1 5:1 Mat 5:48Kolpa ti kipm mpa ik ok no inip perng iro klung yapoko a Maur Wailen pa, wa ntokg kitila kuina ur a kil alkil antokg pa. Kil pa plan ipma wor wasrongentepm kol kipm warim wor yekyek alkilen. 2 5:2 Taku 29:18; Ipr 10:10Ti atn a rpma akipmen pa, kipm mpa plan ipma wor wasrongen tita, kol pikekg Krais kil plan ipma wor wasrongen kipm ti. Atom kil awi wrik a mentepm ti uk kil alkil kalpmlel kol kweikwei yaprekget wor a Maur Wailen atopen.

3 Kipm ti pa, kipm wrong kin a kipman ute wor a Maur Wailen. Kolpa ti kipm mpa elngen wrisen a antokg kweikwei a kimpilpet, aki angkli arkul tita, aki antokg kweikwei numkropis a uk numpaipm kamel kolti, a wa akwental kweikwei a worampei pa. 4 Wa yat, ake mpa kipm ik nokgel ngkli itne tita kai ngko mis pa, kalpis. Wa yat, ake mpa kipm rpmi ilm nini okel yangkipm ok a paipm paipm titno titno, aki iye torke itni kuin a kipm pa, kalpis. Pa ake wor eng mpa kipm ik kolpa. Kipm mpa la yangkipm ok a wor wor a ukwor Maur Wailen kolti. 5 5:5 1 Kor 6:9-10; Kol 3:5Kol kipm ariwe aklale la, tu melnum a angkli arkul tita, a antokg kweikwei kimpilpet a uk numpaipm kamel, a tu a ari angkowe kuina ur a melnum ur ai akwental la uwi a uwi wrongen pa, pa kol tu kapor kilko alein maur kansil. Kolpa ti tu pa akentiwe mpa Maur Wailen a wa Krais kawor rpmi Wailen ikglen nol nikgwalpm atuwen pa, kalpis.

6 5:6 Rom 1:18; Kol 2:4,8Ampur kipm atning katnun yangkipm paipm a tu pa alkepm kalpmen, iyai. Ipma wakget a Maur Wailen am itna eng tu melnum a talpulng yangkipm akilen kolpake. 7 Kolpa ti ampur kipm kai rpma aki anti tu a kolpa atn erkwon pa, yaper wrisen. 8 5:8 Son 12:36; Epe 2:13; Kol 1:13; 1 Pi 2:9Kol kipm pikekg ep pa, kipm pikekg itna kai miningket pake. Ari ak wang ti pa kipm palng wrong kin a kipman a itna kai klalen a Wailen. Kolpa ti kipm rpmi kol tu warim a Maur Wailen a itna kai klalen pawo! 9 La itni kai klalen pa, mpa kol yo a angko yo ok wor wor kolkil: mpa rpmi itn wor, a ntokg kweikwei a ute aklale kolti. 10 Atn a rpma akipmen pa, kipm mpa uwi riwe la mpa kipm rpmi a itn kolai, eng mpa ntokg Maur Wailen pa kil itopen uwi wor lawepm. 11 Ampur kipm antimprak tu a itna kai miningket pa antokg kuina ur a paipm paipm pa kolen yo a angko yo ok paipm paipm pa, yaper. Kipm mpa iye kuina ur a tu antokg itna kai miningket pa iye kul kai klalen ti planten la pa tu antokg paipm. 12 Num kropis kamel eng rpma lakati kuina ur a tu pa antokg itna ampen pa. 13 5:13 Son 3:20-21Pake kweikwei wrongkwail a antokg itna kai miningket ampen pa, mpa klalen pa akalen aye kul kai angko wunong, atom wrongkwail antiwe ari. 14 5:14 Aisaia 26:19; Rom 13:11Klalen pa antiwe ak awi kweikwei wrongkwail a itna am kai miningket pa aye kul kai angko wunong. Kol oklala ur la kolkil la, “Wrekg wrekg o! Kipm okg eng na? Wrekg i kirkap pa kulno wo, eng mpa klalen a Krais pa iklentepm.”

15 5:15 Kol 4:5Atn a rpma akipmen pa, kipm itn a rpmi riwe. Ampur kipm atn a rpma kolen melnum titnowen pa, yaper. Kipm itn a rpmi kolen melnum wontrakole. 16 Ampur kaken wang ur kai kalpmlel. Wang wris wris ti pa wang akitnen a kol a kitn ntokg kuina ur a wor kolti. Eng ntei, wang wrongkwail ti pa wang paipm plalng, ake ur wang wor. 17 Kolpa ti ampur kipm rpma kolen melnum a titnowen pa. Kipm rpmi kolen melnum a wontrakole, eng mpa kipm uwi riwe kuina ur a Wailen kil wasrongen la kipm ntokg pa.

