1 4:1 1 Te 2:19-20Kolpa ti, kipm melnum a mentepm ukipma Krais, kipm itni titnongket iklale wrisen kutnun Wailen! Yekyek alkupm, kupm ti plan ipma wor wasrongentepm paipm, nikgwalpm arkentepm rka. Kipm pa kol lukglukg wor wor ur a pikekg kupm aken kwap atom kupm pirng la uwi.

2 Kupm la kipmekg kin wekg Yuotia ekg Sintike, kipmekg kin a ukipma Wailen Sisas, kolpa ti kipmekg elngen nikgwalpm a kolpa, a kipmekg lok ngkli tita rpmi riwor. 3 4:3 Luk 10:20Wa kitn Sisikus, melnum alkupm a mentekg arki kalkuten akwap wris, kupm la kitn ngklin kin wekg pa, eng mpa tuwekg rpmi ukipma wor tita! Tuwekg pikekg akwap timplowis angklinsopm ak wang a kupm laron yangkipm wor a la Krais. Tuwekg pa nampokgen Klemen, wa tu tiur a pikekg men akwap or wris pa, nang atuwen pa ela wrkapm a Maur Wailen nira nang a tu a ikga rpmi wor yongkyong elawe pa.

4 Kipm a Wailen pa ti, kipm itopen o! Wa kupm wa la lanikepm nti ur la, kipm itopen ikngklei wang kolpa iye kai o!

5 4:5 Ipr 10:25; Sem 5:8-9Wailen wreren eng a nar,*4:5 Ok yiprokgen Krik pa la “Wailen wreren” pa pati la “Wailen kil itna wrerento”, wa ur pa la la “Wailen wreren eng a nar.” ti kipm lok ngkli tita meen tatar rki wor! Kipm ik kolpa, eng mpa ik plan tu wrongkwail ai, eng mpa tu ri. 6 4:6 Mat 6:25-34; Kol 4:2Ampur kipm mining paipmen num, ngkark atnen kalkuten ur pa! Pa kipm ukwen Maur Wailen pa oklala nikel, a wa lkel wor, eng mpa kil ngklinsepm kuina ur kalkuten a kipm arki pa. 7 4:7 Aisaia 26:3; Son 14:27; Kol 3:15Kipm oklala niki Maur Wailen kolpa pa, kil mpa lkepm ipma meen wor a Krais Sisas pa rpmi wail ikglen nol nikgwalpm akipmen pa, ti kipm ake mpa ngkirk. Ipma kukula kupuk meen wor a Maur Wailen alkepm kolpa pa kinar kanokg walopmen kinar ai, a wa kaino kwa watin kaino ai, a ariwe a melnum ti ake antiwe ariwe pa.

8 Kipm melnum alkupm a mentepm ukipma Sisas, oklala akupmen eng a kai plalng pake. Ti kupm la la lupm lupm kipm pa la, nikgwalpm akipm pa rki eng kweikwei a wor, a wa kweikwei a wrongkwail ari kaporng yangkipm la pa wor. Kweikwei a wor pa kol kil: kweikwei a aklale, kweikwei a ute wor, kweikwei a wriwen wor, kweikwei a atopen, a wa kweikwei kol a tu awi wor lawepm! Nikgwalpm a kipm pa rki eng kweikwei a wor wor kolpa kolti! 9 4:9 Rom 16:20Kuina ur a pikekg kupm kaling plantepm atom kipm awi ariwe pa, wa pikekg kipm atning a kupm laron pa, wa ari a kupm antokg pa, am kipm uwi ik kitila kolpa iye kai o! Kolpa pa mpa Maur Wailen ntiwepm rpmi lkepm ipma meen wor. Kil pa yan yiprokgen a ipma meen wor pake.

