1 18:1 Luk 22:24Itna wang pa tu watnom a Sisas aroaro wonel pa kulntel atom asentel la, “Mla itna nang wailen itna kuin a tu a Maur Wailen itna wailen ikgalen ipma atuwen pa?”

2 Ari Sisas akwe warim yek ur pa kul kolti, kil wamparpme aye kaino itna kuin atuwen pa akla la, 3 18:3 Mat 19:14; Mak 10:15; Luk 18:17”Kil kupm la aklale, ake kipm plelngen nikgwalpm akipmen pa palng kolen tu warim yekyek a kolkil pipa, Maur Wailen ake antiwe a itna wailen ikgalen ipma akipmen. 4 Melnum a kil arku kil alkil palng kolen tu warim yekyek a kolkil pa, pa kil itna nang wailen itna kuin a tu a Maur Wailen itna wailen ikgalen ipma atuwen.

5 18:5 Mat 10:40; Luk 10:16; Son 13:20Melnum a kil ikgalen tu melnum a arku tulntu palng kolen tu warim yekyek a kolkil pa, pa kil ikgalen kupm.”

6 “Kol melnum ur ningkail warim yekyek wris ur a kolkil a ukipma kupm ti kil ngko pa, pa wor kol a tu yipo wes wail ur rpmi mengkel, atom ngkit ngkliwel kinar unokg ai.

7 Woi, arein kipm wrong kin a kipman! Kweikwei wailet a itna kanokg ti ak ningkailepm, atom kipm angko kai paipmpaipm. Ari kweikwei a ak ningkailepm pa am palng kolpa itna pake, ikgake kalpis pa. Pake woi, arein melnum a ningkail melnum ur iye kai ngko pa. 8 18:8 Mat 5:29-30Kol wam aki nepm ur a kitn pa rkolngkeitn la kitn la kai ntokg paipmpaipm pa, pa kitn wangket atom ngkli kai ai tukwelkg. Pa wor eng a kitn pa ngkiten wam wompel wris aki nepm wompel wris pa iye itni kolti eng mpa kitn uwi yaprekg watin a Maur Wailen atom ikga kaino rpmi wor yongkyong. Kitn elng nepm wam pa itni yatenen, atom kai anong paipm a wakg atne yongkyong pa, pa paipm. 9 Am kolpake, kol wulmpa wompel ur a kitn pa ak arkolngkeitn la kitn kai ntokg paipmpaipm pa, pa kitn inen ngkli tukwelkg. Kitn ngkiten wulmpa wompel pa uwi yaprekg watin a Maur Wailen pa kaino rpmi wor yongkyong pa pati wor pake. Kitn elng wulmpa pa itni yatenen, atom kai anong paipm a wakg atne pa, pa paipm.

10 18:10 Luk 19:10; Ipr 1:14Ti mpa wa kipm ikwonilmpen tu warim a kolpa. Mpa wa kipm lala tu pa warim paipm paipm ur kalpmel kolti, pa kalpis. Eng ntei, kupm lanakepm la, tu maur angklin a Maur Wailen ikgalen tu warim a kolpa pa, tu pa antiwe kai itna wulmpa a Yan akupmen kaino kitnong pake.

[ 11 Warim Kipman a Melnum wli la ik uwi tu melnum a kai oror ya paipm pa iye yaper kul.]”

12 “Ti kipm wa akwonalmpen kolai? Kol melnum ur a kil ikgalen manto walkg malkgu kamel wampwomis, atom wris ur pa kai am pa, pa ake mpa kil kai ikor wris ur a kai am pa? Pa mpa kil elngen manto walkg malkgu kamel wikgwikg tuwek wampwam yikakwomis yikakwompwikgwikg pa elngkitni nang i pa, a kil mpa wa kai wa ikor wris ur a am ai pen. 13 Kol kil nsil pa, kupm lanakepm aklale, kil mpa wa itopen paipm wrisen eng manto walkg malkgu wris pa wa angen manto walkg malkgu a itna ti. 14 Am kolpake, kol Yan akipmen a rpma kaino kitnong ti ake wakrongen la mpa warim waseksek ur a kolpa kai paipm pa.”

15 18:15 Luk 17:3; Kal 6:1Sisas kil wa la kolpa la, “Kol wusok aki wailen ur alkitn, kol kil ntokg nikgwalpm paipm ur kai kitn ti pa, kitn kai riwel. Kipmekg alkipmekg wekg kolti rpmi la kuina ur a kil antokg paipm kai kitn pa. Kol kil itning yangkipm a kitn la pa, am kitn angklinsel awiyel aye yaper kul ase. 16 18:16 Yang 19:15; Son 8:17Pake kol kil ake atning pa, mpa kitn uwi kol melnum wris aki melnum wekg ur ai kai ntiweitn kai itni yirokgel kitn pa, eng ik titnongketel yangkipm pa. 17 Kol kil ake la itning yangkipm a kipmteng pa pipa, wa kitn laniki tu wrong kin a kipman a ukipma Maur Wailen. Pa la ake wa kil atning yangkipm a tu pa yat pipa, mpa kitn la melnum pa la, pa kil kol melnum ipmawekg aki melnum paipm ur a antokg paipmpaipm.

