1 6:1 Mat 23:5”Kipm lala kunun nikgwalpm ute wor ur a Maur Wailen pa, kipm ik iriwe! Ampur kipm antokg itna wulmpa a tu wrongkwail pa, kipm ik ampen. Kol kipm ik itni wulmpa a tu wrongkwail eng tu ri pa, Yan alkipm kaino kitnong pa ikgake lkepm kweikwei ur eng ikilmpe kwap a kipm ak kolpa.

2 Kolpa ti kol kitn la uk kwei ur melnum ur a rpma tukwok pa, ampur kitn ik kolen tu melnum a kansil plan ak num enen kolti antokg itna wan a atning atning yangkipm a Maur Wailen atnewe, a itna tatu ya eng la tu wrong kin a kipman riwen atom kiporng yangkipm tu pa. Kupm lanakepm aklale wrisen la, kweikwei a tu awi eng akalmpe kwap a tu ak kolpa, am tu awi plalng ampake. 3 Pake kitn ti pa, kitn la ngklin melnum ur a rpma tukwok pa, ik meen ampen kolti eng ampake melnum yek ur a rpma wrerenteitn pa riwe pa. 4 Pa mpa rpmi ampen kai kipmekg ti kolti. Pa pati mpa Yan akitnen kil ari a kitn ak ampen kolpa pipa, ikga kil lkeitn kweikwei ikilmpe kwap a kitn ak kolpa.”

5 6:5 Mat 23:5; Luk 18:10-14”Kipm la oklala niki Wailen pa, ampur kipm antokg kolen tu melnum a kansil ak num enen kolti. Tu kawor wan a atning atning yangkipm a Maur Wailen atnewe, atning yangkipm a Maur Wailen pa, wakrongen la wrekg itni kwa oklala niki Wailen, a kai itni ya wenting akapm a anong wail pa oklala nakel kolpa, eng mpa tu wrongkwail pa ri pa. Kupm lanakepm aklale la, kweikwei a tu awi eng kwap a tu ak kolpa, am tu awi plalng ampake. 6 Pake kipm ti pa, kipm la oklala niki Yan akipmen a rpma am pa, kipm kawor wan ok wunen ur pa ir wanyun pa atom kipm oklala nikel. Eng mpa Yan akipmen pa kil ri a kipm ak ampen kolpa, mpa kil ikilmpe.

7 6:7 1 Tukg 18:26-29Kipm la oklala niki Wailen pa, ampur kipm lanikel oklala a yiprokgen kalpisen a rkolng watin kol tu ipmawekg a la lalongen mring maur pa. A tu akwonalmpen la mring mpa itning oklala atuwen atnen oklala a tu or wrikel lala pa. 8 6:8 Mat 6:32Ampur kipm antokg kol tu pa, kol Yan akipmen pa kil ariwe ep ase kuina ur kipm la mpa isentel pa.

9 Mpa kipm laniki Maur Wailen pa kolkil: 'Yaiyai amenen kaino kitnong, men lala nang akitnen pa itni klalen wakget. 10 6:10 Luk 22:42Kitn itni wailen ikglen men wrong kin a kipman nimpon kweikwei wrongkwail pa. Kitn kunun wakrongen alkitn pa ntokg kweikwei itni kanokg ti kol a kitn antokg itna kaino kitnong pa. 11 Kitn lko okipma kol a antiwe am ti. 12 6:12 Mat 6:14-15; 18:21-35Kitn ungkwan paipmpaipm amenen ti, kol men ungkwan paipmpaipm a tu antokg kul men ti ase. 13 6:13 Luk 22:40; Son 17:15; 2 Te 3:3; 2 Ti 4:18; Sem 1:13Kitn iyewo ngkom nilokgen Maur Paipm a ningkailo la men ngko kai paipmpaipm.'

14 6:14 Mak 11:25-26Kol kipm ungkwan paipmpaipm a tu melnum antokg kai kipm ti pa, Yan akipmen kaino kitnong pa mpa wa kil ungkwan paipmpaipm akipmen pa yat. 15 Pake kol ake kipm ungkwan paipmpaipm a tu melnum antokg kai kipm ti pa, Yan akipmen ake mpa wa ungkwan paipmpaipm akipmen pa kalpis.”

16 6:16 Aisaia 58:5-9”Kipm la kalpis okipma a al eng uk wang Maur Wailen pa, ampur kipm atn plan tu kolen la kipm nikg almpepm pa, kolen tu melnum a plan ak num enen ti la tu melnum wor pa. Tu atn plan tu kolen la nikg almpen, atom tu ari pa tu la, tu pa kalpis okipma eng uk wang Maur Wailen. Kupm lanakepm aklale wrisen, tu ak kolpa tu awi kweikwei akalmpe kwap a tu ak pa, am tu awi plalng ampake. 17 Pake kitn ti pa, kitn la kalpis okipma eng uk wang Maur Wailen pa, kitn kurkuk, ik u yiwa pa ikinel ikgokg tukgunakg pa, kintirng. 18 Kolpa eng ake mpa tu riwe la kitn kalpis okipma eng uk wang Maur Wailen pa. Pa mpa Yan wris ata alkitnen a rpma ampen pa, kil ari kuina ur a kitn ak ampen kolpa pa, ikga kil ikilmpe pa.”