10 Kipm pikekg itna lailaien angklinsopm kweikwei ak ai kul pake. Kupm atnuurngkepm ti pa, kipm atopen kolpa itna la ngklinsopm, pake ya kalpisen mpa kipm ukwa kweikwei pa kul ik ngklinsopm or kolai. Atom ak wang ti kipm wa wonlan eng wa ukwa kweikwei pa kul ak angklinsopm tike, ti kupm atopen paipm ngkat nang a Wailen. 11 Ake la la pikekg kupm rpma paipm aki tukwok eng okipma a kweikwei a numpalk pa, atom kipm angklinsopm pa, kolpa kalpis. Kupm rpma kolai pa, pa ake paipm. Kupm rpma wor atopen rpma kolti. Wang wor wang paipm pa, kupm am rpma ariwe ise. 12 Kupm ariwe a kupm rpma antiwe kweikwei, a kupm ariwe a kupm rpma tukwok, pa am kupm rpma ariwe ise. Akangklei wang a kupm rpma ti aki, rpma tatu ai ai pa, nikgalmpopm aki, nikgwor aki, kupm antiwe kweikwei wailet aki, kupm rpma tukwok pa, kupm rpma wor kolti. Ya wrongkwail a kolpa pa am kupm ariwe yat ise. 13 4:13 2 Kor 12:10Kupm antiwe arki kalkuten, a antokg kweikwei wrongkwail pa ak titnongket a Krais alkopm pa.

14 Ari kipm ukwa kweikwei pa kul ak angklinsopm ak wang a kupm arki kalkuten, a kupm rpma tukwok kolkil pa wa wor yat. 15 4:15 2 Kor 11:9Ak wang ep a pikekg kupm angkli yangkipm wor a la Krais pa ak angklin kipm pa itna anong kanokg Masetonia, wa kupm atnurngkepm kai anong ur ai pa, am kipm melnum a ukipma Maur Wailen kai Pilipai pa ukwa kweikwei pa kul ak angklinsopm pake. Kipm pa ariwe pa, ake wa tu anong manet tiur a ukipma Maur Wailen pa wangkir a yapo nampokgen kupm ti pa, kalpis, am kipm alkipm pa kolti. Kupm pikekg laron yangkipm pa ak angklinsepm, wa kipm wa akalmpe ukwa kweikwei a kupm tukwok pa kul ak angklinsopm. 16 Wa ak wang a pikekg kupm rpma kai Tesalonaika pa, kupm tukwok eng kuina ur pa, kipm pa pikekg ukwa kweikwei kul ak angklinsopm anti aripm ur pake. 17 Kupm atopen kweikwei kol a kipm ukwa kul ak angklinsopm, pake wail manten pa kupm wasrongen la kipm ik kolpa iye kai pa, pa kolen kipm ak angkine marpm akipmen a Maur Wailen ikgalen kaino anong wor pa kil anip kolpa aye kaino wail. 18 Ti kil, ker a pikekg kupm wangket akawiye kweikwei a pikekg kipm uk Epaprotitus ayentopm kul pa, wailet paipm angen ai. Pa kol yaprekg wor a kipm al wor uk Maur Wailen ti kil awi wor atopen pa. 19 Maur Wailen akupmen, wa kil Maur Wailen akipmen yat, kil antiwe kweikwei wor wor wrongkwail wailet. Kipm melnum a ukipma Krais Sisas pa, kuina ur a kipm tukwok pa, mpa Maur Wailen kil lkepm pa. 20 Kolpa ti mentepm ngkit nang a Maur Wailen, Yan almentepmen pa, ikngklei wang kolpa iye kai! Aklale wrisen.

21 Alkepm wor, kipm wrong kin kipman a Maur Wailen a ukipma Krais Sisas, kupm nikgwalpm arkentepm rpma pa! Tu melnum a mentepm ukipma Sisas a antiwopm rka ti pa, wa tu la kupm nirantepm la tu nikgwalpm arkentepm rka pa. 22 Tu kin kipman wrongkwail a Maur Wailen a rka kil pa, wa nampokgen tu a akwap rka wan wail a melnum tukgunakg a Rom kil pa, tu wa la tu nikgwalpm arkentepm rka kolpake.

23 Yangkipm a kupm Pol nira eng ak angklinsepm am kai kolpake. Kupm asen Wailen Sisas Krais la kil plantepm ipma wor alkil a ngklin kipm wris wris pa rpmi wor.