18 18:18 Mat 16:19; Son 20:23Ti kupm lanakepm aklale wrisen, kuina ur a kipm yapo itna kanokg a ti pa, pa wa Maur Wailen yipo kolpa kaino kitnong ai. Wa kuina ur a kipm alken itna kanokg a ti pa, pa kil alken kolpa yat itna kaino kitnong ai.

19 18:19 Mak 11:24; Son 15:7Kupm la wa lanikepm nti ur la, kol kipmekg melnum wekg ur itni kanokg ti ipma wris eng kuina ur a kipmekg asen pa, mpa Yan akupmen a rpma kaino kitnong mpa kil lkepm pa. 20 Ti kol melnum wekg ur aki wraur ur, tunteng kai rki wris ngkit nang akupmen pa, pa kupm antiwen rpma.”

21 Atom Pita kil kul eng Sisas, atom kil asentel la, “Wailen, kol wusok aki wailen ur alkupm pa perper ntokg paipm kul kupm pa ikngklei wang pa, mpa kupm ungkwan paipmpaipm a kil pa nti aripm? Mpa kupm ungkwan kaino elngen wampwomis wampwompwekg aki?”

22 18:22 Luk 17:4Ari Sisas kil akalmpentel la, “Kupm ake wa lanakeitn la mpa nti wampwomis wampwompwekg pa, kupm lanakeitn la mpa nti kamelwraur tuwek wampwam yikakwomis yikakwompwekg.

23 Ti kitn itning, kupm la yangkipm kla ur kil a ak la arein a Maur Wailen itna wailen ikgalen nol nikgwalpm a mentepm. Pa kolen melnum tukgunakg ur, kil akwen tu melnum akwapel alkilen pa la tu ikilmpentel kweikwei kuloken alkil a rpma kai tu pa. 24 Atom tu aye ker a pikekg akawiye kweikwei kuloken akilen pa aye wli alkel, atom kil awi angkleikg rpma. Kil angkleikg kolpa kai, atom tu aye melnum wris ur pa aye wli. Ker alkilen pa palng watipmen paipm kamel kamel (10 milyen). 25 Akentiwe mpa kil ikilmpe, ker pa watipmen paipm ai. Kolpa atom melnum tukgunakg pa lanaki tu la mpa tu uwi melnum pa nimpon kin a watnom alkil pa, a kweikwei wrongkwail alkilen pa, mpa tu iye kai uk tu melnum ur ai rmpen. Atom mpa tu uwi marpm pa ikilmpe kweikwei kuloken pa. 26 Melnum pa kil atning kolpa, kil elngangko kinar rmpa nepmel melnum tukgunakg pa, a kil kirkar akg la, 'Kitn reinsopm pen, ikga kupm ikilmpenteitn kweikwei wrongkwail palpa.' 27 Melnum tukgunakg alkil pa areinsel kolti a kil la, 'Wor pa, kai kitn kai o! Kuloken akupmen a rpma kai kitn pa am kupm ungkwan ase.'

28 Melnum akwapel pa wrekg kai ari, kil ansil melnum a tuwekg akwap wris a pikekg awi marpm kuloken wasek ur kul kil ti. Atom kil kai arkulel a wamparpmewel meng kolpa, a lanakel la, 'Kitn ikilmpe kuina ur a pikekg kupm alkeitn tiwo!'

29 Ari melnum pa kil elngangko rmpa nepm kil ti, a kil lanakel la, 'Kitn reinsopm pen, ikga kupm ikilmpenteitn pa.' 30 Ari kil ti la, kil karken kolpa. Atom kil la tu awiyel kolti angkliwel kawor rpma wan tipmining pa eng ikga kil rpmi i i. Kil ikilmpentel kuloken pa kai plalng pa, kil kulor en om.

31 Atom tu melnum akwap wris tiur alkil pa tu itna ari kuina ur a palng kolpa atom, tu ipma kalkut. Kolpa a tu kai lanaki melnum tukgunakg alntu pa kweikwei wrongkwail a wuten palng pa. 32 Atom melnum tukgunakg pa akwe melnum akwapel a wuten awi melnum ur alkil pa kawor rpma wan tipmining pa kul aklewel la, 'Kitn ti antokg paipm. 33 Ake wa kitn ipma arein melnum akwap wris alkitn ti, kol a kupm arein kitn ti?' 34 18:34 Mat 5:25-26Melnum tukgunakg pa kil ipma wakget. Kolti kil ukwa melnum pa la kai rpmi wan tipmining pa rpmi i i, kil ikilmpe kuina ur kuloken a rpma num a kil pa plalng.

35 18:35 Mat 6:15; Mak 11:25; Epe 4:32; Kol 3:13Am kolpake, Yan akupmen a rpma kaino kitnong ti pa mpam wa kil ik kolpa kai kipm wris wris pake. Kol ake kipm ungkwan paipmpaipm ur kai wusok aki wailen alkipm pa, kipm ungkwan ik ipma wor iklale pa, Yan akupmen ikgake ungkwan paipmpaipm akipmen pa.”