18 5:18 Luk 21:34Ti kipm ampake il u titno pa, kalpis. Pa mpa antokg kipm titno atom antokg kipm kai paipm, ake antiwe kipm alok ipaar kipm alkipm. Kolpa ti, pa yaper, eng mpa kipm il u klalen a Maur Wor ti ntiwe ikngklei wang kolpa kai. 19 5:19 Kol 3:16Kipm laniki tita ik oklala a la ela kai wrkapm Nangnang a Tepit nira, wa ik nangnang a ak ak eng ak ngkat nang a Wailen, a wa ngketen nangnang weten a Maur Wor a Maur Wailen ngkat okelepm la kipm ik pa. Kipm ik nangnang pa ik ik kweikwei wrongkwail a ak o nangnang pa nimpokgen titi, wampeng, mitark, nim a yotimpal. Kipm kilpo kweikwei pa ik ik nang wrongkwail pa nimpokgen nol nikgwalpm akipmen ti eng ik ngkit nang a Wailen. 20 5:20 Kol 3:17A wa ikngklei wang pa kipm mpa naren Wailen Sisas Krais atom ukwor Maur Wailen Yan pa eng kweikwei wrongkwail a worampei.

21 5:21 1 Pi 5:5Kipm ngkirk itni wulmpa a Krais pa atom, kipm rpmi itning nungkulkg orngwatneikgen tita.

22 5:22 Kol 3:18; 1 Pi 3:1Kipm kin pa, kipm mpa orngwatneikgen kipman alkipm pa, kolen a kipm orngwatneikgen Wailen pa. 23 5:23 1 Kor 11:3; Epe 1:22Kol kipman pa kil itna tukgunakg eng kin alkil. Am wa kolpa yat pake, wa Krais pa kil itna tukgunakg eng mentepm wrong kin a kipman mapming a ukipma Krais pa kolen numpwam wrongkwail a Krais, atom pikekg kil amo eng ak awiyo. 24 Kol mentepm wrong kin a kipman mapming a ukipma Krais orngwatneikgen kil pa, am wa kolpa yat pake, kipm kin pa, kipm mpa orngwatneikgen kipman alkipmen pa eng kweikwei wrongkwail.

25 5:25 Kol 3:19; 1 Pi 3:7Wa kipman kipm pa yat, kipm mpa plan ipma wor wasrongen kin alkipm pa kolen Krais kil plan ipma wor wasrongen mentepm wrong kin a kipman mapming a ukipma kil pa, atom kil uk kil alkil kai eng akawiyo pa. 26 5:26 Tai 3:5Kil alko yangkipm wor alkilen pa, mentepm atning ukipma katnun, atom kil kaluko ak u pa, eng mpa ntokg mentepm palng klalen wriwen wor. 27 5:27 2 Kor 11:2; Kol 1:22Kil la ikga elng mentepm wrong kin a kipman mapming a ukipma kil ti elng kai eng kil alkil. Mentepm pa mpa palng kolen kin kunakul arimo, a ake num arkole unokget aki ari paipm ur pa, kalpis. A wa ikgake tu rkiwo la mentepm antokg paipm ur pa, kalpis, mentepm ikga klalen wriwen wor kolti. 28 Am kolpa yat pake, kipman mpa plan ipma wor wasrongen kin alkil kol kil plan ipma wor wasrongen num alkil ti. Kipman a plan ipma wor wasrongen kin alkil pa, pa plan la kil plan ipma wor wasrongen kil alkil. 29 Am kolpake, kipman pa ake antiwe mpa ntokg paipm num alkil pa, kalpis. Kil mpa il okipma a ikglen kil alkil riworwor. Krais kil wa ikgalen mentepm wrong kin a kipman mapming a ukipma kil kolpa yat pake. 30 Kol mentepm ti pa numpwam ur a num akilen. 31 5:31 Ngkat 2:24; Mat 19:5La ela kai wrkapm a Maur Wailen pa la kol kil la, “Kipman mpa itnuurng man a yan alkil pa, atom uwi kin pa iye rpmi wan manet, atom tuwekg mpa palng kolen num wris.” 32 5:32 Amp 19:7Yangkipm kla pa yangkipm ampen wail manten. Yangkipm kla pa kupm ak la Krais a mentepm wrong kin a kipman mapming a ukipma Krais. 33 Am kol wet a la pake: kipm kipman wris wris pa, kipm mpa plan ipma wor wasrongen kin alkipm pa irir kol a kipm plan ipma wor wasrongen kipm alkipm pa. Wa kipm kin pa yat, kipm mpa orngwatneikgen ngkit nang a kipman alkipmen pa.