1 Sisas kil lanaken yangkipm kweikwei wrongkwail pa kai plalng pipa, kil naurng anong kanokg a Kalili pa kil wangket u kop Sotan pa kai wompel ai. Atom kil nar kai wompel ai kai kinar wangket kul anong kanokg a Sutia. 2 Ari kalpis, tu wrong kin kipman wailet am kanuntel kolpa atn pake, atom kil ungkwan numpet atuwen pa itna wrik pa.

3 Ari wa tu melnum tiur a melnum a arpmen yangkipm yiprokgen a Moses pa tu kul alm ipmawel kil pa, asentel la, “Men la itningke kai kitn ti la yangkipm titnongket pa la kipman pa antiwe a ungkwan kin alkil pa ik wakrongen alkil aki, kalpis?”

4 19:4 Ngkat 1:27; 5:2Ari Sisas pa akalmpe la, “Ake wa kipm angkleikg yangkipm wrkapm a Maur Wailen pa, a la, pikekg ep lmpiwen ak a kil antokg kweikwei wrongkwail pa, kil antokg kin, kil antokg kipman. 5 19:5 Ngkat 2:24; Epe 5:31Atom am yiprokgen kolpa atom kil la, 'Warim kipman mpa nuurng mansan alkil, a kai rpmi numpon kin alkil, atom mpa tuwekg palng kol num wris.' 6 Kolpa atom ake wa tuwekg itna kol melnum wekg pa, kalpis, tuwekg am kai wris ase. Eng ntei, kwei ur a pikekg Maur Wailen yapo kai wris pa, pa ake antiwe mpa melnum ur wangketen itni manman pa, kalpis.”

7 19:7 Yang 24:1-4; Mat 5:31Tu melnum a arpmen yangkipm yiprokgen a Moses tu asen Sisas pa la, “Ti antokg kolai atom pikekg Moses kil alko yangkipm la, kipman antiwe a nira wrkapm wompel a ak wangketen kin pa atom ungkwan kin pa kai pa?”

8 Ari Sisas kil akalmpenten la, “Moses pikekg kil anti la kipm ungkwan kin alkipmen atnen a kipm melkget. Pake pikekg ake ya ur kolpa ak ep ilmpiwen ai, kalpis. 9 19:9 Mat 5:32; 1 Kor 7:10-11Kin a kipman ur pa kai ikwap numkropis a uk numpaipm kamel pa, pa kil antiwe ungkwan kin pa. Kol kil ungkwan kin alkil a ake kai akwap num kropis ur pa, atom kil uwi kin ur manet ai iye pa, pa kil angkli arkul kin pa. Wa kipman a awi kin ur a kipman ep ungkwan pa, pa kil wa angkli arkul kin pa.”

10 Tu watnom a Sisas pa tu atning yangkipm a tu la kolpa atom tu lanakel la, “Kolpa pa, pa wor eng ake mpa uwi tita.”

11 Ari Sisas pa akalmpenten la, “Yangkipm a la kin a kipman ake mpa uwi tita pa, wrongkwail ake antiwe ariwe yangkipm pa eng mpa tu kunun. Tu tiur a Maur Wailen alken titnongket kolti pa tu awi ariwe yangkipm pa atom kanun. 12 Pa yiprokgen watipmen eng tu kipman ake la uwi kin pa. Tu tiur pa pikekg awi ipma angko, atom nikgwalpm a tu a rka eng la ntokg kin pa, pa kalpis. A tu tiur pa tu angklo mamrowel, atom nikgwalpm a tu a rka eng la ntokg kin pa, pa kalpis. Tiur pa tu karken la tu ake la uwi kin pa, eng ntei, tu la uk tu alntu ti kai eng ikwap a Maur Wailen. Mlaur a awi ariwe yangkipm kil pa, pa kil kunun.”

13 Ak wang pa tu wrong kin kipman pa tu aye tu warim alntu pa aye kai eng Sisas la kil elng wam pa eliwen a oklala niki Maur Wailen eng ngklinsen. Ari tu watnom alkil pa aklewen. 14 19:14 Mat 18:2-3Ari Sisas lanaken la, “Kipm elngen eng tu warim pa kulntopm o! Ampur angkengken. Anong wor a Maur Wailen itna wailen ikgalen pa am a tu melnum a kolen tu warim yekyek tike.” 15 Kil elng wam pa elawen oklala naki Maur Wailen angklinsen plalng, kil naurngten kil kai.