19 6:19 Sem 5:1-3”Ampur kipm la uwi wrikya wailet wor wor elngkitni lala eng rpmi ntiwe i kanokg ti. Kweikwei pa ikga atok, kitningkin ngket a ikga mingkirpet, a ikga tu melnum ikgwampet tikale wan ik ikgwampel. 20 6:20 Mat 19:21; Luk 18:22Kipm uwi wrikya wailet wor wor elngkitni kaino kitnong. Kweikwei kaino kitnong pa ikgake atok, kitningkin ngket, a ikgake mingkirpet, a tu melnum ikgwampet ikgake ik ikgwampel, kalpis. 21 Kweikwei wor wor akitnen a itna a i pa, nikgwalpm wail akitnen am arken pake.”

22 “Wulmpa pa kol wakg a akalen num wrongkwail. Wulmpa akitn pa wor pa, num wrongkwail akitnen pa mpa klalen wor. 23 Pake kol wulmpa akitnen pa paipm pa, num wrongkwail akitnen pa mpa miningket. Kol wakg a akalen num akitnen pa miningket pa, pa mpa miningket paipm wrisen.”

24 “Ake antiwe melnum wris ur kil iken kwap mring wekg pa. Kolpa pa, mpa kil ipma paipm eng ur a plan ipma wor wakrongen ur. Aki mpa kil uwi wor la ur a uwi paipm uk ur. Kolpa ti kitn ake antiwe akwap eng tuwekg yatenen, Maur Wailen a marpm pa.”

25 6:25 Pil 4:6; 1 Ti 6:6-8; 1 Pi 5:7”Kolpa ti kupm lanakepm la, ampur kipm nikgwalpm kalkut akwonalmpen watipmen la, mpa kipm il u a okipma a i, aki la mpa kipm nowe apm a i ikaur num akipmen ti. Okipma pa itna ep angen amen wor a melnum pake? Aki apm pa itna ep angen numpalk pake? 26 6:26 Mat 10:29-31; Luk 12:6-7Kipm ari wel a taur atn or kaino kwa pa aki! Tu pa ake kol mentepm melnum ti a aken kwap okipma angketuwai aye kawor itna wan pa, kalpis. Yan akipmen a rpma kaino kitnong ti kil ikgalenten eng okipma. Ti wel pa itna ep angen kipm melnum pake? 27 Kipm mlaur a akwonalmpen watipmen eng okipma pa, antiwe mpa wa kipm ngkine wang alkipmen a rpma ti wa iye kai ketn pake?

28 Kolpa ti wa kipm wa akwonalmpen watipmen eng apm pa eng ntei? Kipm ri kweikwei rwin a ari wor pa. Tu ake akwap aki antokg apm ur alntu eng nowe pa, kalpis. 29 6:29 1 Tukg 10:4-7; 2 Por 9:3-6Pake kupm lanakepm la, pikekg Solomon, melnum tukgunakg a antiwe kweikwei wor wor watipmen pa ak apm ari wor wor ak nowe num pake ake apm ur ari wor kolen kweikwei rwin pa. 30 Ti ri Maur Wailen kil antokg kweikwei rwin pa palng ariwor. Pake kweikwei rwin weti arimo pa, ikg pa wa tu ngket ngkli kai wakg. Ti kil ake antiwe ikgalen kipm melnum eng apm kweikwei pa? Kipm melnum ti pa wa itna ep angen kweikwei pa, ari ake wa kipm ukipma titnongket pa. 31 Kolpa ti ampur kipm nikgwalpm kaikut akwonalmpen watipmen la, mpa kipm il u a i, okipma a i, a nowe apm a i pa. 32 6:32 Mat 6:8Eng ntei, tu wrong kin kipman a kanokg ti pa nikgwalpm arken la uwi kweikwei a kolpa, pake Yan a kipm a rpma kaino kitnong pa kil ari ase kuina ur a kipm tukwok pa. 33 6:33 1 Tukg 3:11-14; Nang 37:4,25; Rom 14:17Kolpa ti kipm nikgwalpm rkekgen eng elng Maur Wailen pa itni wailen ikglen ipma akipmen, a wa kipm nikgwalpm rkekgen eng palng ute wor itni wulmpa alkilen pa pipa, mpa kil lkepm kweikwei wrongkwail pa yat. 34 Ampur kipm akwonalmpen watipmen kalkuten a ikg pa palngtepm pa. Kalkuten a ikg pa, pa a wang alkil ikg ai. Ikwonilmpen kol a am ti kolti.”