6
Yangkipm a naki karkurng tu warim, a tu man a yan
1 6:1 Kol 3:20Kipm warim pa, kipm mpa itning nungkulkg orngwatneikgen kutnun mansan alkipm pa! Kipm ik kolpa pa, pa ute wor pake. Wailen kil wasrongen a kipm ak kolpake. 2 6:2 Taku 20:12; Yang 5:16”Kipm mpa orngwatneikgen ngkit nang a tu man a yan akipmen pa!” Pa yangkipm titnongket itna ep pikekg Maur Wailen yapon, wa yangkipm antuwe la, 3 6:3 Taku 20:12; Yang 5:16”Kol kipm ik kitila kolpa pa, kipm ikga itopen rpmi wor uwi wang watin i kanokg ti.” 4 6:4 Nang 78:4; Nimnol 22:6; Kol 3:21Kipm yantin pa, ake mpa kipm ntokg paipmel tu warim alkipm pa eng tu ipma wakget pa. Kipm mpa irowonel a kiling planten a la kurkurng kolen a Wailen kil wasrongen pa.
Melnum a aken kwap kalpmlel, a mring a ikgalentel
5 6:5 Kol 3:22-23; Tai 2:9-10; 1 Pi 2:18Melnum a aken kwap kalpmlel orngwatneikgen mring a kanokg ti pa, kil mpa ngkirk ikwoniye a wa ik nikgwalpm wor a itning nungkulkg kolen la pa kil katnun Krais. 6 Ake lala kipm ik itni wulmpa a melnum pa, eng mpa melnum pa uwi wor lawepm pa, kalpis. Kipm mpa ik kolen tu melnum a aken kwap Krais pa kalpmlel nampokgen nol nikgwalpm aklale katnun nikgwalpm a Maur Wailen. 7 Kipm itopen nikgwalpm rkekgen ikwap pa riworwor kol la pa kipm ak eng Wailen pake, a ake kipm ak eng melnum pa. 8 6:8 2 Kor 5:10; Kol 3:24-25Kipm ariwe la, Wailen pa kil ikga ikilmpe melnum wris wris kitila kwap wor a kil ak pa. Kil ikgake ri la mring aki melnum a aken kwap mring pa, kil ikga uk kitila kwap wor a kipm ak ti kolti.
9 6:9 Rom 2:11; Kol 4:1A kipm mring pa, kipm ikglen tu melnum a aken kwap kalpmlel orngwatneikgen kipm pa riworwor kolpake. Ampur naken wrongkel, eng ntei, kipm ariwe la Mring Wailen a kipmekg yatenen pa rpma kaino kitnong ai. Kil ikga ikilmpe paipm a kipmekg yatenen pa irir.
Nowe wri wamung wrongkwail a Maur Wailen
10 Oklala akupmen wreren eng a kai plalng pake, ti kupm la ngkitepm won la, kipm itni titnongket kai wris nimpokgen Wailen, eng mpa kipm ntiwe titnongket a kalnten a Wailen. 11 6:11 Rom 13:12; 2 Kor 10:4Kipm nipo wamung a nimpil wri a Maur Wailen alkepm pa iye kimeket, eng mpa kipm ik tulpulng Maur Paipm Satan a kansilepm pa. 12 6:12 1 Pi 5:8-9Kol mentepm ake almpwrong nampokgen mentepm almentepm melnum ti pa, kalpis. Mentepm almpwrong nampokgen mring, a mring maur, a maur paipm wrongkwail a antiwe titnongket wrongkwail, a maur tiur a awi nang wailen antiwe titnongket itna kaino kitnong ai, a wa itna ikgalen kanokg ti. A wa anti maur paipm a antiwe titnongket a akwap itna kai miningket a yela kanokg ti. 13 Kolpa ti kipm nipo wamung a nimpil wri kweikwei a Maur Wailen pa itni num pa kimeket, atom itni mongklan nimprampen o! Atom ak wang a kalkuten palngtepm pa, kipm antiwe titnongket a itna almpwrong, atom alok angkli maur paipm pa kai ai, a itna titnongket itna or pa kai.
14 6:14 Aisaia 11:5; 59:17; 1 Te 5:8Kolpa ti kipm wrekg itni ukikg numprampen kolkil:
- rpmi kutnun nikgwalpm ute wor a Maur Wailen kolti, pa kol apm klingen watipmen a kipm alil akla num alkipmen;
- kutnun nikgwalpm aklale kolti, pa kol tapminei umpu a kipm ak angkirng apm a alil pa tongtong.
