5:20Uk wor Maur Wailen pa ikngklei wang eng kweikwei a wor ampei. Kipm pa a Krais Sisas, ti Maur Wailen wasrongen la mpa kipm ik kolpake.
19 5:19 Epe 4:30Ampur ampe wakg a Maur Wor a Maur Wailen pa. 20 Ampur wa elukgen yangkipm a Maur Wor a Maur Wailen kil palng wli ok a melnum okwripm a Maur Wailen laron pa. 21 5:21 1 Son 4:1Kipm itning a ri kweikwei wrongkwail pa riworwor la a i wor pa, kipm rkul, a i paipm pa, kipm elngen. 22 Kipm itni watinet tukuleikgen paipmpaipm a wor ampei.
Pol la alupm alupm tu Tesalonaika
23 5:23 2 Te 3:3Minto oklala naki Maur Wailen, kil alkil yiprokgen a uk ipma meen wor pa, la kil mprinsepm elng itni manet eng alkilen, wa la kil ikglen numpwam, nol nikgwalpm, Maur Wor a kipm pa rpmi rukis wor kolpa kai. Eng ikga Wailen Sisas Krais amentepmen nar pa, ikgake kil ri yiprokgen ur eng ikga kil rkiwo pa, kalpis. 24 Ti kipm ariwe pa, melnum a pikekg akwewepm pa, kil nungkulkg wor, kil ikga ntokg kol a minto asentel pa.
25 5:25 Kol 4:3; 2 Te 3:1Kipm melnum almintowen a mentepm ukipma Krais, kipm wa oklala niki Wailen pa eng ik ngklin minto ti yat.
26 Kipm itopen nikron tita kolen la kipm melnum a ukipma Maur Wailen.
27 Minto awi ok a Wailen pa lanakepm titnongket la, kipm uwi wrkapm kil ngkleikg plalng pipa, wa ukwa iye kai eng ngkleikg niki tu wrong kin kipman a ukipma Krais a rka yela pa.
28 Minto oklala naki Wailen amentepmen Sisas Krais la kil plan ipma wor alkil ik ngklin kipm. Ti wrkapm ep a minto nira kil pa am kai kolpake.
5:2 5:2 Mat 24:42-43; 2 Pi 3:10; Amp 3:3
5:3 5:3 Mat 24:39; Luk 21:34-35
5:8 5:8 Aisaia 59:17; Epe 6:14,17
5:10 5:10 Rom 14:8-9; 1 Te 4:14
5:14 5:14 2 Te 3:6,11