1 Sisas lanaki tu watnom a kil aroaro wonel pa kolpa la, “Ampur kipm ipma kalkut, kipm ukipma kupm ti a wa kipm ukipma Maur Wailen pa itni titnongket. 2 Ti anong a Yan akupmen pa wrik wail itna. Kolpa ti kupm la ep kaino numprampen wan ti ik uwiye kipm ti wris wris iknumputepm elngtepm itni. Kol anong pa kalpis pa, pa kol ake kupm lanakepm la, kupm kaino numprampen wrik pa elngkitna eng kipm pa. 3 14:3 Son 12:26Pake wrik wail itna pa, kolpa ti kupm la ep kaino numprampentepm wrik pa elngtepm itni. Ikga kupm wa yaper nar ik yakurepm iye kaino eng alkupmen, eng ikga kipm ntiwopm rpmi kaino anong a kupm arpme ai. 4 Ya a kaino anong a kupm la kainowe pa kipm ariwe pa.”

5 Ari Tomas lanakel la, “Wailen, men ti ake ariwe anong ikga kitn kainowe pa, ti ikga men riwe ya pa kolai eng men kaino pa?” 6 14:6 Son 11:25; Rom 5:1-2Sisas akalmpentel la, “Kupm alkupm ti pa kupm ya, a kupm yiprokgen a nikgwalpm aklale, a wa kupm yiprokgen a uk yaprekg watin eng rpma wor yongkyong. Akentiwe mpa melnum ur or kol ya manet ur ai ngkom nlokgen kupm ti kaino eng Yan pa, kalpis, mpa or kupm ti kaino pake. 7 14:7 Son 8:19Atom kol kipm riwe kupm ti worwor pa, pa am wa kipm ariwe Yan akupmen pa yat pake. Kipm am ariwel ise, atom ik wang ti kai pa, kipm mpa wa uwi riwe kil pa worwor.”

8 Ari Pilip la kai Sisas pa la, “Wailen, kwei ur wail a men wasrongen la kitn ntokg pa pati lala kitn planto Yan ti. Kitn planto pa, men ake mpa wa isenteitn eng Yan pa wa or pa kai om.” 9 14:9 Son 12:45; Kol 1:15; Ipr 1:3Sisas akalmpe la, “Pilip, akangklei wang angkai ai kul ti kupm antiwepm rpma ti, ake wa kitn ariwe kupm ti? Melnum ur a kil ari kupm ti pa, am kil ari Yan akupmen pa yat ise. Ti antokg kolai atom, kitn wa lala plantepm Yan ti? 10 14:10 Son 12:49Ti ake kitn ukipma la kupm ti rpma kawor Yan ti a wa Yan ti rpma or kupm ti? Ti yangkipm a kupm lanakepm pa, pa ake yangkipm a kupm la ak nikgwalpm a kupm alkupm ti pa. Pa am Yan pa rpma or kupm ti atom kwap wrongkwail a kupm ak ti pa, am kil alkil pa ak pake. 11 14:11 Son 10:38Ti kipm ukipma la Yan pa rpma or kupm ti a wa kupm ti rpma kawor Yan pa. Pake kol ake kipm ukipma kol a kupm la la pipa, ti kol a kipm ri kwap titnongket weten weten a kupm antokg ak titnongket a Yan ti pa, kol kipm ukipma kol a kupm la pa am aklale pake.

12 14:12 Mak 16:19-20Kupm lanakepm aklale wrisen la, melnum ur a kil ukipma kupm ti pa, kil ikga ikwap kol kupm ak pa. Wa kil ikga wa ikwap kai klangkil kwap wrongkwail a kupm ak ti, eng ntei, kupm am kaino eng Yan kilke.*14:12 Sisas rpma kanokg a ti pa kil akwap itna kai Isrel pa kolti. Atom kil kaino kitnong pa, kil ukwa Maur Wor pa nar akwap kai tu wrong kin kipman a ukipma pa yela kanokg ti. Am yiprokgen pa atom tu wrong kin kipman pa tu akwap klangkil kwap a pikekg Sisas kil akwap ep ai. 13 14:13 Mat 7:7; Son 15:16Atom kuina ur a kipm ikga naren kupm ti niki Yan pa, pa ikga kupm ik pa, eng ikga Yan pa uwi nang wailen itnen kuina ur a kupm Warim Kipman alkilen ikga ik ikilmpe asen akipmen pa.†14:13 Kol mentepm isen Krais eng la uwi kwei ur kitila nikgwalpm a kil wasrongen pa, am Krais pa atom Maur Wailen kil alko pake. 14 Am wa kolpake, kipm isen kweikwei ur ik ok akupmen ti pa, pa ikga kupm ik pa.”