- 15 6:15 Rom 10:15Kipm nikgwalpm rkekgen eng laron yangkipm wor a la Krais pikekg lam kla ak angkeng ipma wakget a Maur Wailen a itna eng mentepm ti. Pa pati, pa kolen kipm rapon ti kipm owen kukwula, atom ake ik wri ur awiyepm kai nepm pa, kalpis.
- 16 Wa kai aken kweikwei tiur a kipm awi itna num pa, kipm uwi wamung kakir pa nipo ik la num pawo! Pa kolen kipm ukipma Krais pa itna titnongket pati, pa antiwe ak talpulng wri nokget a Maur Paipm ak almpepm pa.
- 17 6:17 Ipr 4:12Kipm mpa wonirpme riwe la Maur Wailen ak awiyepm yaper kul ise, pa kol kipm ngkat wamung pa aye kaino kwa eng ak la tukgunakg ikgokg alkipm ti.
- Wa kipm rkul yangkipm a Maur Wailen pa kolen wri a Maur Wor a kipm nampil aye pa.
18 6:18 Luk 18:1; Kol 4:2; 1 Te 5:17Kipm ik titnongket a Maur Wor pa oklala niki a ukwen Maur Wailen pa ikngklei wang eng mpa kil ngklinsepm.
Kipm ak kolpa pa, pa kolen kipm itna atnen ya wokgwokg pa itna.
Ampur kipm elngen pa. Kipm oklala niki niki Maur Wailen pa kolpa ikngklei eng kil ngklin tu wrong kin a kipman a ukipma kil pa. 19 6:19 Kol 4:3-4; 2 Te 3:1Wa yat, kipm oklala niki Maur Wailen eng mpa kil lkopm yangkipm ur alkilen pa ik wang a kupm itni eng laron pa, eng mpa kupm itni titnongket wrongen laron yangkipm ampen wor alkil a la Krais pa. 20 6:20 2 Kor 5:20; Plm 1:9Pikekg Maur Wailen alkil ukwawopm eng la kupm laron yangkipm wor akilen, atom tu awiyopm aye kul rpma wan tipmining a kilke. Kolpa ti kipm oklala niki Wailen pa, eng mpa kupm itni titnongket wrongen laron yangkipm akilen pa kol a kil wasrongen la kupm laron pa.
Pol la alupm alupm tu Epesus
21 6:21 Kwap 20:4; Kol 4:7-8; 2 Ti 4:12Kupm ukwa Tikikus kil kaintepm pake. Kil mentepm almentepm melnum a ukipma Krais pake a mentepm plan ipma wor wasrongentel. Kil melnum akwapel wor a Wailen. Kil pa ikga lanikepm kimek kimek kuina ur wrongkwail a palng eng kupm itna kil. Atom ikga kipm uwi riwe la kupm rpma kolai, a kupm antokg kuina. 22 Yiprokgen a kupm ukwawel kaintepm pa pati itna kolkil: kupm ukwawel kai eng la ikga kil lanikepm la men rka kolai, eng ikga kipm uwi ipma meen wor.
23 Kipm melnum akupmen a mentepm ukipma Krais, kupm oklala naki Maur Wailen Yan, a Wailen Sisas Krais, eng mpa tuwekg ngklinsepm nikgwalpm wor a rpma meen wor, a plan ipma wor wasrongen tita titnongket, a ukipma itni titnongket. 24 Kupm oklala naki Maur Wailen eng kipm mlaur a plan ipma wor wasrongen Sisas Krais Wailen amentepmen pa, eng mpa kil plantepm nikgwalpm wor a ngklinsepm kimeket iye kolpa kai. Yangkipm a kupm Pol nira pa am kai kolpake.
6:2 6:2 Taku 20:12; Yang 5:16
6:3 6:3 Taku 20:12; Yang 5:16
6:4 6:4 Nang 78:4; Nimnol 22:6; Kol 3:21
6:5 6:5 Kol 3:22-23; Tai 2:9-10; 1 Pi 2:18
6:8 6:8 2 Kor 5:10; Kol 3:24-25
6:11 6:11 Rom 13:12; 2 Kor 10:4
6:12 6:12 1 Pi 5:8-9
6:14 6:14 Aisaia 11:5; 59:17; 1 Te 5:8
6:18 6:18 Luk 18:1; Kol 4:2; 1 Te 5:17
6:20 6:20 2 Kor 5:20; Plm 1:9
6:21 6:21 Kwap 20:4; Kol 4:7-8; 2 Ti 4:12