16 Atom melnum ur pa kul eng Sisas atom asentel la, “Melnum a aroaro wonel tu, mpa kupm ntokg kweikwei wor ur kolai eng mpa kupm uwi yaprekg watin eng rpmi wor yongkyong?”

17 19:17 Lipai 18:5; Luk 10:28Ari Sisas akalmpe la, “Wa kitn asentopm eng kuina a i wor pa eng ntei? Kwei ur wris a wor pa pati Maur Wailen. Kol kitn la uwi yaprekg watin eng kitn pa rpmi wor yongkyong pa pati, mpa kitn kunun yangkipm titnongket a Maur Wailen pa riworwor.”

18 19:18 Taku 20:13-16; Yang 5:17-20Ari melnum pa asentel la, “Yangkipm titnongket a i mpa wa kupm wa kunun pa?” Ari Sisas akalmpentel la, “Ti yangkipm titnongket mpa kitn kunun ti kil: ake mpa ilm melnum imo, a ake mpa ngkli rkul kin a kipman pa, ake mpa ik ikgwam, a ake mpa kinsil lakiti melnum ur pa, 19 19:19 Taku 20:12; Lipai 19:18a orngwatneikgen mansan, a plan ipma wor wakrongen mla ur yiprokg watinet alkitn kol a kitn plan ipma wor wakrongen kitn alkitn.”

20 Melnum warimpen pa la, “Yangkipm titnongket a wet la pa kupm kanun pake, ti wa tiur a i eng kupm a wa kunun?”

21 Ari wa Sisas pa akalmpe la, “Kitn la palng melnum wor wrisen pa, kitn kai atom kitn uk kweikwei wrongkwail alkitnen ti kai tu rmpenteitn. Plalng pipa, kitn uwi marpm pa kai uk tu melnum a rpma tukwok pa. Pa ikga kitn rpmi ntiwe kolpa kaino anong wor ai. Atom plalng pa, kitn kul kununtopm!” 22 Melnum warimpen pa kil atning yangkipm pa, kil kai nampon ipma kalkut, eng ntei, kil melnum a antiwe kweikwei wailet.

23 Atom Sisas lanaki tu watnom alkil pa la, “Ti pa, kupm lanakepm aklale. Melnum a antiwe kweikwei watipmen pa, pa wonet eng kil elng Maur Wailen kawor itna wailen ikgalen nol nikgwalpm akilen pa. 24 Ti kupm wa la lanikepm la, kol ling pa la or tawong a ikyom a ak angkut apm pa kawor pa, ake aken kwap kol melnum a antiwe kweikwei watipmen la elng Maur Wailen kawor itni wailen ikglen nol nikgwalpm akilen, pa aken kwap paipm.”

25 Ti tu watnom alkil pa, tu atning yangkipm a kil la pa atom tu wrekg paipm eng yangkipm pa. Atom tu asen tita la, “Woi, ti mla a i antiwe mpa Maur Wailen ik uwiyel iye kul wor pa!”

26 19:26 Sop 42:2Ari Sisas ariwen kolpa atom kil lanaken la, “Melnum pa ake antiwe, pake Maur Wailen pa antiwe a antokg kweikwei wrongkwail.”

27 Atom Pita akalmpentel la, “Ti kitn ri, men naurng kweikwei wrongkwail alpmenen ase, a men am kul kanun kitn tike. Ti ikga men uwi kuina?”

28 19:28 Mat 25:31; Luk 22:30; Amp 3:21Ari Sisas wa akalmpe la, “Kupm lanakepm aklale. Ikga ik wang a kil ntokg kitnong a kanokg weten pa, ik wang pa Warim Kipman a Melnum ikga kil rpmi wrik wor a awi titnongket a nang wailen. Ti kipm watnom wampwam yikak wekg a kupm pa, pa kipm pa yat ikga kipm rpmi wrik wampwam yikak wekg wor a awi nang wailen eng ikga ikglen tu om wampwam yikak wekg a Isrel. 29 Kolpa ti melnum a kil naurng wan anong alkil aki kil naurng muinwror, muikgmayen, mansan, warim, a wring alkil pa eng kil akwap akupmen pa, ikga kil uwi melnum a kweikwei pa watipmen paipm ai angen a kil naurng itna pa, wa kil uwi yaprekg watin atom ikga kil rpmi wor yongkyong. 30 19:30 Mat 20:16; Luk 13:30Pake watipmen a tu a itna ep pa, tu pa ikga kai itni kunukg, a watipmen a tu itna kanukg pa, tu pa ikga kai itni ep.”