15 14:15 Son 15:10; 1 Son 5:3Sisas kil lala, “Kol kipm plan ipma wor wasrongentopm pa, pa kipm orngwatneikg katnun yangkipm titnongket wrongkwail a kupm alkepm la kipm kutnun pa. 16 14:16 Son 14:26; 15:26; 16:7Wa ikga kupm laniki Yan atom kil ikga ukwa Angklin ur a ikga itni yirokgelepm pa narntepm, a ikga ntiwepm rpmi yongkyong. 17 14:17 Son 16:13Pa Maur Wor a la yangkipm aklale. Tu melnum a kanokg ti pa ikgake ri Maur Wor pa a tu ikgake uwi riwe kil pa, kolpa ti tu ikgake ntiwe uwi Maur Wor pa. Pake kipm ti pa kil ikga rpmi kawor kipm ti a kil ikga ntiwepm rpmi, kolpa ti kipm ikga riwe kil pa.

18 Kupm ikgake utnuurngkepm rpmi kolen warim lmpo pa, kupm ikga narntepm pa. 19 Ikgake ingkai ai tu melnum a kanokg ti ikgake riwopm om. Pake kipm ti pa ikga riwopm pa, eng ntei, kupm ikga wa wrekg rpmi pa, a kipm ti yat ikga wa rpmi yongkyong pa. 20 14:20 Son 17:21-23Ikga ik wang pa kipm ikga riwe la kupm am rpma kawor Yan alkupmen ise, a kipm ikga rpmi or kupm ti, wa kupm ikga rpmi kawor kipm pa. 21 Melnum ur kil itning yangkipm titnongket a pikekg kupm alkepm la kipm kutnun pa, atom kil kutnun pa, pa kil melnum a kil plan ipma wor wasrongen kupm pake. A melnum a kil plan ipma wor wasrongen kupm ti pa, pa wa Yan akupmen wa plan ipma wor wasrongen kil pa. Wa kupm ti wa plan ipma wor wasrongen melnum pa a kupm ikga plan kupm alkupm ti eng kil ri kupm ti la kupm melnum kolpake.”

22 Sisas la kolpa atom ake Sutas Iskariot pa, Sutas ur manet ai akalmpe la, “Wailen, kitn la ikga plan kitn alkitn ti ngko wunong eng men ti kolti, a ikgake wa kitn plan tu wrongkwail kin a kipman a kanokg ti eng ntei?” 23 Ari Sisas akalmpe la, “Kol melnum ur kil plan ipma wor wasrongen kupm ti pa, pa kil mpa itning kutnun yangkipmok wrongkwail akupmen pa. Wa Yan akupmen mpa wa plan ipma wor wasrongentel, a mentekg mpa wa wlintel a wa kawor ntiwel rpmi. 24 14:24 Son 7:16Pake kol melnum ur ake plan ipma wor wasrongen kupm ti pa, pa kil ake antiwe atning katnun yangkipm akupmen ti pa. Yangkipm a kipm atning ti pa a Yan Wailen alkupm ai a ukwawopm nar ai, pa ake yangkipm a kupm alkupm ti pa.

25 Yangkipm a kupm lanakepm ti pa, kupm lanakepm ak wang a kupm antiwepm rpma tike. 26 Pake Maur Wor Angklin a ikga itni yirokgelepm a pikekg Yan la ikga ukwa nar uwi wrik akupmen pa, kil pa ikga kiling plantepm kweikwei wrongkwail, a ikga kil ngkitepm won eng yangkipm wrongkwail a kupm lanakepm kil.

27 Kupm eng a utnuurngkepm tike, ti kupm la lkepm ipma meen wor kil eng mpa kipm rpmi meen wor, pa ipma meen akupmen. A ipma meen wor a kupm la lkepm kil pa, pa ake kol a tu wrong kin a kipman a kanokg ti alkepm pa. Kolpa ti ipma akipmen pa ampur kalkut ngkark pa. 28 14:28 Son 20:17Kipm atning a kupm lanakepm pa la, kupm ikga kaino plalng atom kupm ikga wa yaper narntepm. Kol kipm plan ipma wor wasrongentopm pa, kipm mpa itopen eng kupm kaino eng Yan akupmen ti, kil pa Yan a itna wailen angen kupm ti. 29 14:29 Son 13:19Kweikwei a kupm la kil pa ake palng, a pa, pake kupm la lanikepm ep, eng kweikwei pa palng pa kipm ikga ukipma kupm ti itni titnongket.

30 Ti ake mpa kupm oklala ntiwepm wang watin, eng Maur Paipm Satan a itna tukgunakg ikgalen kanokg ti am wli tike. Kil ake antiwe titnongket na ur mpa wa itni ep ikglen kupm ti pa, kalpis. 31 Pake kweikwei pa mpam palng pake, eng mpa tu wrong kin a kipman a kanokg ti riwe la kupm plan ipma wor wasrongen Yan akupmen a kupm antokg kweikwei katila nikgwalpm a Yan lanakopm la kupm ntokg pa. Am pake, kolpa ti kipm wrekg wrekg eng tepm kai!”